Iuta 1:1-25
1 KO au ko Iuta ko e fekafekau a Iesu Keriso, ko e matakainaga foki a Iakopo, ko e haku a tohi hanai ke he tau tagata ne uiina kua fakatapu he Atua e Matua, mo e leoleo ai ma Iesu Keriso.
2 Kia fakalahi kia mutolu e fakaalofa, mo e monuina, mo e totonu.
3 Ko e tau fakahelehele na e, ne eke taha au ke tohi atu kia mutolu ke he fakamouiaga kua tuku fakalapalapa mai, ko e mena lata ia au ke tohi atu kia mutolu, mo e ole atu kia mutolu ke tau fakalahi ha ko e tua ne lagataha he tuku mai fakaoti ke he tau tagata tapu.
4 Ha ko e mena huhū mai fufu e falu a tagata, kua tigahau foki he tohi fakamua a lautolu ke hoko ki ai e fakahala nai; ko e tau tagata matahavala kua liu e lautolu e fakaalofa noa he Atua ha tautolu ke he mata kakana, mo e fakatikai e lautolu e Iki tokotaha, ko e Atua, mo e ha tautolu a Iki ko Iesu Keriso.
5 Kua fia fakamanatu atu foki au kia mutolu ke he mena ne lagataha he iloa fakaoti e mutolu, ne fakamoui he Iki e motu mai he motu ko Aikupito, ka e fakamui ne fakotioti e ia a lautolu kua nakai tua.
6 Ko e tau agelu foki kua nakai taofi ha lautolu a lilifu, ka kua toka e lautolu e mena ne nonofo ai a lautolu, kua taofi e ia a lautolu ke he tau liliaga tukulagi ki lalo he pouli, ato hoko ke he fakafiliaga he aho lahi.
7 Tuga a Sotoma mo Komora mo e tau māga ne agaagai ai, ne faivao pihia a lautolu na, mo e mumui atu foki ke he tau tino kehe, ko e mena ia kua tuku mai ai a lautolu ke eke mo fakamailoga, kua fakahala tonu a lautolu ke he afi tukulagi.
8 Kua pihia foki ni e tau tagata mohe miti ia, kua fakakelea e lautolu e tino, kua fakalialia foki ke he tau iki, mo e vagahau kelea kia lautolu ne lilifu.
9 Ka ko Mekaeli ko e agelu ne mua, ne taufetoko a laua mo e tiapolo ti taufetoko ke he tino a Mose, kua nakai fakamalolo ke talahau atu ha kupu kelea ke fakahala kia ia, ka kua pehe atu kia ia, Kia akonaki a koe he Iki.
10 Ka ko e tau tagata ia, kua vagahau kelea a lautolu ke he tau mena oti kua nakai iloa e lautolu, ko e tau mena foki kua iloa noa e lautolu, tuga ne tau mena momoui nakai fai manamanatu, kua fakakelea e lautolu a lautolu ke he tau mena ia ni.
11 Oi fakaalofa kia lautolu! ha ko e mena o a lautolu ke he puhala a Kaino, mo e tafepoi fakahanoa ke he hehe a Palaamo ha ko e totogi, kua mahaikava foki a lautolu ke he fakafualoto a Koru.
12 Ko e tau ie he tahi a lautolu ke he ha mutolu a tau kaiaga mena fakaalofa, ka kua kai mena a lautolu fakalataha mo mutolu mo e nakai matakutaku, kua fagai e lautolu a lautolu ni; ko e tau aolagi a lautolu nakai ha i ai ha vai, kua uta fano he matagi; ko e tau akau kua mokulu e tau lau, kua nakai fua, kua mate lagaua, kua huo tuai;
13 Ko e tau peau tolo tua he tahi, kua fakalua hake e tau mena ke ma ai a lautolu; ko e tau fetu o fano kua toka ma lautolu e pouli kiki tukulagi.
14 Ne talahaua foki a lautolu e Enoka ko e tokofitu ia mai ia Atamu, kua pehe age, Kitiala, kua haele mai e Iki mo e hana tau tagata tapu afe mo afe,
15 Ke fakafili ai e tau tagata oti, mo e fakahala ai a lautolu oti kua matahavala ha ia lautolu, ha ko e ha lautolu a tau mahani matahavala oti ne eke he matahavala ai a lautolu, ha ko e tau kupu favale foki ne vagahau kia ia e tau tagata hala mo e matahavala.
16 Ko e tau tagata loma a lautolu na, mo e fegui, kua omaoma a lautolu ke he ha lautolu a tau manako lahi, kua vagahau mai foki e tau gutu ha lautolu e tau kupu fakatokoluga, kua nava foki a lautolu ke he tau tagata ke moua ai e tau mena.
17 Ka ko mutolu ko e tau fakahelehele na e, kia manatu a mutolu ke he tau kupu ne talahau mai i tuai he tau aposetolo he Iki ha tautolu ko Iesu Keriso;
18 Ne tala age ai e lautolu kia mutolu, To ha i ai ke he vaha fakamui e tau tagata va, ke omaoma a lautolu ke he ha lautolu a tau manako lahi mo e matahavala.
19 Ko e tau tagata ia kua vevehe kehe e lautolu a lautolu, kua omaoma ke he tino, nakai ha ia lautolu e Agaga.
20 Ka ko mutolu, ko e tau fakahelehele na e, kia ati hake e mutolu a mutolu ke he ha mutolu a tua kua tapu ue atu, ko e Agaga Tapu ke liogi ai a mutolu,
21 Kia fakatumau e mutolu a mutolu ke he fakaalofa he Atua, ti fakatalitali ke he fakaalofa he Iki ha tautolu ko Iesu Keriso, kia hoko atu ke he moui tukulagi.
22 Kia fakaalofa age a mutolu ke he falu mo e fakalatalata;
23 Ka ko e falu kia fakamoui e mutolu a lautolu mo e matakutaku, kia hamu a lautolu mai he afi, kia fakavihia foki e mutolu e tapulu kua pikitia he tino.
24 Hanai, kia ha ia ia kua maeke ke leveki a mutolu neke veveli, mo e tuku atu a mutolu nakai fai kelea ki mua he hana lilifu mo e fiafia lahi,
25 Kia ha he Atua iloilo tokotaha, ko e Fakamoui ha tautolu, e fakahekeaga mo e lilifu, ko e malolo mo e pule, ke he vaha nai katoa mo e tukulagi tukumuitea. Amene.