Kenese 13:1-18
13 NE hake a Aperamo i Aikupito, ko ia mo e hana hoana, mo e hana tau mena oti, ko Lota foki ne fakalataha mo ia, ti o a lautolu ki toga.
2 Ne maukoloa lahi a Aperamo ke he tau manu, mo e tau ario, mo e tau auro.
3 Ne fano foki a ia he hana fenoga mai he fahi toga kua hoko ki Peteli, ke he mena ne tu ai fakamua hana fale ie, ke he vaha loto a Peteli mo Ai;
4 Ko e mena foki ne toka ai e fatapoa ne eke fakamua ai e ia; kua ui atu foki a ia ke he higoa a Iehova ke he mena ia.
5 Ko Lota foki, ne o a laua mo Aperamo, ha ia ia ni e tau mamoe, mo e tau povi, mo e tau fale ie.
6 Kua nakai maeke ni he kelekele ke nonofo fakalataha ai a laua, ha kua loga lahi ha laua a tau mena, kua nakai maeke ai he nonofo fakalataha ai a laua.
7 Ne taufetoko foki e tau leveki manu a Aperamo mo e tau leveki manu a Lota; kua nonofo foki e faoa Kanana, mo e faoa Perisi ke he motu ke he vaha ia.
8 Ti pehe atu ai a Aperamo kia Lota, Aua neke tupu ha taufetoko ia taua, po ke tau leveki manu ha taua; ha ko e matakainaga ni a taua.
9 Nakai kia ha i mua hāu e kelekele oti? Kia mavehe kehe a koe ia au. Kaeke ke fano a koe ke he fahi hema, ti fano ai au ke he fahi matau; kaeke ke fano a koe ke he fahi matau, ti fano ai au ke he fahi hema.
10 Kua kitekite e Lota, ti kitia ai e ia e kelekele tatai oti ha i ai a Ioritana, kue kelekele mitaki oti kua hoko ki Soara, tuga ne kaina a Iehova, tuga foki e kelekele a Aikupito, ka e nakai la fakaoti e Iehova a Sotoma mo Komora.
11 Ti fifili ai e Lota māna e kelekele tatai oti ha i ai a Ioritana; kua fenoga atu a Lota ki uta; kua mavehe kehekehe ai a laua tokoua.
12 Ne nofo a Aperamo ke he motu ko Kanana, ka e nofo a Lota ke he tau māga he kelekele tatai, kua fakatu tolomaki atu e fale ie, ato hoko ki Sotoma.
13 Ka ko e tau tagata Sotoma kua mahani kelea a lautolu, mo e hala lahi ni ki mua a Iehova,
14 Kua mole tuai e mavehe ha laua mo Lota, ti pehe atu ai a Iehova kia Aperamo, Haga atu hāu a tau mata mo e kitekite atu he mena nā ne nofo ai a koe, ki tokelau mo toga, ki uta mo lalo;
15 Ha ko e kelekele oti ni kua kitekite ki ai a koe, to foaki atu ai e au kia koe, mo e fanau hau tukulagi.
16 To eke foki e au hau a fanau ke tuga e efuefu he kelekele; kaeke ke maeke ke he taha tagata ke totou e tau efuefu, ti maeke foki ke totou hau a fanau.
17 Kia tu a koe mo e faifano ke he motu ke he hana a loa, mo e hana a laulahi; ha ko e mena foaki atu ai e au kia koe.
18 Ti uta ai e Aperamo e fale ie, kua fina atu, ti nofo ke he aluna a Mamere, ha i Heperona ia, ne ati ai foki e ia e fatapoa kia Iehova.