Kenese 15:1-21
15 KUA mole e tau mena ia, ti hoko mai ai e kupu a Iehova kia Aperamo ke he fakakiteaga, kua pehe mai, Aperamo na e, ua matakutaku a koe; ha ko au nai ko e hau a akau punuti ia, mo e taui hau kua lahi ue atu.
2 Ti pehe atu a Aperamo, Ko e Iki na e, Iehova, ko e heigoa taha mena ke foaki mai e koe kia au, ko au foki kua nakai fai tama au, ko e fekafekau pule ke he haku a kaina ko Elisara ia ko e tagata Tamaseko?
3 Kua pehe atu foki a Aperamo, Kitiala, kua nakai foaki mai e koe ha fanau kia au; kitiala, to eke mo hakega haku e tagata ne fanau ke he haku kaina.
4 Kitiala, ko e kupu a Iehova kia ia kua pehe mai, Nakai eke e ia mo hakega hau, ka ko e taha ke fanau mai ni e koe to eke a ia mo hakega hau.
5 Kua takitaki e ia a ia ki fafo, mo e pehe mai, Kitekite hake a koe ke he lagi, mo e totou e koe e tau fetu, po ke ne maeke ia koe ke totou ai; ti pehe mai kia ia, To pihia ni hau a fanau.
6 Ne tua foki a ia kia Iehova; ti talahaua tututonu ai a ia.
7 Kua pehe mai foki a ia kia ia, ko au ko Iehova ne takitaki mai a koe i Uro i Kaletaia kia foaki atu ai e au e motu nai kia koe ke eke e koe māu.
8 Ti pehe atu a ia, Ko e Iki na e, Iehova, Ko heigoa taha mena ke iloa ai e au, to eke ni māku e motu nai?
9 Ti pehe mai a ia kia ia, Ta mai a kia au e povi fifine tau tolu, mo e koti fifine tau tolu, mo e mamoe tane tau tolu, mo e kulukulu, mo e punua lupe.
10 Ti uta ai e ia e tau mena oti ia, ti ihi ai e ia ke he lotoga, ti tuku fakafehagai, takitaha e fāhi mo e hana hoa; ka ko e tau manu lele nakai ihi ai e ia.
11 Kua lele hifo e tau manu lele favale ke he tau tino he tau manu, ti vega ai e Aperamo a lautolu.
12 Ko e to ne fai e la ti mohepopo ai a Aperamo; kitiala, ne hoko kia ia e vivivivi he pouli lahi ue atu.
13 Ti pehe mai ai a ia kia Aperamo, Kia iloa mitaki ni e koe to paea hau a fanau ke he motu kehe, to fekafekau foki a lautolu kia lautolu; to fakamamahi foki e lautolu a lautolu ke he tau tau fa ni e teau;
14 Ko e motu foki ke fekafekau a lautolu ki ai, to fakahala ni e au; ka mole ia ti o mai ai a lautolu mo e koloa lahi.
15 Ka ko koe to fina atu a koe ke he hau a tau matua mo e mafola, to tanu ni a koe ke he vaha motua lahi.
16 Ka hoko ke he hau ne fa aki ti liliu mai ai a lautolu ki hinei; ha kua nakai la katoatoa e tau hala he tau tagata Amori.
17 Kua to tuai e la, ti kua pouli kiki, kitiala, ko e gutuumu ahua, mo e lamepa puho kua fano ke he vaha he tau mena ia ne ihi.
18 Ko e aho ia ni ne eke ai e Iehova e maveheaga mo Aperamo, mo e pehe mai, Kua foaki tuai e au e kelekele nai ke he hāu a fanau, kua kamata ke he vai lele a Aikupito, ti hoko ke he vai lele lahi, ko e vai lele ko Eufirate haia.
19 Ko e faoa Keni, mo e faoa Kinasi, mo e faoa Katemoni,
20 Mo e faoa Heti, mo e faoa Perisi, mo e faoa Refa,
21 Mo e faoa Amori, mo e faoa Kanana, mo e faoa Kirekasi, mo e faoa Iepusi.