Kenese 17:1-27
17 KUA hoko a Aperamo ke he tau hivagofulu ma hiva hana, ti fakakite mai ai a Iehova kia Aperamo, kua pehe mai kia ia, Ko au ni ko e Atua mana; kia faifano a koe ki mua haku, mo e mahani hakohako a koe.
2 Kua eke e au e maveheaga ha taua mo koe, to fakatokologa ue atu e au hāu a fanau.
3 Ti fakaveli fakafohifo ai a Aperamo, ti vagahau mai e Atua kia ia, kua pehe mai,
4 Ko au nai, kitiala, ha ha ia koe haku a maveheaga, to eke ni a koe mo tupuna he tau motu loga.
5 Ti nakai tuai ui e higoa hau ko Aperamo, ka e higoa a koe ko Aperahamo, ha ko e mena eke ni e au a koe mo tupuna he tau motu loga.
6 To fakatupu fakatokologa ue atu e au hau a fanau, to eke e au a koe mo tupuna he tau motu; to tupu mai foki ia koe e tau patuiki.
7 To fakamau e au haku a maveheaga kua eke mo koe, mo e hau a fanau foki, ke he tau hau ha lautolu, ka mole atu a koe, ke eke mo maveheaga tukulagi; to eke au mo Atua kia koe mo e hau a fanau ka mole atu a koe.
8 To foaki atu foki e au kia koe, mo e hau a fanau, ka mole atu a koe, e motu kua nofo paea ai a koe, ko e motu oti ko Kanana, ke eke ma mutolu tukulagi; to eke foki au mo Atua ha lautolu.
9 Na pehe foki e Atua kia Aperahamo, Ka ko koe, kia omaoma a koe ke he haku a maveheaga, ko koe, mo e fanau hāu, ke he tau hau ha lautolu, ka mole atu a koe.
10 Ko e haku a maveheaga hanai kua eke e au mo mutolu, katoa mo e fanau hau, ka mole atu a koe, ke omaoma ki ai a mutolu; Kia peritome e tau tane oti kana ia mutolu.
11 To peritome ai foki a mutolu ke he kili he tau kakano ha mutolu, to eke ia mo fakamailoga he maveheaga kua eke e au mo mutolu.
12 Ko ia ne po valu he fanau ia mutolu, kia peritome a ia, ko e tau tane oti he tau hau ha mutolu; ko ia ne fanau ke he kaina, mo ia ne fakafua mai he taha tagata kehe ke he tau tupe, nakai ko e hau a fanau ia.
13 Kia peritome ni a ia kua fanau ke he hau a kaina, mo ia kua fakafua ke he hau a tau tupe; ti ha i ai ke he ha mutolu a tau kakano haku a maveheaga ko e maveheaga tukulagi.
14 Ka ko e tane kua nakai peritome, ko ia kua nakai peritome ke he kili he hana kakano, to vevehe kehe e tagata ia mo e hana motu, ha kua holi tuai e ia haku a maveheaga.
15 Na pehe mai e Atua kia Aperahamo, Ko Sarai hau a hoana, nakai tuai ui hana higoa ko Sarai, ka ko Sara ko e hana higoa haia.
16 To fakamonuina foki e au a ia, to foaki atu foki e au kia koe e tama tane, mai ia ia; to fakamonuina ni e au a ia to eke a ia mo tupuna he tau motu; to tupu mai foki ia ia e tau patuiki he tau motu.
17 Ti veli fakafohifo ai a Aperahamo, mo e kata, ti pehe hifo a ia ke he hana loto, To fanau kia ha tama ke he tagata kua teau hana tau tau? Ko Sara foki, to fanau kia e ia ka kua hivagofulu hana tau tau?
18 Ti pehe atu a Aperahamo ke he Atua, Kua manako au kia moui ni a Isamaeli ki mua hāu.
19 Ti pehe mai e Atua, Ko e moli ni, to fanau hau a hoana ko Sara e tama tane māu, to ui foki e koe hana higoa ko Isaako; to fakamau foki e au haku a maveheaga mo ia, katoa mo e hana fanau ka mole atu a ia, ko e maveheaga tukulagi.
20 Pihia mo Isamaeli, kua fanogonogo ai au kia koe, kitiala, kua fakamonuina e au a ia, to fakatupu fakatokologa e au hana fanau, to fakatokologa lahi ni e au; to tokohogofulu ma ua e tau iki ke fanau mai e ia; to eke foki e au a ia mo tupuna he motu lahi.
21 Ka e fakamau ni e au haku a maveheaga mo Isaako; ko ia ke fanau mai e Sara kia koe ke he vaha pehenai ke he tau ka hau.
22 Ne fakahiku foki e ia ha laua a vagahau mo ia, ti haele hake e Atua ia Aperahamo.
23 Ti uta ai e Aperahamo hana tama ko Isamaeli, mo lautolu oti ne fanau ke he hana kaina, katoa mo lautolu oti kua fakafua ke he hana tau tupe; ko e tau tane oti kana ha ha he kaina a Aperahamo, ti peritome ai e ia e kili he tau kakano ha lautolu ke he aho ia ne vagahau mai ai e Atua kia ia.
24 Ko e tau ne hivagofulu ma hiva a Aperahamo, ne peritome ai a ia ke he kili he hana kakano.
25 Ko e tau foki ne hogofulu ma tolu he hana tama ko Isamaeli, ne peritome ai a ia ke he kili he hana kakano.
26 Ko e aho taha ia ni ne peritome ai a Aperahamo, mo he hana tama ko Isamaeli;
27 Ko e tau tane oti foki he hana kaina, ko lautolu ne fanau ke he kaina, katoa mo lautolu ne fakafua mai he tagata kehe ke he tau tupe, ne peritome a lautolu fakalataha mo ia.