Isaia 65:1-25
65 NE kumi au ia lautolu nakai huhu mai kia au; ne moua na au e lautolu nakai kumi mai kia au; ne pehe atu au ke he motu nakai fakahigoa a lautolu ke he haku a higoa, Kitiala, ko au hanai!
2 Kua fakaolo atu e au haku tau lima ke he aho oti ke he motu fakafualoto, ko lautolu ne o ke he puhala nakai mitaki ke lata mo e tau manatu ha lautolu;
3 Ko e motu kua fakahogohogomanava mau kia au ki mua haku, kua eke poa ai e lautolu ke he tau kaina kua to, mo e huhunu mena manogi e lautolu ki luga he tau maka kelekele;
4 Kua nonofo a lautolu ke he tau tukuaga, mo e api ai a lautolu ke he tau mena galo; kua kai e lautolu e tau maga puaka; ha ha he tau kapiniu foki ha lautolu e puke he tau mena fakalialia.
5 Ko lautolu ne pehe age, Kia fano kehe ā koe; ua fakatata mai a koe kia au, ha kua mua he tapu au kia koe. Ko lautolu na ko e ahua ia ke he haku ihu; ko e afi ne kaka ke he atu aho oti.
6 Kitiala, kua tohi e tau kupu ki mua haku; nakai fakamate au, ka to taui atu, to taui atu ni e au ke he tau fatafata ha lautolu,
7 Ko e tau mahani kelea ha mutolu, fakalataha mo e tau mahani kelea he tau matua ha mutolu, kua pihia mai a Iehova, ko lautolu ne huhunu ai e mena manogi ki luga he tau mouga, mo e ekefakakelea e lautolu kia au ki luga he tau mena tokoluga; to fafati atu foki e au ha lautolu a tau mahani kelea fakamua ke he tau fatafata ha lautolu.
8 Kua vagahau mai pehe a Iehova, Tuga ne moua ai e huhua vine ke he fuhi vine, ti pehe age a lautolu, Aua neke moumou ia ha ko e monuina ne toka ai; to eke pihia e au ha ko e haku a tau fekafekau, nakai fakamahakava e au a lautolu oti.
9 To fakatupu mai foki e au e fanau ia Iakopo, to tupu mai foki ia Iuta a ia ke eke māna haku a mouga; ko lautolu ni fifili e au to eke ai e lautolu ma lautolu; ti nonofo ai haku a tau fekafekau.
10 To eke a Sarona mo lotopā he tau fuifui mamoe, mo e pahua a Akori to eke ia mo mena ke tatakoto ai e tau fuifui manu, ma e haku a motu kua kumi kia au.
11 Ka ko mutolu kua tiaki a Iehova, mo e nimo haku a mouga tapu; ko lautolu ne fakatokatoka atu e tau mena kai ke he laulau ma Kato, mo e fakapuke ai e tau poa inu ma Meni,
12 Kua totou atu e au a mutolu ma e pelu, to tukutukuhifo a mutolu oti kia kelipopo ai; ha ko e mena ui atu e au ti nakai tali mai ai a mutolu; ne vagahau atu e au ti nakai fanogonogo mai a mutolu; ka e eke e mutolu e tau mena kelea kia au, mo e fifili ai e mutolu e tau mena nakai fiafia ai au.
13 Ko e mena ia, kua vagahau mai pehe e Iki ko Iehova, Kitiala, to kai mena haku a tau fekafekau, ka ko mutolu to hoge a mutolu; kitiala, to inu haku a tau fekafekau, ka ko mutolu to fia inu ni a mutolu; kitiala, to fiafia haku a tau fekafekau, ka ko mutolu to mā ni a mutolu.
14 Kitiala, to kalaga haku a tau fekafekau ha ko e loto fiafia, ka ko mutolu to tagi ni a mutolu he mamahi e tau loto, mo e tagi fekapai a mutolu he malipilipi ai e tau loto.
15 To toka foki e mutolu ha mutolu a higoa kia lautolu kua fifili e au, ke eke aki e kaialu; ti kelipopo he Iki ko Iehova a mutolu; ka to ui ai e ia hana tau fekafekau ke he higoa kehe.
16 Ko ia kua fakamonuina e ia a ia ke he motu to fakamonuina e ia a ia ke he Atua kua fakamoli; mo ia kua omonuo ke he motu to omonuo ai e ia ke he Atua kua fakamoli; ha kua nimo tuai e tau matematekelea fakamua, ha kua galo foki e tau mena ia kia au.
17 Ha ko e mena kitiala, kua eke e au e lagi fou mo e lalolagi fou; nakai tuai manatu ke he tau mena fakamua, ti nakai hake ai ke he loto e tau mena ia.
18 Ka e olioli ā mutolu mo e fiafia tukulagi ā mutolu ke he mena kua eke e au; ha kua eke e au a Ierusalema mo mena ke fiafia ai, ti eke e au hana tau tagata mo mena ke olioli ai.
19 To fiafia foki au ki Ierusalema, mo e olioli au ke he haku a motu, to nakai tuai logona foki ia koe e leo he tagi, mo e leo he fakatutuku.
20 To nakai tuai ha i ai ke he mena ia e tama mukemuke, po ke tagata motua kua nakai katoatoa ai hana tau aho; ha ko e mena to mate e fuata kua teau hana tau tau; ka ko e tagata hala kua teau hana tau tau to malaia a ia.
21 To ta fale e lautolu, mo e nonofo ai a lautolu; to to e lautolu e tau ulu vine, mo e kai ai e lautolu ha lautolu a tau fua.
22 Nakai ta fale e lautolu ke nonofo ai e falu, ti nakai to uluvine e lautolu ke kai ai e falu; ha kua tuga ne tau aho he akau e tau aho he haku motu; to oti ai kia lautolu ne fifili e au e tau mena ne eke ai ke he tau lima ha lautolu.
23 Nakai gahua teao a lautolu, to fanau e lautolu, ka e nakai tupu ai e fakaatukehe; ha ko e fanau kua fakamonuina e Iehova a lautolu, katoa mo lautolu ke tutupu mai ia lautolu.
24 Ka kua nakaila tauui e lautolu, to tali atu ai e au; ka kua vagahau mai e lautolu, to fanogonogo atu au.
25 To kai fakalataha e luko mo e punua mamoe, to kai he leona e tau kakau saito tuga ne povi; ka ko e gata to eke ai e efuefu mo mena kai hana; to nakai-eke e lautolu e tau mena kelea, ti nakai moumou mena ai e lautolu ke he haku a mouga tapu oti ni, kua pihia mai a Iehova.