Isaia 9:1-21
9 KA e nakai tumau e pouli ke he motu kua matematekelea; tuga ne ekefakakelea ke he vaha fakamua e motu ko Sepulona mo e motu ko Nafatali; to pihia he fakalilifu kia ia ke he vaha fakamui, ko e hala ke he vai, ko e mena ke he fahi atu a Ioritana, ko Kalilaia he tau motu kehe.
2 Ko e motu ne o ke he pouli kua kitia e lautolu e maama lahi; ko lautolu ne nonofo ke he motu he ata he mate, kua kikila mai kia lautolu e maama.
3 Kua fakatokologa e koe e motu kua fakalahi ai e koe ha lautolu a fiafia, kua fiafia a lautolu ki mua hāu, tuga ne fiafia ka helehele ai e saito, ke tuga ne olioli ai a lautolu kua tufatufa e tau mena ne fofo he tau.
4 Ha kua papaki e koe e lakau hahamo he hana kavega, mo e akau he hana ua, ko e tokotoko hana ne pule mo e favale kia ia, tuga ne eke ke he aho a Mitiana.
5 Ha ko e tau afialoalohui oti ha lautolu kua afi ai, kua tomumu ai ke he tau, mo e tau tapulu kua toto oti ai, to huhunu e tau mena ia, to eke ni mo gaafi ke he afi.
6 Ha kua fanau mai ma tautolu e tama, kua foaki mai ma tautolu e tama tane, ha ha he ua hana e pule, to ui foki hana higoa ko e Mua ue atu, ko e Pule, ko e Atua malolo, ko e Matua tukulagi, ko e Iki he mafola.
7 Nakai fai mena ke liu mai ai e lilifu he hana pule, mo e mafola he hana pule ke he nofoaiki a Tavita mo e hana kautu, ke fakatu ai, mo e fakamau ke he fakafiliaga mo e mahani tututonu, ke kamata mai he vaha nai ke hoko ke he tukulagi; to eke ai e tau mena ia ke he fakamalolo a Iehova Sapaota.
8 Ne fakafano mai he Iki hana finagalo kia Iakopo, ti to mai ai kia Isaraela.
9 Kua iloa foki he motu oti, ko Efaraimo mo lautolu kua nonofo i Samaria, kua pehe mai a lautolu ke he fakatokoluga mo e fakahakehake he tau loto ha lautolu.
10 Kua malolo e tau maka kelekele, ka to ati hake ai e mautolu ke he tau maka tātā; kua hio tuai e tau sukamora, ka to hukui aki e mautolu ke he tau arasi.
11 Ko e mena ia to fakamatalahi e Iehova a lautolu ne fai fi kia Resina ki luga ia lautolu, to fakaohooho atu foki e ia kia lautolu a lautolu kua fai fi kia lautolu;
12 Ko Suria ki mua, mo Filisitia ki tua, to kai e lautolu a Isaraela mo e tau gutu kua fakamaga. Ka e pete ni he tau mena oti ia, nakai liu kehe ai hana ita, ka e fakaolo atu agaia ni hana lima.
13 Ka e nakai liu mai e motu kia ia ne ta a lautolu; to nakai kumi a lautolu kia Iehova Sapaota.
14 Ko e mena ia kua vevehe kehe ai e Iehova ia Isaraela e ulu mo e hiku, ko e lau pama katoa mo e kaho ke he aho taha ni.
15 Ko e patu mo e iki lilifu ko e ulu haia; ko e perofeta kua fakaako ai e tau pikopiko ko e hiku haia.
16 Ko lautolu ne eke mo tau takitaki he motu nai kua fakahehe e lautolu a lautolu; ti kua fakaoti ai a lautolu ne takitaki e lautolu.
17 Ko e mena ia nakai fiafia ai e Iki ke he ha lautolu a tau fuata, nakai fakaalofa foki a ia ke he ha lautolu a tau tama nakai fai matua mo e ha lautolu a tau fifine takape; ha ko e tau tagata kolokolovao mo e mahani kelea a lautolu oti kana, kua vagahau foki he tau gutu oti ke he tau mena kelea. Ka e pete ni he tau mena oti ia, nakai liu kehe ai hana ita, ka e fakaolo atu agaia hana lima.
18 Ko e mena puho e mahani kelea tuga ne afi, kua huhunu ai e tau akau fotofoto mo e tau akau talatala; ti huhunu ai e vao vihi, ti hake ai a lautolu tuga ne ahua.
19 Ko e ita a Iehova Sapaota kua huhunu ai e fuga kelekele, kua eke foki e motu o tagata mo tau gaafi ke he afi; ti nakai fakaalofa a lautolu ko e taha ke he taha.
20 Kua hēhē he taha ke he fahi matau, ka e hoge agaia ni a ia; kua kai foki ke he fahi hema ka e nakai ni makona; ne takitaha a lautolu mo e kai ai e kakano he hana lima.
21 Kua kai e Manase a Efaraimo, kua kai foki e Efaraimo a Manase, ti kau fakalataha a laua ke tau kia Iuta. Ka e pete ni he tau mena oti ia, nakai liu kehe ai hana ita, ka e fakaolo atu agaia hana lima.