Kalatia 3:1-29
3 KALATIA goagoa na e, ko hai kia ne fakahehe ai a mutolu kia nakai omaoma a mutolu ke he kupu moli, kua fakakite tuai kia mutolu ki mua ha mutolu ko Iesu Keriso ne fakasatauro?
2 Ko e mena nai hokoia kua fia iloa e au kia mutolu, po ke ne moua e mutolu e Agaga ke he tau gahua he fakatufono, po ke moua he fanogonogo ke he tala ke he tua?
3 Kua goagoa pihia kia a mutolu? Ne kamata a mutolu ke he Agaga, ha ne fakahiku kia a mutolu ainei ke he tino?
4 Ne mamahi teao kia a mutolu ke he tau mena loga ia? Kaeke kua moli kua teao.
5 Ko ia ne ta atu kia mutolu e Agaga, mo e eke e tau mana kia mutolu, ko e tau gahua he fakatufono kia ne eke ai po ke fanogonogo ke he tala ke he tua?
6 Pihia foki a Aperahamo, ne tua a ia ke he Atua, ti talahaua ai kia ia ke eke mo tututonu.
7 Haia, kua iloa e mutolu, ko lautolu kua tua ko e tau tama a Aperahamo a lautolu.
8 Ne iloa foki he Tohi i tuai, ko e tua ke talahaua tututonu ai he Atua e tau motu kehe, ti talahau ai e ia i tuai e vagahau mitaki kia Aperahamo, kua pehe, To monuina e tau motu oti kana ia koe.
9 Hanai, ko lautolu kua tua kua monuina a lautolu fakalataha mo Aperahamo, ne ha ha i ai e tua.
10 Ha ko lautolu oti kua falanaki ke he tau gahua he fakatufono, kua ulaafia tuai a lautolu; ha kua tohi mai, Kua ulaafia a lautolu oti kua nakai tumau ke he tau mena oti kana kua tohi ke he tohi he fakatufono ke eke ai.
11 Ka kua iloa maliali ni nakai talahaua tututonu taha ke he fakatufono ki mua he Atua; ha ko e mena, To moui e tagata tututonu ke he tua.
12 Ka ko e fakatufono nakai mai he tua ia, ka Ko e tagata ke eke e tau mena ia to moui ai ni a ia.
13 Ne fakafua mai ai he Keriso a tautolu he kaialu he fakatufono, ne ulaafia a ia ma tautolu, ha kua tohi mai, Kua ulaafia a lautolu oti kua fakatautau ke he akau;
14 Kia hoko ke he tau motu kehe e monuina a Aperahamo ia Keriso Iesu, kia moua e tautolu ke he tua a ia ne talahaua mai, ko e Agaga haia.
15 Ko e tau matakainaga na e, (ko e tau kupu he tagata kua tala atu e au,) pete ni ko e maveheaga he tagata, kaeke kua fakamau ia, ti nakai fakai e taha ke fakahui, po ke fakalahi ai.
16 Ne talahau mai e tau mena ne talahaua kia Aperahamo mo e taha he hana fanau; nakai pehe mai, Ko e tau fanau, tuga ne tokologa, ka e tuga ne tokotaha, pehe, Ko e taha he hau a fanau; ko Keriso ni haia.
17 Ko e haku a kupu hanai; ko e maveheaga ne fakamau i tuai he Atua kia Keriso, kua nakai maeke ke fakahui he fakatufono ne mumui age ki ai, ko e tau tau ne fa e teau, mo e tolu e hogofulu, kia eke mo mena nakai aoga e talahau.
18 Ha ko e mena kaeke kua mai he fakatufono e mena ke moua ti nakai tuai mai he talahau; ka ko e mena foaki noa he Atua kia Aperahamo ke he kupu ne talahaua.
19 Hanai, kua aoga ha ha e fakatufono? Ne lafilafi a ia ha ko e tau holifono, ato haele mai e fanau ne talahaua ki ai, ne taute he tau agelu ke he lima he hulalo.
20 Ka ko e hulalo nakai ko e hulalo ia ke he tokotaha, ka e tokotaha ni e Atua.
21 Hanai, kua kau kehe kia e fakatufono mo e tau talahau he Atua? Aua ia. Ha ko e mena ane tuku mai e fakatufono kua maeke ke fakamomoui ai, po kua moli kua hoko mai e tututonu ke he fakatufono.
22 Ka e puipui he Tohi e tau tagata oti kana ke he hala, kia foaki mai kia lautolu kua tua e mena ne talahaua ke moua ke he tua kia Iesu Keriso.
23 Ka kua nakaila hoko mai e tua, ne taofi ai a tautolu he pule he fakatufono, mo e puipui ato fakakite mai e tua nakaila hoko mai.
24 Haia ni, kua eke e fakatufono mo leveki tama ha tautolu, ke takitaki a tautolu kia Keriso, kia talahaua tututonu ai a tautolu ke he tua.
25 Ka kua hoko mai tuai e tua, ti nakai tuai pule e leveki tama kia tautolu;
26 Ha ko e tau tama he Atua a mutolu oti kana ke he tua kia Keriso Iesu.
27 Ha ko mutolu oti ne papatiso ai kia Keriso, ne tapulu ai a mutolu kia Keriso;
28 Nakai ha i ai e tagata Iutaia, po ke Heleni; nakai ha i ai e tupa, po ke toka noa; nakai ha i ai e tane, po ke fifine; ha ko e mena taha maka ni a mutolu oti ha ha ia Keriso Iesu.
29 Kaeke foki ko e ha Keriso a mutolu, ti ko e moli, ko e fanau a Aperahamo a mutolu, mo e tau hakeaga foki kua lata mo e mena ne talahaua.