Kenese 2:1-25
2 KUA oti kana he eke e lagi mo e lalolagi katoa mo e tau mena oti ha i ai.
2 Kua fakaoti he Atua ke he aho fitu hana gahua ne eke e ia; ko e aho fitu foki ne okioki ai a ia he hana tau gahua oti ne eke e ia.
3 Ti fakamonuina ai he Atua e aho fitu, mo e fakatapu ai; ha kua okioki ai a ia he hana tau gahua oti kana he Atua ne eke e ia.
4 Ko e tala hanai he lagi mo e lalolagi ke he ekeaga ke he aho ne eke ai e Iehova ko e Atua e lalolagi mo e lagi,
5 Mo e tau vao ikiiki oti kana he fonua ka e nakai la ha he kelekele, katoa mo e tau akau ikiiki oti he fonua ka e nakai la tutupu; ha kua nakai la fakato hifo e Iehova ko e Atua e uha ke he kelekele, ti nakai fai tagata foki ke gahua ke he fonua.
6 Ka kua hake e hahau he kelekele, kua fakamalu ai e fuga kelekele oti kana.
7 Ti eke ai e Iehova ko e Atua e tagata ke he efuefu he kelekele, ti fafagu ke he hana tau poko ihu e fafagu he moui; ti kua eke tuai a ia mo tagata moui.
8 Ne to foki e Iehova ko e Atua e kaina i Etena ke he fahi uta; ti tuku ai e ia e tagata ne eke e ia.
9 Ne fakatupu foki e Iehova ko e Atua ke he fonua e tau akau oti kua fulufuluola he kitekite, mo e mitaki ke kai; ko e akau he moui foki ke he vaha loto he kaina, mo e akau ke iloa ai e mitaki mo e kelea.
10 Ne lele atu foki e vailele mai Etena ke fakamalu aki e kaina, ti vevehe kehekehe ai, kua eke mo tau la ne fa.
11 Ko e higoa he taha ko Pisona ia; ko ia ne takai e motu oti ko Havila, ha i ai e auro;
12 Kua mitaki ni e auro he motu ia; ha i ai e petala mo e soama.
13 Ko e higoa foki he vailele ua ko Kihona ia; ko ia ne takai e motu oti ko Aitiope.
14 Ko e higoa foki he vailele tolu ko Hitekelu ia; ko ia ne lele ke he fahi uta a Asuria. Ko e vailele ko Eufirate haia.
15 Ne uta foki e Iehova ko e Atua e tagata, mo e tuku a ia ke he kaina ko Etena, ke gahua ai mo e leoleo ai.
16 Ne tala age foki e Iehova ko e Atua ke he tagata, kua pehe age, Ko e tau akau oti kana ha he kaina ke kai ai ni e koe.
17 Ka ko e akau ke iloa ai e mitaki mo e kelea, aua neke kai ai e koe; ha ko e aho ka kai ai e koe to mate ai ni a koe.
18 Ne pehe mai a Iehova ko e Atua, Kua nakai mitaki ke tokotaha e tagata; to eke e au māna e lagomatai ke lata mo ia.
19 Ne eke e Iehova ko e Atua ke he kelekele e tau manu huifa oti he kelekele, mo e tau manu lele oti he pulagi; ne ta mai e ia kia Atamu ke kitia po ke fakahigoa ha ha e ia; ko e higoa ne ui e Atamu ke he tau mena momoui oti ko e hana higoa haia.
20 Ti ui ai e Atamu e tau higoa he tau manu huifa oti he kaina, mo e tau manu lele he pulagi, katoa mo e tau manu huifa oti he vao; ka ko Atamu nakai moua ha lagomatai ke lata mo ia.
21 Ne fakapulumohea e Iehova ko e Atua a Atamu ti mohe ni a ia; ti uta ai e ia e taha hui kahokaho hana, ti fakakati e ia e kakano ke kukui aki.
22 Ko e hui kahokaho foki ne uta e Iehova ko e Atua ia Atamu ne eke aki e ia e fifine; ti ta mai ai e ia kia Atamu.
23 Ti pehe ai a Atamu, Ko e hui ni hanai he haku hui, mo e kakano he haku kakano; to ui a ia ko e fifine, ha ko e mena uta a ia mai he tane.
24 Ko e mena ia ke toka ai he tane hana matua tane mo e hana matua fifine, ka e pipiki ke he hana hoana; ti eke ai a laua mo tino taha.
25 Nakai felevehi ni a laua ko Atamu mo e hana hoana, ti nakai mā a laua.