Isaia 66:1-24
66 KUA vagahau mai pehe a Iehova, Ko e lagi ko e haku a nofoaiki haia, ko e lalolagi ko e haku a fakatuaga hui haia; ko e fe kia e fale ke ta e mutolu māku? Ko e fe kia e mena ke eke mo okiokiaga haku?
2 Ne eke ai e tau mena oti ke he haku tau lima; ti ha i ai e tau mena oti ia, kua pihia mai a Iehova; ka to hagao atu au ke he tagata nai, ko ia kua matematekelea mo e loto mamahi, ti vivivivi a ia ke he haku a tau kupu.
3 Ko ia kua tamate e povi kua tuga a ia ne keli e tagata; ko ia kua eke poa ai ke he punua mamoe, kua tuga a ia ne papaki e ua he kuli; ko ia ne eke e poa mena kai, kua tuga a ia kua eke poa ai ke he toto he puaka; ko ia kua eke e fakamanatuaga ke he pili lipano, kua tuga a ia kua fakamonuina atu ke he tupua; ko lautolu na foki, kua fifili e lautolu ha lautolu a tau puhala; ti fiafia ai a lautolu ke he ha lautolu a tau mena fakalialia.
4 Ko au foki to fifili e au e tau mena ke matematekelea ai a lautolu, to fakahoko atu foki e au kia lautolu e tau mena kua matakutaku ai a lautolu; ha ko e mena ui atu au, ka e nakai tali mai ai e taha; ne vagahau atu e au, ka e nakai fanogonogo mai a lautolu; kua eke e lautolu e tau mena kelea ki mua haku, ti fifili e lautolu e tau mena kua nakai fiafia au ki ai.
5 Kia fanogonogo mai ā mutolu ke he kupu a Iehova ko mutolu kua vivivivi ai ke he hana tau kupu, Ko e tau matakainaga ha mutolu ko lautolu kua fakavihia a mutolu, mo e vega a mutolu ha ko e haku a higoa, ne pehe age a lautolu, Kia fakaheke ai a Iehova; ti kitekite a mautolu ke he ha mutolu a olioli, ka e mā ni a lautolu.
6 Ko e leo he faoa tokologa ne go mai he maga? ko e leo mai he faituga? ko e leo a Iehova, kua taui atu e taui kia lautolu ne fai fi kia ia.
7 Ne fanau e ia ka e nakaila mahukihuki a ia; ne fanau ai e ia e tama tane ka e nakaila hoko hana mamahi ke fanau ai.
8 Ko hai kia ne logona ha mena pehena? Ko hai kia ne kitia e tau mena pehena? Ke mamahi fanau kia e motu ke he aho taha? Ke fanau mai agataha kia e motu? ha kua mamahi fanau a Siona ti fanau mai e ia hana tau tama tane.
9 To fakamamahi kia e au ke fanau, ti nakai kia fakafanau e au? kua pihia mai a Iehova; to fakafanau kia e au ti momotu ai au? Kua pihia mai hau a Atua.
10 Kia fiafia a mutolu fakalataha mo Ierusalema, ti olioli a mutolu kia ia, ko mutolu oti kua fakaalofa kia ia; kia fiafia fakalahi a mutolu fakalataha mo ia, ko mutolu oti ne tagi ha ko ia;
11 Kia kai e mutolu, mo e makona ai a mutolu ke he tau huhu he hana tau fakamafanaaga; kia kai ni e mutolu, mo e fiafia a mutolu ha kua lahi hana lilifu.
12 Ha kua vagahau mai pehe a Iehova, Kitiala, to fakahoko e au e monuina kia ia ke tuga ne vailele, mo e lilifu he tau motu kehe tuga ne vailele kua puapuā; ti kai ai e mutolu; to hapini a mutolu ke he hana kahokaho, ti fakafiafia ai a mutolu ke he hana tau tuli hui.
13 Tuga ne tagata ne fakamafana ai he hana matua fifine, to fakamafana pihia e au a mutolu, ti mafanatia ai a mutolu i Ierusalema.
14 To kitia foki e mutolu, ti olioli ai ha mutolu a tau loto, ti tupuolamoui ai ha mutolu a tau hui motua ke tuga ne vao mui; ti iloa ai e lima a Iehova ke he hana tau fekafekau; ka to ita lahi a ia kia lautolu kua fai fi kia ia.
15 Ha ko e mena, kitiala, to haele mai a Iehova mo e afi, ke tuga ne hiohio foki hana tau kariota, ke mafoki kehe hana ita ke he ita lahi, mo e hana akonakiaga ke he afi puhopuho.
16 Ha ko e mena to taufetoko a Iehova mo e tau tagata oti mo e afi katoa mo e hana pelu; to tokologa foki a lautolu kua keli e Iehova.
17 Ko lautolu kua fakatapu e lautolu a lautolu, mo e fakameā e lautolu a lautolu ke o atu ke he tau kaina, ke mumui atu ai ke he taha i loto, ko lautolu kua kai e tau maga puaka, mo e tau mena fakalialia, mo e tau kuma, to fakahiku ai fakalataha a lautolu, kua pihia mai a Iehova.
18 Ha ko au kua hoko mai ki mua haku ha lautolu a tau gahua mo e ha lautolu a tau manatu, ti fakapotopoto ai e tau motu kehe oti mo e tau vagahau; to o mai a lautolu mo e kitia e lautolu haku lilifu.
19 To tuku atu foki e au kia lautolu e fakamailoga, to fakafano atu foki e au a lautolu kua hao ia lautolu ke he tau motu kehe, ki Tasesa, mo Pulu, mo Luti, ko lautolu kua loloku e kaufana, ko Tupalu, mo Iavana, ko e tau motu mamao ne takai he tahi, ko lautolu kua nakai logona e tala kia au, ti nakai kitia e lautolu haku lilifu; to talahau atu foki e lautolu haku lilifu ke he tau motu kehe.
20 To tamai foki e lautolu ha mutolu a tau matakainaga oti mai he tau motu oti, ko e poa kia Iehova, ki luga ke tau solofanua, mo e tau kariota, mo e tau fata, mo e tau falata, mo e tau kamela ki luga haku a mouga tapu ko Ierusalema, kua pihia mai a Iehova; ke tuga ne fanau a Isaraela kua tamai e lautolu e poa ke he kapiniu meā ke he fale a Iehova.
21 To uta foki e au falu ia lautolu ke eke mo tau ekepoa, ke eke foki mo tau tagata Levi, kua pihia mai a Iehova.
22 Ha ko e mena tuga ne tumau ki mua haku e lagi fou mo e lalolagi fou kua eke e au, kua pehe mai a Iehova, to tumau pihia ha mutolu a fanau mo e ha mutolu a higoa.
23 Ko e taha mahina pula fou, mo e taha mahina pula fou, ko e taha sapati mo e taha sapati to o mai ai e tau tagata oti ke hufeilo ki mua haku, kua pihia mai a Iehova.
24 To o atu foki a lautolu mo e kitekite ke he tau tino mamate he tau tagata ne fakafualoto mai kia au; ha ko e mena nakai mate ha lautolu a uaga, to nakai tamate foki ha lautolu a afi; to vihiatia foki a lautolu he tau tagata oti kana.