Kenese 19:1-38
19 NE o atu e tau agelu tokoua ki Sotoma ke he magaaho afiafi; ka e nofo ni a Lota ke he gutuhala a Sotoma; kua kitia atu e Lota ti matike mai a ia ke fonofono a laua; ti fakaveli fakafohifo ai a ia ke he kelekele;
2 Kua pehe atu foki a ia, Ko e tau iki na e, kitiala, kia afe mai a mua ke he fale he fekafekau ha mua, mo e mohe ai; kia holoholo foki ha mua a tau hui; to uhu o a pogipogi ke he fenoga ha mua. Ti pehe mai a laua, Nakai, to momohe a maua i fafo ni.
3 Ti fakamakamaka ni a ia kia laua; ti afe age ai a laua kia ia, mo e huhū atu ke he hana fale; ti taute ai e ia e tau mena kai ma laua, ne tunu foki e tau areto nakai fakaea, ti taumafa ai a laua.
4 Kua nakaila takoto a laua ti agaagai ai e fale ke he tau tagata he maga ia, ko e tau tagata ni a Sotoma ko e tau fuata katoa, mo e tau mo motua, ko e motu oti ni mai he tau fahi oti;
5 Ti ui ai a lautolu kia Lota, mo e pehe mai kia ia, Ko fe e tau tagata ia ne o mai kia koe ne afiafi? Ta mai lā a laua kia mautolu kia iloa ai e mautolu a laua.
6 Ti hu ai a Lota kia lautolu ki fafo he gutuhala, ti pa ni e gutuhala ki tua hana,
7 Mo e pehe atu a ia, Haku tau matakainaga na e, ua mahani kelea a mutolu.
8 Kitiala, ha ha ia au haku tau tamafine tokoua, kua nakaila iloa e laua ha tane; to ta mai e au a laua kia mutolu, to pule a mutolu kia laua; ka ko e na tagata ia, ua eke e mutolu ha mena kia laua, ha ko e mena ia ne o mai ai a laua ke he haku fale ke malu ai.
9 Ti pehe mai a lautolu. Fano kehe ā, kua pehe age foki a lautolu, Kua hau e tagata kehe na ke nofo ai, ti kua eke e ia a ia mo fakafili; ko e hanei, to mua ni e kelea he mena ke eke e mautolu kia koe ke he mena ka eke kia laua. Ti tautaomi fakalahi mai ni a lautolu ke he tagata ko Lota, mo e fakatata mai ni ke lilipi e pa gutuhala.
10 Ka ho e na tagata ia kua fakaolo atu ha laua a tau lima, mo e toho mai a Lota kia laua ke he fale, ti pa ai e gutuhala.
11 Ka ko e tau tagata ha he gutuhala he fale i fafo, kua fakamatapouli e laua a lautolu, ko e tau tama mo e tau momotua; ti oti e manava ha lautolu he kumi teao e gutuhala.
12 Na pehe mai foki e tau tagata ia kia Lota, Toe nakai taha he hāu a magafaoa hinei? ko e taha figona, mo e tau tama tane hau, mo e tau tama fifine hau, mo lautolu oti ha ha ia koe ke he maga nai, kia uta kehe a lautolu he mena nai;
13 Ha ko e moumou ne fai e maua e mena nai, ha kua lahi e tagi kua hake ia lautolu ki mua a Iehova, ti kua fakafano mai e Iehova a maua ke moumou ai.
14 Ti fano ai a Lota mo e vagahau age ke he hana tau figona kua fai hoana ke he tau tama fifine hana, kua pehe a , Kia matike ā, ke o kehe a tautolu he mena nai, ha ko e moumou ne fai e Iehova e maga nai. Ka e tuga ne tagata fefeua a ia ke he tau manatu he hana tau figona.
15 Kua matafatafa ata e aho ti fakalagalaga ai he tau agelu kia Lota ke fakaave, kua pehe mai, Matike ā, mo e uta hau a hoana, mo e hau a na tama fifine tokoua ha hinei, neke malaia a koe ke he hala he maga.
16 Kua fakamule a ia ti toto ai he na tagata ia hana lima, mo e lima he hana hoana, mo e lima he hana na tama fifine tokoua, ha kua ofania a ia e Iehova; kua takitaki atu foki e laua a ia mo e tuku atu a ia ki tua he māga.
