Kenese 21:1-34
21 NE ahi e Iehova a Sara tuga ne talahau e ia; ne fakahoko foki e Iehova kia Sara tuga ne talahau mai e ia.
2 Ha kua fatu ni a Sara, ti fanau e ia e tama tane ma Aperahamo, ka kua motua tuai a ia, ke he vaha ia ni ne talahau ai he Atua kia ia.
3 Ne ui foki e Aperahamo e higoa he hana tama kua fanau mai kia ia, ko Isaako.
4 Ne peritome e Aperahamo hana tama ko Isaako ke he po valu hana, tuga ne poaki he Atua kia ia.
5 Taha ni e teau e tau tau a Aperahamo, ti fanau ai hana tama ko Isaako.
6 Na pehe age foki a Sara, Kua fakakata he Atua au; ko lautolu oti foki ka logona, to kata fakalataha a lautolu mo au.
7 Kua pehe foki a ia, Na maeke ia hai ke tala age kia Aperahamo, to fakahuhu tama e Sara; ha kua fanau e au e tama māna ka kua motua tuai a ia.
8 Kua tupu e tama, kua tapani foki a ia; ne eke foki e Aperahamo e galue lahi ke he vaha ne tapani ai a Isaako.
9 Ti kitia ai e Sara e tama a Hakara e fifine Aikupito, ne fanau e ia kia Aperahamo ha ne fefeua mai.
10 Ti pehe atu ai a ia kia Aperahamo, Ati vega la e fifine fakatupa na, katoa mo e hana tama; ha ko e mena nakai hakega fakalataha e tama he fifine fakatupa na, mo e tama haku, ko Isaako haia.
11 Ne mamahi lahi e loto a Aperahamo he mena ia, ha ko e tama hana.
12 Ti pehe mai e Atua kia Aperahamo, Aua neke mamahi hau a loto ha ko e tama, mo e hau a fifine fakatupa; ko e tau mena oti ne tala atu e Sara kia koe, kia fanogonogo ai a koe ke he hana tau kupu, ha ko e mena ui ai hau a fanau ia Isaako.
13 Ko e tama foki he fifine fakatupa, to eke e au a ia mo tupuna he taha motu, ha ko e fanau hau a ia.
14 Ti uhu matike a Aperahamo ke he magaaho pogipogi, kua uta e mena kai, mo e vai kili manu kua utu, mo e age kia Hakara mo e fakatoka ke he hana ua, kua age foki kia ia e tama, ti fakafano kehe a ia; ti fano ai a ia mo e hehe fano ni ke he tutakale, ko Pere-sepa.
15 Kua maha e vai kili manu, ti tuku atu ai e ia e tama ki lalo he taha akau tote.
16 Ka kua fano a ia mo e nofo fakamamao mai, tuga ne mena ke to ki ai e fana ka fana atu, ha kua pehe hifo a ia, Aua neke kitia e au e mateaga he tama. Kua nofo mai foki a ia, mo e tagi fakaleolahi.
17 Ne fanogonogo mai foki e Atua ke he leo he tama; ti ui mai ai he lagi e agelu he Atua kia Hakara, kua pehe mai kia ia, Hakara na e, fefe a koe? ua matakutaku ha kua fanogonogo e Atua ke he leo he tama he mena ha i ai a ia.
18 Kia matike a, mo e lagaaki e tama, ti toto e koe a ia ke he hau a lima, ha ko e mena eke ni e au a ia mo tupuna he motu lahi.
19 Ti fakaala he Atua hana tau mata, ti kitia ai e ia e vai keli: ti fano ai a ia mo e utu e vai kili manu ke he vai, mo e fakainu aki e tama.
20 Ha i ai foki e Atua ke he tama; ne tupu foki a ia, kua nofo a ia ke he tutakale, kua eke a ia mo tagata fana manu.
21 Ne nofo foki a ia ke he tutakale a Parana; ne uta foki hana matua fifine e hoana māna mai he motu ko Aikupito.
22 Ko e vaha ia ne vagahau mai ai a Apimeleko mo Fikolo ko e iki he hana tau kau, kia Aperahamo, kua pehe mai, Ha ha ia koe e Atua ke he tau mena oti ne eke e koe;
23 Hanai, kia omonuo a koe kia au ke he mena nai ki mua he Atua, ke nakai fakavai e koe au, po ke haku tama, po ke fanau he haku tama; ka e tuga haku a fakaalofa kia koe, kia pihia mai a koe kia au, katoa mo e motu ne nofo paea ai a koe.
24 Ti pehe atu a Aperahamo, Kua omonuo ni au.
25 Ne akonaki foki e Aperahamo a Apimeleko ha ko e vai keli, ne fofo he tau fekafekau a Apimeleko.
26 Ti pehe mai a Apimeleko, Nakai iloa e au po ko hai ne eke e mena ia; ti nakai talahau mai e koe kia au, ko au foki, ko e logona la nai e au ke he aho nai.
27 Ti uta ai e Aperahamo e tau mamoe mo e tau povi mo e foaki atu kia Apimeleko; ti eke ai e laua tokoua e maveheaga.
28 Ne toka kehe e Aperahamo e tau punua mamoe fifine ne fitu.
29 Ti pehe mai ai a Apimeleko kia Aperahamo, Mo ha e tau punua mamoe nā ne fitu kua toka kehe e koe?
30 Ti pehe atu a Aperahamo Ko e tau punua mamoe fifine nai ne fitu, kia uta e koe ia au māu, ke eke mo fakamailoga kia au, ko au ni ne keli e vai keli nai.
31 Ko e mena ia ne ui ai e ia e mena ia ko Pere-sepa, ha kua omonuo ai a laua tokoua.
32 Kua eke ni e laua e maveheaga i Peresepa; ti tu ai a Apimeleko, mo Fikolo e iki he hana tau kau, ti liliu atu na laua ke he motu he tau tagata Filisitia.
33 Ne to foki e Aperahamo e ulu akau i Pere-sepa, mo e ui atu ai ke he higoa a Iehova, ko e Atua tukulagi.
34 Po loga foki ne api ai a Aperahamo ke he motu he tau tagata Filisitia.