Kenese 22:1-24
22 KUA mole e tau mena ia, ti kamatamata ai he Atua a Aperahamo, kua pehe mai a ia, Aperahamo na e; ti pehe atu ai a ia, Ko au hanai.
2 Ti pehe mai a ia, Kia uta e koe hau a tama, hau a tama fuataha, ko ia ne ofania e koe, ko Isaako, mo e fano a koe ke he motu ko Moria; ti ta atu e koe a ia mo poa huhunu ke he mena ia, ke he taha mouga ka tala atu e au kia koe.
3 Ti uhu matike a Aperahamo ke he magaaho pogipogi, mo e fakanofoa hana asini; ne uta foki e ia fakalataha mo ia tokoua e fuata hana, mo Isaako ni hana tama; ne tipi foki e fala gaafi ke eke aki e poa huhunu, ti tu mai a ia mo e fano ke he mena ne tala atu ai e Atua kia ia.
4 Kua hoko ke he aho tolu, kua haga atu ai e Aperahamo, ti kitia ai e ia e mena ka e mamao.
5 Ti pehe atu a Aperahamo ke he hana tau fuata, Nonofo a mua mo e asini ke he mena nai, ka ko au mo e tama, to o a maua ke he mena kō ke tapuaki ai, to liliu mai a maua kia mua.
6 Ne uta foki e Aperahamo e gaafi ke eke aki e poa huhunu, ti fakatoka kia Isaako hana tama, ti uta e ia ke he hana lima e afi mo e titipi; ti o ai fakalataha a laua tokoua.
7 Ti vagahau atu a Isaako kia Aperahamo hana matua tane kua pehe atu, Haku matua na e, ti pehe mai a ia, Ma mea, ko au hanai, ti pehe atu a ia, Kitiala, ko e afi mo e gaafi; ka ko fe e punua mamoe mo poa huhunu?
8 Ti pehe mai a Aperahamo, Ma mea, to ta mai he Atua māna e punua mamoe mo poa huhunu; ti o ai fakalataha a laua tokoua.
9 Ne hohoko foki a laua ke he mena ne tala age ai e Atua kia ia, to ati ai e Aperahamo e fatapoa, mo e fakaafu e tau gaafi; kua lili foki e ia hana tama ko Isaako, mo e fakatoka a ia ke he fatapoa ki luga he tau gaafi.
10 Ti fakaolo atu e Aperahamo hana lima, mo e toto e titipi ke keli aki hana tama.
11 Ti ui mai ai kia ia e agelu a Iehova mai he lagi, kua pehe mai, Aperahamo na e, Aperahamo na e; ti pehe atu a ia, Ko au hanai.
12 Ti pehe mai a ia, Tokai, neke hoko hāu a lima ke he tama, aua foki neke eke e koe ha mena kia ia; ha kua iloa tuai e au kua matakutaku a koe ke he Atua, ha kua nakai lamakai a koe he tama hau, ko e hau a tama tokotaha, ka e tuku mai ni e koe a ia kia au.
13 Kua haga atu a Aperahamo, ti kitia ai e ia, kitiala, ko e mamoe tane ki tua hana kua helea hana tau hoe ke he vao vihi; ti fano ai Aperahamo mo e ta mai e mamoe tane, kua eke ai e poa huhunu ke hukui aki hana tama.
14 Ti fakahigoa ai e Aperahamo e mena ia ko Iehova-irae; ko e mena ia kua pehe ai e faoa ke he vaha nai, To kitia a Iehova ke he mouga.
15 Ti ui mai ai e agelu a Iehova mai he lagi kia Aperahamo, ko e lagaua ia,
16 Kua pehe mai, Kua pehe mai a Iehova, kua omonuo au kia au ni; ha kua eke ni e koe e mena nai, kua nakai lamakai a koe he tama hau, ko e hau a tama tokotaha ni;
17 Ko e mena ia ke fakamonuina fakalahi ai e au a koe, mo e fakatokologa lahi ue atu e au hau a fanau ke tuga e tau fetu he lagi, ke tuga foki e oneone he matafaga; to moua foki he fanau hau e gutuhala ha lautolu kua fai fi kia lautolu;
18 Ko e hau a fanau foki ke monuina ai e tau motu oti kana he lalolagi; ha kua fanogonogo a koe ke he haku tau kupu.
19 Ti liu atu a Aperahamo ke he hana tau fuata; ti matike ai a lautolu mo e o fakalataha ki Pere-sepa; kua nofo ai foki a Aperahamo i Pere-sepa.
20 Kua mole atu e tau mena ia ti tala age ai kia Aperahamo, kua pehe, Kitiala, ko Meleka foki kua fanau e ia e tau tama ke he matakainaga hau ko Nakoli;
21 Ko Usa hana tama uluaki, mo e hana matakainaga ko Pusa, mo Kionueli e matua tane a Arama.
22 Mo Kiseta, mo Haso, mo Pilitaso, mo Itelafo, mo Petueli.
23 Ne fanau foki e Petueli a Repeka; ko e tokovalu nā ne fanau mai e Meleka kia Nakori e matakainaga a Aperahamo.
24 Ko e hoana fakahoa foki hana ko Reuma hana higoa, ne fanau mai foki e ia ko Tepaha mo Kahamo, mo Tahaso, mo Maaka.