Kenese 20:1-18
20 NE fano a Aperahamo he mena ia ke he motu ke he fahi toga, ti nofo ai a ia ke he vaha loto a Katesa mo Sura, kua nofo foki i Kira.
2 Na pehe atu foki a Aperahamo, ko e hana hoana ko Sara, ko e hana mahakitaga haia; ti fakafano atu e Apimeleko ko e patuiki a Kira mo e uta a Sara māna.
3 Kua haele mai e Atua kia Apimeleko ke he miti ke he po, mo e pehe mai kia ia, Kitiala, ko e mate ne fai a koe ha ko e fifine ne ta mai e koe, ha ko e hoana a ia he taha tagata.
4 Ka ko Apimeleko, nakai la fina age a ia kia ia; to pehe atu foki a ia, Ko e Iki na e, to keli kia e koe e motu tututonu?
5 Nakai kia pehe mai a ia kia au, Ko e haku a mahakitaga a ia? Ko e fifine foki, nakai kia pehe mai a ia, Ko e haku tugane a ia? Ko e manatu tonu he haku loto, ko e tau lima mea foki haku kua eke ai e au e mena nai.
6 Ti pehe mai e Atua kia ia ke he miti, Kua iloa ni e au, ko e manatu tonu he hau a loto kua eke ai e koe e mena nai, ha kua taofi ni e au a koe neke hala a koe ki mua haku; ko e mena foki ia nakai toka ai e au a koe ke hoko atu kia ia.
7 Ko e hanai, kia liuaki e koe e hoana he tagata, ha ko e perofeta ni a ia, to liogi foki a ia māu, ti moui ai a koe; kaeke ke nakai liuaki ni e koe, kia iloa e koe, to mate a koe, ko koe, katoa mo lautolu oti kana ha ha ia koe.
8 Ti uhu matike a Apimeleko ke he magaaho pogipogi, mo e ui age ke he hana tau fekafekau oti, ti tala age a ia kia lautolu e tau mena oti ia, ti matakutaku lahi ai e tau tagata ia.
9 Ti ui a Apimeleko kia Aperahamo mo e pehe age kia ai, Ko heigoa kia e mena nai kua eke e koe kia mautolu? Ko heigoa e mahani kelea haku kia koe he fakahoko mai ai e koe kia au mo e haku a kautu e hala lahi? Kua eke e koe kia au e tau mena kua nakai lata ke eke.
10 Kua pehe age foki a Apimeleko kia Aperahamo, Ko heigoa kia e mena ne kitia e koe ti eke ai e koe e tau mena nai?
11 Ti pehe age a Aperahamo, Ha kua pehe hifo au, Na kua nakai ha ha he motu nai e matakutaku ke he Atua; to keli ni e lautolu au ha ko e hoana haku.
12 Ka e moli foki, ko e haku a mahakitaga a ia, ko e tama fifine ni he haku a matua tane, ka e nakai ko e tama he haku a matua fifine; ti kua eke a ia mo hoana haku.
13 Kua hoko ke he vaha ne fakamavehe he Atua au mo e kaina he haku a matua tane, ti pehe age au kia ia, Ko e mena hanai ke fakaalofa mai ai a koe kia au, ko e tau mena oti ke o a taua ki ai, kia pehe a koe, Ko e haku a tugane a ia.
14 Ti uta ai e Apimeleko e tau mamoe, mo e tau povi, mo e tau fekafekau tane, mo e tau fekafekau fifine, kia foaki age ai kia Aperahamo; ne liuaki foki e ia kia ia hana hoana ko Sara.
15 Kua pehe age foki a Apimeleko kia ia. Kitiala, ha i mua hau haku a kelekele, ko e mena ne mitaki kia koe, kia nofo ai a koe.
16 Kua pehe mai foki a ia kia Sara, Kitiala, kua foaki e au ke he tugane hau e tau tupe ario taha e afe; kitiala, kua eke a ia mo ufiufi mata māu ki mua ha lautolu oti ha ha ia koe, katoa mo e tau tagata oti; kua akonaki pihia ai a ia.
17 Ti liogi ai Aperahamo ke he Atua; ti fakamalolo ai he Atua a Apimeleko, mo e hana hoana, mo e hana tau fekafekau fifine; ti fai tama foki a lautolu;
18 Ha kua fakamau makamakafua e Iehova e tau manava oti he tau fifine he magafaoa a Apimeleko, ha ko Sara e hoana a Aperahamo.