Kenese 14:1-24
14 KO e vaha ia Amarafilo e patuiki a Sinara, mo Arioka e patuiki a Alasara, mo Kitalaoma e patuiki a Elama, mo Titalu e patuiki he tau motu,
2 Ne tau a lautolu kia Pira ko e patuiki a Sotoma, mo Piresa e patuiki a Komora, mo Sinapo e patuiki a Atama, mo Simapora e patuiki a Sipoima, katoa mo e patuiki a Perā ko Soara haia.
3 Kua fakalataha a lautolu oti nai ke he pahua a Sitima, ko ia ne toka ai e tahi kona.
4 Hogofulu ma ua e tau ne fakatokolalo ai a lautolu kia Kitalaoma, ka ko e tau ne hogofulu ma tolu aki ne fakafualoto ai a lautolu kia ia.
5 Ko e tau foki ne hogofulu ma fa aki kua o mai ai a Kitalaoma, mo e tau patuiki ne fakalataha mo ia, ti keli e lautolu e tau tagata Rafā i Aserota Karenaima, mo e tau tagata Susima i Hamo, mo e tau tagata Emema i Save Kiriataima,
6 Mo e tau tagata Hori ke he mouga ha lautolu ko Seira, kua hoko atu ki Eleparana, kua tata ia ke he tutakale.
7 Kua liliu mai foki a lautolu, kua hoko ki Enemisipata, ko Katesa haia, ti keli e lautolu e motu oti he tau tagata Amaleka, katoa mo e tau tagata Amori ne nonofo i Hasisotamara.
8 Ti o atu e patuiki a Sotoma, mo e patuiki a Komora, mo e patuiki a Atama, mo e patuiki a Sipoima, mo e patuiki a Perā, ko Soara ia; ti tau ai a lautolu ke he pahua a Sitima kia lautolu nai,
9 Ko Kitalaoma e patuiki a Elama, mo Titalu e patuiki he tau motu, mo Amarafilo e patuiki a Sinara, mo Arioka e patuiki a Alasara; ko e tau patuiki nā ne tokofa, ne tau mo e tau patuiki ne tokolima.
10 Ne toka ai foki ke he pahua a Sitima e tau luo hemeri loga ni; ne fehola foki e patuiki a Sotoma, mo e patuiki a Komora; ti veveli ai a lautolu ke he mena ia; ko lautolu foki ne toe, ne fehola a lautolu ke he tau mouga.
11 Ti uta ai e lautolu e tau koloa oti a Sotoma mo Komora, katoa mo e tau mena kai oti ni ha lautolu, ti o ai a lautolu.
12 Kua uta foki e lautolu a Lota ko e tama he matakainaga a Aperamo, katoa mo e hana koloa, ne nofo a ia i Sotoma, ti o ai na lautolu.
13 Ne fina age foki taha ne hola mo e tala age kia Aperamo e Heperu; ha ne nofo a ia ke he aluna a Mamere ko e tagata Amori, ko e matakainaga a Esekolo, ko e matakainaga foki a Aneri; ne pulega fakalataha a lautolu mo Aperamo.
14 Ne logona e Aperamo kua fofo tuai hana matakainaga, ti taute ai e ia hana tau tagata fakaako, ko lautolu ne fanau ke he hana kaina, ne tokotolu e teau ti tokohogofulu ma valu, ti tutuli a lautolu ato hoko ki Tano.
15 Kua vevehe e ia e kau he hana tau fekafekau ke he po ke tau kia lautolu, ti keli a lautolu, mo e tutuli a lautolu ato hoko ki Hopa, ha he fahi hema a Tamaseko.
16 Kua liuaki mai foki e ia e tau koloa oti; ko Lota foki hana matakainaga, mo e hana koloa, kua liuaki mai ia, ko e tau fifine foki katoa mo e moto tagata.
17 Ne fano foki e patuiki a Sotoma ke fonofono a ia, ke he pahua a Savē, ko e pahua haia he patuiki, ka kua liu mai tuai a ia he keliaga a Kitalaoma, mo e tau patuiki ne kau fakalataha mo ia.
18 Ko Mekisateko foki ko e patuiki a Salema, ne uta e ia e areto mo e uaina; ko e ekepoa foki a ia he Atua mua ue atu.
19 Ti fakamonuina e ia a ia, kua pehe atu, Kia monuina a Aperamo ke he Atua mua ue atu, hana ni e lagi mo e lalolagi;
20 Kia fakaaueina e Atua mua ue atu ko ia ne tuku mai hau a tau fi ke he hau a tau lima. Ti age e Aperamo kia ia e tau mena ne hogofulu aki e tau mena oti.
21 Ne pehe mai e patuiki a Sotoma kia Aperamo, Tuku mai kia au e tau tagata, ka e uta māu e koloa.
22 Ti pehe atu a Aperamo ke he patuiki a Sotoma, Kua nikiti tuai haku a lima kia Iehova ko e Atua mua ue atu, hana e lagi mo e lalolagi,
23 Nakai fakai ke eke e au taha filo po ke taha pipi afialoalohui ti nakai uta e au ha mena taha he hau a tau mena oti, neke pehe a koe, Ko au ne maukoloa ai a Aperamo.
24 Ko e tau mena hokoia kua kai he tau fuata, mo e veveheaga koloa he tau tagata ne o fakalataha mo au, ko Aneri, mo Esekolo, mo Mamere, kia uta e lautolu ha lautolu a veveheaga koloa.