Kenese 25:1-34
25 NE liu foki fai hoana a Aperahamo ke he fifine, ko Ketura hana higoa,
2 Ne fanau foki e ia kia ia ko Simurana, mo Iokasana, mo Metana, mo Mitiana, mo Isipaka, mo Suaha.
3 Ne fanau foki e Iokasana a Sihipa, mo Titana. Ko e tau tama tane foki a Titana, ko Asurimo ia, mo Letusimo mo Leumemo.
4 Ko e tau tama tane foki a Mitiana, ko Efa ia, mo Efara, mo Enoka, mo Apita, mo Eletaha. Ko e tau tama oti kana ia a Ketura.
5 Ne āge foki e Aperahamo hana tau mena oti kia Isaako.
6 Ka ko e tau tama he tau hoana fakahoa ne nonofo ia Aperahamo, ne āge e Aperahamo ki ai e tau mena fakaalofa, mo e fakafano atu a lautolu ke he fahi uta, ka kua moui agaia a ia, ke he motu ha he fahi uta, kia o kehe a lautolu mo e hana tama ko Isaako.
7 Ko e tau tau foki hanai he mouiaga a Aperahamo, ne moui ai a ia, taha e teau ia, ti fitu e hogofulu, ti lima e tau.
8 Ne fakaoti foki e fafagu a Aperahamo, kua mate a ia ka kua motua lahi, ko e tagata motua ni kua moui leva; ne fakalataha atu foki a ia mo e hana faoa.
9 Ne tanu foki a ia he hana tau tama, ko Isaako, mo Isamaeli, ke he ana a Makapelu ha he fonua a Eferona e tama a Soara ko e tagata Heti, ki mua a Mamere;
10 Ko e fonua ne fakatau e Aperahamo he fanau a Heti. Ne tanu a Aperahamo ke he mena ia, mo Sara hana hoana.
11 Kua mole atu e mate a Aperahamo, ti fakamonuina ai he Atua hana tama ko Isaako ne nofo foki a Isaako tata age ki Perelaharoi.
12 Ko e matohiaga hanai a Isamaeli e tama a Aperahamo ne fanau kia Aperahamo e Hakara ko e fifine Aikupito, ko e fekafekau fifine a Sara.
13 Ko e tau higoa hanai he tau tama tane a Isamaeli, ko e tau higoa ha lautolu, kua fakalata ke he fanauaga ha lautolu; ko e tama uluaki a Isamaeli ko Nepaiota ia; mo Kitara, mo Atapeelu, mo Mepesama.
14 Mo Mesema, mo Tumaha, mo Masa,
15 Ko Hatara, mo Tema, ko Ietura, mo Nafiso, mo Katema;
16 Ko e tau tama tane haia a Isamaeli, ko e tau higoa foki haia ha lautolu, takitaha mo e hana maga, takitaha foki mo e hana kolo; ko e tau iki haia ne tokohogofulu ma ua ke he tau motu ni ha lautolu.
17 Ko e tau foki hanai he moui a Isamaeli, taha e teau ia, ti tolugofulu ma fitu e tau tau; ne fakaoti foki hana fafagu, kua mate a ia; ti fakalataha atu a ia mo e hana faoa.
18 Ne nonofo foki a lautolu kua kamata mai i Havila ato hoko ki Sura kua fehagai mo Aikupito, ke he hala ne hifo ki Asuria; ne nofo a ia ki mua hana tau matakainaga oti.
19 Ko e matohiaga foki hanai a Isaako, e tama a Aperahamo; ne fanau a Aperahamo a Isaako.
20 Ne fagofulu e tau a Isaako he uta e ia a Repeka mo hoana hana, ko e tama fifine haia a Petueli ko e tagata Suria mai Patana rama, ko e mahakitaga foki a Lapana ko e tagata Suria.
21 Ti ole ni e Isaako kia Iehova ma e hoana hana ha kua tufua a ia; ne fanogonogo foki e Iehova kia ia, ti fatu ai a Repeka hana hoana.
22 Ne mioi foki e tau tama ki loto ia ia; ti pehe ai a ia, Kaeke ke pihia, ko e ha ne pehenai ai au? Ti fano ai a ia ke huhu atu kia Iehova.
23 Ti pehe mai a Iehova kia ia, Ua ni e motu ha he manava hau, to vevehe kehe e na faoa ua mai he manava hau; to mua ni e malolo he taha faoa ke he faoa ne toe; to fekafekau e taokete ke he tehina.
24 Kua hoko ke he aho ke fanau ai a ia, kitiala, ko a mahaga ha ha he manava hana.
25 Ko ia ne fanau mua mai kua kula a ia, ti fulufulu tuga ne tapulu fulufulu kua kafu ai a ia; ti ui ai e lautolu hana higoa ko Esau.
26 Ti fanau mai ai hana matagainaga, ne toto atu foki hana lima ke he muihui a Esau; ti ui ai hana higoa ko Iakopo; ne onogofulu e tau tau a Isaako he fanau mai ai a Iaua.
27 Ne tutupu e tau tama ia; ko Esau foki ko e tagata iloilo tutuli manu, ko e tagata he vao a ia; ka ko Iakopo ko e tagata tututonu a ia, kua nofo kaina a ia.
28 Ne fakaalofa a Isaako kia Esau, ha kua kai e ia e tau manu hana; ka ko Repeka, ne fakaalofa a ia kia Iakopo.
29 Ne tunu foki e Iakopo e mena kai; ti hau a Esau mai he vao, kua nakai fahia foki a ia;
30 Ti pehe atu a Esau kia Iakopo, Ati ta mai la e mena kula nā kou kai, ha kua nakai fahia au; ko e mena ia ne ui ai hana higoa ko Etoma.
31 Ti pehe mai a Iakopo, Fakafua mai ā hau a tufaaga uluaki kia au ke he aho nai.
32 Ti pehe atu a Esau, Kitiala, ko e mate ne fai au, kua aoga ha ha e tufaaga ia he uluaki kia au;
33 Ti pehe mai ai a Iakopo, Kia omonuo mai a koe kia au ke he aho nai; ti omonuo atu ai a ia kia ia; ti fakafua atu ai hana tufaaga he uluaki kia Iakopo.
34 Ti ta atu ai e Iakopo e areto mo e atasemo tunu kia Esau; ti kai ai e ia mo e inu, ti matike ai a ia mo e fano; ne fakateaga pihia a Esau ke he tufaaga he uluaki.