Kenese 23:1-20
23 KO e tau tau a Sara ko e taha ia e teau mo e uafulu, ti fitu ni e tau; ko e tau tau haia he moui a Sara.
2 Ti mate ai a Sara i Kiriata-arapa, ko Heperona haia ke he motu ko Kanana; ne fina atu foki a Aperahamo ke tagi tatuki ha ko Sara, mo e tagi kia ia.
3 Ti tu atu ai a Aperahamo ki mua hana hoana ne mate, mo e vagahau atu ke he fanau a Heti, kua pehe atu,
4 Ko au ko e tagata kehe, mo e tagata nofo paea ia mutolu; kia ta mai a e maga kelekele ha mutolu maku, mo tukuaga, kia tanu ai e au haku hoana kua mate, kia galo a ai ia au.
5 Ti tali mai ai e fanau a Heti kia Aperahamo kua pehe mai kia ia,
6 Ko e iki na e, fanogonogo mai a kia mautolu, ko koe ni ko e iki lahi ha ia mautolu; kia tanu e koe hau a tokoua kua matulei ke he tukuaga uho ha mautolu; nakai fai tagata ia mautolu ke lamakai he hana tukuaga kia koe, ka e tuku atu ni kia tanu ai hau a tokoua kua matulei.
7 Ti tu atu ai a Aperahamo, mo e tukutukuhifo ke he tau tagata he motu ia, ko e fanau a Heti.
8 Ti vagahau atu ai a ia kia lautolu, kua pehe atu, Kaeke ko e finagalo ha mutolu ke tanu ai e au haku hoana kua mate, kia galo a ia ia au, kia fanogonogo mai a mutolu kia au, mo e ole atu e mutolu māku kia Eferona ko e tama a Soara.
9 Kia tuku mai e ia maku e ana ko Makapelu, ha ha ia ia ke he katofia he hana fonua; kia tuku mai ai e ia māku mo tukuaga ke he motu ha mutolu, to totogi e au ke he tau tupe kua lata ki ai.
10 Ne nofo foki a Eferona mo e fanau a Heti; ti tali mai ai a Eferona, ko e tagata Heti, kia Aperahamo, ki mua foki he fanau a Heti, ko lautolu oti ne o mai ke he gutuhala he hana maga, kua pehe mai,
11 Ko e iki na e, aua ia, ka e fanogonogo mai a koe kia au; kua foaki atu e au e fonua kia koe, katoa mo e ana ha i ai, kua foaki atu ai e au kia koe; kua foaki atu ni e au kia koe ki mua he tau tagata he haku motu; ati tanu ā hau a tokoua kua matulei.
12 Ti tukutukuhifo ai a Aperahamo ki mua he tau tagata he motu ia.
13 Ti vagahau atu ai a ia kia Eferona ki mua he tau tagata he motu, kua pehe atu, Kaeke ke tuku mai ai e koe kia au, kia fanogonogo mai a koe kia au; to ta atu e au e tau tupe ke totogi aki e fonua, kia talia ā e koe, ti tanu ai e au haku a hoana kua mate.
14 Ti tali mai ai a Eferona kia Aperahamo, kua pehe mai kia ia.
15 Ko e iki na e, fanogonogo mai a koe kia au, kua lata e fonua mo e tau sikeli ario fa ni e teau; mo ha e mena ia kia taua mo koe? ati tanu ā e koe hau a tokoua kua matulei.
16 Kua fanogonogo atu a Aperahamo kia Eferona; ti fua atu ai e Aperahamo kia Eferona e tau ario ne tala mai e ia ki mua he fanau a Heti, fa e teau ia he tau sikeli ario, kua mahani ai e tau fakafua koloa.
17 Ko e fonua a Eferona i Makapelu, ki mua a Mamere, ko e fonua, mo e ana ha i ai, katoa mo e tau akau oti ha he fonua ke he hana tau katofia oti kana, kua uta ia,
18 Ke eke mo fonua a Aperahamo, ki mua he fanau a Heti, ki mua ha lautolu oti ne o mai ke he gutuhala he hana maga.
19 Kua mole e mena ia, ti tanu ai e Aperahamo a Sara hana hoana, ke he ana ha he fonua ko Makapelu ki mua a Mamere; ko Heperona haia ke he motu ko Kanana.
20 Kua uta he fanau a Heti e fonua mo e ana ha i ai kia Aperahamo ke eke māna mo tukuaga.