Kenese 12:1-20
12 NE pehe mai a Iehova kia Aperamo, kia toka e koe hau a kelekele, mo e hau a motu ne fanau ai, mo e faoa he hau a matua tane, ti fano ke he motu ke fakakite atu e au kia koe.
2 To eke foki e au a koe mo motu lahi, to fakamonuina e au a koe, to fakalilifu e au hau a higoa; to eke ni a koe mo monuina.
3 To fakamonuina e au a lautolu kua fakamonuina a koe, ka e fakamalaia e au a lautolu kua kaialu kia koe; to monuina foki ia koe e tau faoa oti ni he lalolagi.
4 Ti fano ai a Aperamo tuga ne tala age e Iehova kia ia; ne o foki a laua mo Lota; ne fina atu a Aperamo i Karana ke he tau hana ko e fitugofulu ma lima.
5 Ne uta foki e Aperamo a Sarai ko e hoana hana, mo Lota ko e tama he hana matakainaga, mo e koloa oti ha lautolu ne moua e lautolu, mo e tau tagata ne moua e lautolu i Karana; ti o ai a lautolu ke o ke he motu ko Kanana; ti hoko ni a lautolu ke he motu ko Kanana.
6 Ne fano leva foki a Aperamo he motu ia kua hoko ke he mena, ko Sikema, ke he aluna a Morē. Ha i ai e faoa Kanana ke he motu ke he vaha ia.
7 Ne fakakite a Iehova kia Aperamo, ti kua pehe mai a ia, To ta atu e au e motu nai mo e fanau hāu; ti ati e ia ke he mena ia e fatapoa kia Iehova, ne fakakite mai kia ia.
8 Ne toka foki e ia e mena ia, ti fina atu a ia ke he mouga he fahi uta a Peteli, ti fakatu ai hana fale ie; ko Peteli ha he fahi lalo hana, ka ko Ai ha he fahi uta; kua ati foki e ia ke he mena ia e fatapoa kia Iehova, mo e ui atu ai ke he higoa a Iehova.
9 Kua fano a Aperamo, ti fano ni, ka e hagao mau atu ki toga.
10 Ha i ai foki e hoge ke he motu ia, ti hifo ai a Aperamo ki Aikupito ke api ai, ha kua lahi ni e hoge ke he motu.
11 Kua hoko ke he magaaho kua tata tuai ki Aikupito, ti pehe atu ai a ia ke he hana hoana ko Sarai, Kitiala, kua iloa ni e au ko e fifine mata mitaki a koe;
12 Hanai, ka kitia he tau tagata Aikupito a koe, ti pehe ai a lautolu, Ko e hana hoana hanā; ti keli ai e lautolu au, ka e fakamoui a koe.
13 Kia tala age e koe ko e haku a mahakitaga a koe; kia mitaki ai au ha ko koe ni; to moui foki au ha ko koe ni.
14 Kua hoko ni a Aperamo ki Aikupito, ti kitekite ai e tau tagata Aikupito ke he fifine kua mitaki lahi ni a ia.
15 Ne kitia foki he tau tui a Farao a ia; ne nava foki a lautolu kia ia kia Farao, ti uta ai e fifine ke he fale a Farao.
16 Ti mahani mitaki a ia kia Aperamo ha ko ia, ha ha ia ia foki e tau mamoe, mo e tau povi, mo e tau asini tane, mo e tau fekafekau tane, mo e tau fekafekau fifine, mo e tau asini fifine, mo e tau kamela.
17 Ne fakahoko atu foki e Iehova kia Farao mo e hana magafaoa e tau malaia lalahi, ha ko Sarai ko e hoana a Aperamo.
18 Ti ahi atu e Farao a Aperamo kua pehe atu a ia, Heinoa e mena nai kua eke e koe kia au? Ko e heigoa e mena nakai tala mai ai a koe kia au ko e hoana hāu a ia?
19 Ko e heigoa e mena ne pehe mai ai a koe, Ko e haku a mahakitaga a ia? Ti uta ai e au a ia māku ke eke mo hoana; ko e hanai, kitiala, ko e hoana hāu hanā, kia uta a ia ti fano.
20 Ti poaki atu e Farao hana tau tagata kia ia, ti fakafano atu e lautolu a ia, mo e hana hoana, katoa mo e hana tau mena oti.