Isaia 7:1-25
7 KO e vaha ia Ahasa ko e tama a Iotamo, ko e tama a Usia ko e patuiki a Iuta, ne o hake ai ki Ierusalema a Resina ko e patuiki a Suria, mo Peka ko e tama a Remalia ko e patuiki a Isaraela, ke tau ki ai, ka e nakai ni maeke a lautolu ke kautu ki ai.
2 Kua tala age foki ke he magafaoa a Tavita, kua pehe age, Kua lagomatai a Efaraimo ki Suria; ti vivivivi ai hana loto, mo e tau loto he hana motu tuga ne luelue ai e tau akau he vao ke he matagi.
3 Ti pehe mai a Iehova kia Isaia, Kia fano a koe ke fonofono a Ahasa, ko koe, mo e tama hau ko Sarasopa, ke he potu he hala vai he loto vai i luga, ke he puhala tu ke he fonua he tagata unu tapulu,
4 Ti pehe atu a koe kia ia, A koe kia koe, kia nofo fakatekiteki a, aua neke matakutaku a koe, ti aua neke fakalolelole hāu a loto ha ko e tau potu hulu ua na ne ahua, ko e ita lahi haia a Resina mo Suria, katoa mo e tama a Remalia.
5 Ko e mena pulega a Suria ke eke fakakelea kia koe, ko Efaraimo foki, mo e tama a Remalia, kua pehe age,
6 Kia o hake a tautolu ki Iuta, mo e fakamamahi atu kia lautolu, ti moumou ai e tautolu e pa mo hala ma tautolu, mo e kotofa ai e tautolu e patuiki, ko e tama a Tapeala a ia.
7 Kua pehe mai e Iki ko Iehova, Nakai mau e mena ia, nakai ni hoko.
8 Ha ko e ulu a Suria, ko Tamaseko haia; ko e ulu foki a Tamaseko ko Resina ia; ka hoko foki ke he tau tau ne onogofulu ma lima ti malipilipi ai a Efaraimo, ti nakai tuai eke mo motu.
9 Ko e ulu foki a Efaraimo, ko Samaria haia; ko e ulu foki a Samaria ko e tama a Remalia haia; kaeke ke nakai tua a mutolu, ti nakai tumau a mutolu.
10 Kua liu vagahau mai e Iehova kia Ahasa, kua pehe mai,
11 Kia ole e koe e fakamailoga ke eke ai e Iehova hau a Atua, kia ole e koe mai he tau mena i lalo, po ke mai he tau mena i luga.
12 Ti pehe atu a Ahasa, Nakai ole atu e au, ti nakai kamatamata e au a Iehova.
13 Ti pehe atu ai a ia, Kia fanogonogo mai a ko e magafaoa a Tavita na e, Ko e mena tote kia kia mutolu ke fakamamahi ai e tau tagata, kua fakamamahi ai e mutolu haku Atua?
14 Ko e mena ia to foaki mai he Iki e fakamailoga kia mutolu; kitiala, to fatu e tamafine tote, mo e fanau mai e tama tane; to fakahigoa foki e ia a ia ko Emanuela.
15 To kai e ia e puke huhu tuli mo e meli, ato iloa e ia ke tiaki e kelea, ka e fifili ai e mitaki.
16 Ko e mena nakaila iloa he tama ke tiaki e kelea mo e fifili e mitaki, to tiaki ai e motu, hana e tau patuiki tokoua ne matakutaku ai a koe.
17 To fakahoko mai e Iehova kia koe, mo e hāu a motu, katoa mo e magafaoa he hāu a matua, e tau aho, nakai hoko mai e tau aho pihia tali he vevehe kehekehe ai a Efaraimo mo Iuta; ko e patuiki a Asuria haia.
18 Ko e aho ia foki to mapu atu ai e Iehova ke he tau lago ha ha he tau kauvai he tau vailele i Aikupito, mo e lago meli ha ha he motu ko Asuria.
19 Ti o mai a lautolu oti mo e nonofo ai ke he tau pahua kua tiaki, mo e tau maihi he tau maka tumau, mo e tau lakau fotofoto oti, katoa mo e tau mena oti ne loga ai e motietie.
20 Ko e aho ia to hifi ai he Iki ke he nifo kua totogi, mai he tau mena ke he fahi atu he vailele, ko e patuiki a Asuria haia, to hifipuga ai e ulu mo e tau fulu he tau hui, katoa foki mo e hafe to hifi kehe ai e ia.
21 Ko e aho ia foki to fagai he tagata e punua povi fifine mo e ua e mamoe.
22 Ti kai e ia e puke huhu tuli he lahi e puke huhu ke moua mai ai; ha ko e mena kai puke huhu tuli mo e meli a lautolu oti kua toe ke he motu.
23 Ko e aho ia foki ke he tau mena oti ne ha i ai e tau vine afe ne fakafua ai ke he tau tupe taha e afe ne fakafua ai ke he tau tupe taha e afe to ha i ai e tau akau talatala mo e tau akau fotofoto.
24 To o mai a lautolu mo e tau fana mo e tau kaufana; ha ko e mena eke ai e motu oti mo tau akau talatala mo e tau akau fotofoto.
25 Ko e tau mouga oti foki ne keli ai ke he tau koho, nakai fano a koe ki ai he matakutaku he tau akau talatala mo e tau akau fotofoto, ka to uta ki ai e tau povi, to totolo ai foki e tau mamoe.