Kalatia 6:1-18
6 KO e tau matakainaga na e, kaeke ke moua he tagata he taha holifono ko mutolu kua mahani fakalata ke he Agaga, kia liuaki mai e mutolu a ia kua pihia mo e loto he mahani molu, kia fakaeneene a koe neke kamatamata foki a koe.
2 Kia fetogiaki a mutolu ke he ha mutolu a tau kavega ke fua, mo e fakamoli pihia e fakatufono a Keriso.
3 Ha ko e mena kaeke kua manatu e taha, ko ia ko e tagata ha ha i ai e mena, ka kua noa maka ni, kua fakavai e ia a ia ke he hana manatu.
4 Ka kia igatia mo e fakamoli hana ni a gahua, ti ha ha ia ia e mena ke hula ki ai a ia ni, ka e nakai ha he taha.
5 Ha ko e mena to igatia e tagata mo e fua hana ni a kavega.
6 Ka ko ia kua ako e kupu, kia tufatufa atu e ia e tau mena mitaki oti kia ia kua fakaako mai.
7 Aua neke fakahehe ai a mutolu, kua nakai fakavai e taha e Atua; ha ko e mena kua gana he tagata, ko e mena ia ni ke helehele mai ai e ia;
8 Ha ko ia kua gana e tau mena ke lata mo e hana ni a tino, to helehele mai ai e ia ke he tino e mena ke popo; ka ko ia kua gana e tau mena ke lata mo e Agaga, to helehele mai ai e ia ke he Agaga e moui tukulagi.
9 Aua neke fakalolelole a tautolu ke he mahani mitaki; ha ko e mena to helehele mai e tautolu ke he vaha ke lata ai, kaeke kua nakai fakalolelole a tautolu.
10 Hanai, kia mahani mitaki a tautolu fakalata ke he tau aho ha i ai ia tautolu, ke he tau tagata oti kana, ka e au atu ke he faoa ne tua.
11 Kitiala, ko e tau mata tohi lalahi kua tohi atu ai au kia mutolu ke he haku a lima.
12 Ko lautolu, oti kua fia talahaua mitaki he tau tagata, ko lautolu ia kua fakamakamaka ke peritome a mutolu, ko e mena hokoia ne pihia ai neke hoko kia lautolu e favale ha ko e satauro a Keriso.
13 Ha ko lautolu foki kua peritome kua nakai omaoma a lautolu ke he fakatufono; ka e loto na lautolu ke peritome a mutolu kia hula a lautolu ke he tau tino ha mutolu.
14 Ka ko au, aua neke hula au ke he taha mena, ka ko e satauro hokoia he Iki ha tautolu, ko Iesu Keriso, ko ia kua fakasatauro ai e lalolagi kia au, ko au foki ke he lalolagi.
15 Ha ko e mena nakai aoga e peritome, po ke nakai peritome kia lautolu ha ha ia Keriso Iesu, ka ko e tagata fakafou kua aoga ai.
16 Ko lautolu oti foki kua o fano fakalata ke he katofia nai, kia ha ha i ai ia lautolu e monuina mo e fakaalofa, kia ha i ai foki kia Isaraela he Atua.
17 Kua kamata ke he vaha nai, aua neke fakalavelave e taha kia au, ha kua uta fano e au e tau fakamailoga he Iki ko Iesu ke he hoku tino.
18 Ko e tau matakainaga na e, kia ha ha he tau agaga ha mutolu e fakaalofa noa he Iki ha tautolu ko Iesu Keriso. Amene.