Kenese 1:1-31
1 NE eke he Atua e lagi mo e lalolagi ke he kamataaga.
2 Na toka noa e lalolagi mo e teao, na ufiufi foki e moana he pouli; ne gahuahua foki e Agaga he Atua ki luga he fuga vai.
3 Ne pehe mai e Atua, Kia maama; ti maama ai ni.
4 Ti kitekite e Atua ke he maama, kua mitaki; ti vevehe ai he Atua e maama mo e pouli.
5 Ti ui he Atua e maama, Ko e aho; ka e ui e ia e pouli, Ko e po. Ko e afiafi mo e pogipogi ko e aho fakamua haia.
6 Ne pehe mai e Atua, Kia ha he vaha he tau vai e lagi likoliko, ke eke mo veveheaga he falu a vai mo e falu a vai.
7 Ne eke he Atua e lagi likoliko, kua vevehe aki e tau vai i lalo he lagi likoliko mo e tau vai i luga he lagi likoliko; ti pihia ni.
8 Ti ui he Atua e lagi likoliko, Ko e lagi. Ko e afiafi mo e pogipogi ko e aho ua haia.
9 Ne pehe mai e Atua, Kia fakapotopoto ke he mena taha e tau vai i lalo he lagi, kia kitia foki e mena momo; ti pihia ni.
10 Ti ui he Atua e mena momo, Ko e kelekele; ka e ui e ia e fakapotopotoaga he tau vai, Ko e tahi; ti kitekite e Atua ki ai kua mitaki.
11 Ne pehe mai e Atua, Kia tupu mai he kelekele e tau lau kou, mo e akau tote ke tupu mo e hana fua, mo e akau fua ke kai ke fua mai takitaha mo e hana fua, ha ia ia ni hana tega ke he lalolagi; ti pihia ni.
12 Ti tupu mai he kelekele e tau lau kou, ko e akau tote ke fua mai, takitaha mo e hana fua, mo e akau fua ke kai, ha ia ia ni hana tega, takitaha mo e hana fua; ti kitekite e Atua ki ai kua mitaki.
13 Ko e afiafi mo e pogipogi ko e aho tolu haia.
14 Ne pehe mai e Atua, Kia ha ha he vaha likoliko he lagi e tau mena ke fakamaama aki, ke katofia ai e aho mo e po; kia eke foki mo tau fakamailoga, mo tau vaha, mo tau aho, mo tau tau.
15 Kia eke foki mo tau mena ke fakamaama aki ke he vaha likoliko he lagi, ke fakamaama aki e lalolagi; ti pihia ni.
16 Ti eke ai he Atua e na maama lalahi ua; ko e maama lahi ke pule ke he aho, ka ko e maama tote ke pule ke he po; ne eke foki e ia e tau fetu.
17 Ne tuku ai he Atua ke he vaha likoliko he lagi, ke fakamaama aki e lalolagi;
18 Ke pule foki ke he aho mo e po, mo e katofia e maama mo e pouli; ti kitekite e Atua ki ai kua mitaki.
19 Ko e afiafi mo e pogipogi ko e aho fa haia.
20 Ne pehe mai e Atua, Kia pa loga mai he vai e tau mena momoui ke totolo; kia lele foki e tau manu lele ki luga he kelekele, ke he vaha likoliko he lagi.
21 Ne eke foki he Atua e tau tanimo lalahi, mo e tau mena momoui oti kua totolo, ne pa loga mai he vai, takitaha mo e hana kakano, mo e tau manu lele oti takitaha mo e hana kakano; ti kitekite e Atua ki ai kua mitaki.
22 Ti fakamonuina atu ai he Atua, kua pehe atu, Kia fanau ā mo e fakaloga, kia puke ai foki e tahi; kia fakaloga foki e tau manu lele ke he kelekele.
23 Ko e afiafi mo e pogipogi ko e aho lima haia.
24 Ne pehe mai e Atua, Kia tutupu mai e tau mena momoui mai he kelekele, takitaha mo e hana kakano, ko e tau manu huifa he kaina mo e tau mena totolo, mo e tau manu huifa he vao, takitaha mo e hana kakano; ti pihia ni.
25 Ne eke foki he Atua e tau manu huifa he vao, takitaha mo e hana kakano, mo e tau manu huifa he kaina, takitaha mo e hana kakano, katoa mo e tau mena oti kua totolo ke he kelekele, takitaha mo e hana kakano; ti kitekite e Atua ki ai kua mitaki.
26 Ti pehe age ai e Atua, Kia eke e tautolu e tagata ke he ha tautolu a fakatai, ke tuga a tautolu; kia pule foki a lautolu ke he tau ika he tahi, mo e tau manu lele he pulagi, mo e tau manu huifa, mo e kelekele oti kana, katoa mo e tau mena totolo oti kua totolo ke he kelekele.
27 Ti eke ai he Atua e tagata ke he hana fakatai, ko e fakatai he Atua ne eke ai e ia; ne eke e ia a laua ko e tane mo e fifine.
28 Kua fakamonuina foki he Atua a laua, mo e pehe atu e Atua kia laua, Kia fanau a mo e fakatokologa, kia fakapuke foki e lalolagi, mo e kautu ki ai; kia pule foki ke he tau ika he tahi, mo e tau manu lele he pulagi, katoa mo e tau mena momoui oti kua totolo ke he kelekele.
29 Ti pehe age e Atua, Kitiala, kua foaki atu e au kia mua e tau akau ikiiki oti kua tutupu mo e ha lautolu a tau fua ha he fuga kelekele oti kana, katoa mo e tau akau oti ha i ai e fua he akau kua tupu mo e hana tega; ma mua ni ke eke mo mena kai.
30 Ko e tau manu huifa oti foki he kelekele, mo e tau manu lele oti he pulagi, katoa mo e tau mena oti kua totolo ke he kelekele, ha ha i ai e moui, kua foaki atu e au ki ai e tau akau ikiiki oti lau mukamuka ke eke mo mena kai; ti pihia ni.
31 Ti kitekite e Atua ke he tau mena oti ne eke e ia, kitiala, kua mitaki lahi ni. Ko e afiafi mo e pogipogi ko e aho ono ia.