17 Kua takitaki tuai e laua a lautolu ki tua he māga, ti pehe mai ai a ia, Kia hola a ke moui ai a koe, aua neke haga ki tua a koe, aua foki neke tu a koe ke he taha mena he kelekele tatai; ka kia hola leva ke he mouga neke malaia a koe.
18 Ti pehe atu a Lota kia laua, Ko e Iki na e, aua ia.
19 Kitiala, kua ofania e koe hau a fekafekau, kua fakalahi mai foki e koe hau a fakaalofa kua fakaalofa mai ai a koe kia au he fakamoui e koe au; nakai fahia au ke hola ke he mouga, neke moua au he taha mena kelea ti mate ai au.
20 Kitiala, ko e maga na kua tata mai, ke hola au ki ai; kua tote foki a ia; toka ai au ke hola ki ai, nakai kia ko e maga tote ia? ti moui ai au.
21 Ti pehe mai a ia kia ia, kitiala, kua talia foki e au hau a manako ke he mena ia, ti nakai moumou e au e maga ia ne tala mai e koe.
22 Ati fakaave ā ke hola a koe ki ai; ha kua nakai maeke ia au ke eke ha mena ato hoko a koe ki ai. Ko e mena ia ne ui ai e higoa he maga ko Soara.
23 Kua hake tuai e la ke he lalolagi he hoko atu a Lota ki Soara.
24 Ti fakato hifo poke uha e Iehova ki Sotoma mo Komora e taio mo e afi mai ia Iehova, mai he lagi;
25 Ti kua fakaoti e ia e tau maga ia, mo e kelekele tatai oti kana, mo lautolu oti ne nonofo ke he tau maga ia, katoa mo e tau mena ne tutupu mai he kelekele.
26 Ne haga ki tua e hoana hana ne mui atu kia ia, to faliu ai a ia mo pou masima.
27 Ne uhu fano a Aperahamo mogoho pogipogi ke he mena ne tu ai a ia ki mua a Iehova;
28 Ti kitekite atu a ia ki Sotoma mo Komora, mo e kelekele tatai oti; kua kitia atu, kitiala, kua hake e ahua he motu tuga ne ahua he gutuumu.
29 Kua hoko ke he aho ne moumou ai he Atua e tau maga he kelekele tatai, to manatu ai e Atua a Aperahamo, mo e fakafano kehe e ia a Lota mai he malaia, ha kua moumou e ia e tau maga ne nofo ai a ia.
30 Ti hake a Lota i Soara mo e nofo ke he mouga, fakalataha mo e hana tau tama fifine tokoua; ha kua matakutaku a ia ke nofo i Soara; ne nofo foki a ia ke he ana, ko ia mo e hana tau tama fifine tokoua.
31 Ti pehe atu e taokete ke he tehina, Kua motua tuai e matua tane ha taua, ti nakai fai tane ke he motu ke hau kia taua tuga ne mahani he lalolagi;
32 Kia fakainu e taua e matua tane ha taua ke he uaina, ti takoto ai a tautolu mo ia, kia tutupu mai ni ia taua e fanau mai he matua tane ha taua.
33 Ti fakainu e laua ha laua a matua tane ke he uaina ke he po ia ni, ti fina age ai e taokete kua takoto mo e hana matua tane; ti nakai iloa e ia e magaaho ne takoto ai a ia, po ke magaaho ne matike ai.
34 Kua hoko ke he pogipogi, ti pehe atu e taokete ke he tehina, Kitiala, ne takoto a maua mo e matua tane ha taua ne po; kia fakainu foki e taua a ia ke he uaina ke he po a magaaho, ti fina age a koe, takoto a mua mo ia, kia tutupu mai ni ia taua e fanau mai he matua tane ha taua.
35 Ti fakainu foki e laua ha laua a matua tane ke he uaina ke he po ia ni, ti tu mai e tehina kua takoto mo ia, ti nakai iloa e ia e magaaho ne takoto ai a ia, po ke magaaho ne matike ai.
36 Ti fatu ai e na tama fifine tokoua a Lota ke he matua tane ha laua ni.
37 Ne fanau e taokete e tama tane, mo e ui hana higoa ko Moapi; ko e tupuna a ia he tau tagata Moapi kua hoko mai ni ke he aho nai.
38 Ko e tehina foki ne fanau e ia e tama tane ti ui ai hana higoa ko Pename; ko e tupuna a ia he tau tagata Amoni kua hoko mai ni ke he aho nai.