Kalatia 1:1-24
1 KO au ko Paulo, ko e aposetolo, (nakai mai he tau tagata, ti nakai kotofa foki he taha tagata, ka ko Iesu Keriso, mo e Atua e Matua, ko ia ne fakatu mai a ia mai ia lautolu kua mamate,)
2 Katoa mo e tau matakainaga oti kana kua fakalataha mo au, ko e tohi ha mautolu hanai ke he tau ekalesia i Kalatia.
3 Kia ha ha ia mutolu e fakaalofa noa mo e monuina mai he Atua e Matua, mo e Iki ha tautolu ko lesu Keriso,
4 Ko ia ne foaki mai e ia a ia ha ko e tau hala ha tautolu, kia laveaki mai ai e ia a tautolu he mouiaga kelea ha i ai nai, kua lata mo e finagalo he Atua, ha tautolu a Matua haia.
5 Kia ha ha ia ia e fakahekeaga tukulagi tukumuitea. Amene.
6 Kua ofomate au he vave pihia ha mutolu a mafoki kehe mai ia ia ne ui ai a mutolu he fakaalofa noa a Keriso, ka e hagao atu ke he taha vagahau mitaki,
7 Ka e nakai ko e taha vagahau mitaki foki, ka ko e falu a tagata kua fakatupu e fakaatukehe kia mutolu, mo e fia liliu kehe e vagahau mitaki a Keriso.
8 Kaeke foki ke fakamatala kia mutolu e vagahau mitaki kua kehe mo ia ne fakamatala atu ai e mautolu kia mutolu, pete ni he fakamatala ai e mautolu, po ke agelu mai he lagi, kia anatema a ia.
9 Tuga he tala atu tuai e mautolu, kua liu foki tala atu nai e au, Kaeke ke fakamatala atu he taha kia mutolu e vagahau mitaki kua kehe mo ia ne talia ai e mutolu, kia anatema a ia.
10 Ha kua ole atu nai kia e au ke he tau tagata po ke Atua? Po ke kumi kia e au ke fakafiafia ke he tau tagata? Ha ko e mena ane mai kua fakafiafia agaia e au ke he tau tagata, po kua nakai eke au mo fekafekau a Keriso.
11 Ko e tau matakainaga na e, kua fakailoa atu e au kia mutolu, nakai ko e mena he tau tagata e vagahau mitaki ne fakamatala e au;
12 Ha ko e mena nakai moua ai e au mai he tau tagata, ti nakai ko e mena ako e au, ka ko e fakakiteaga a Iesu Keriso ne moua ai e au.
13 Ha kua fanogonogo a mutolu ke he haku a mahani ne aho mua he liogi au ke he liogi Iutaia, ne favale ue atu au ke he ekalesia he Atua, mo e moumou ai.
14 Ne mua foki haku a fakamalolo ke he liogi Iutaia kia falu ne tokologa he haku a motu, ko e fanauaga fakalataha a mautolu, ne fakamakutu lahi au ke he tau kupu toka tuai he haku a tau matua tane.
15 Ka ko e Atua, ko ia ne vevehe kehe au tali mai he fanau ai au he haku a matua fifine, mo e ui mai kia au he hana fakaalofa noa, ne finagalo a ia,
16 Ke fakakite mai hana Tama ki loto ia au, kia fakamatala atu ai e au e vagahau mitaki kia ia ke he tau motu kehe; ti nakai pulega ai au mo e tau tagata,
17 Ti nakai hake foki au ki Ierusalema kia lautolu ne aposetolo fakamua kia au, ka e fina age au ki Arapi, ti liu ai foki ki Tamaseko.
18 Ne mole atu tolu e tau, ti hake ai au ki Ierusalema ke kitia a Peteru, ti po hogofulu ma lima he nonofo ai a maua.
19 Ka e nakai kitia e au e taha he tau aposetolo, ka ko Iakopo hokoia e matakainaga he Iki.
20 Ko e tau mena foki kua tohi atu nai e au kia mutolu, kitiala, kua tala atu ki mua he Atua, nakai pikopiko ni au.
21 Kua mole ia, ti fina atu ai au ke he tau fahi motu ko Suria mo Kilikia;
22 Ka e nakai kitia hoku mata he tau ekalesia i Iutaia, ko lautolu ha ha ia Keriso;
23 Ka kua fanogonogo atu hokoia a lautolu, Ko ia ne favale mai ne aho mua kia tautolu, kua fakamatala atu ainei e ia e vagahau mitaki ke he tua, ne moumou ai e ia ne aho mua;
24 Ti fakaheke atu ai e lautolu ke he Atua ia au.