Kenese 26:1-35
26 HA i ai foki e hoge ke he motu, ka e kehe e hoge fakamua ha i ai ke he vaha ia Aperahamo. Ti fano ai a Isaako ki Kira kia Apimeleko e patuiki a Filisitia.
2 Kua fakakite mai a Iehova kia ia, mo e pehe mai ai, aua neke hifo a koe ki Aikupito; ka e nofo a koe ke he motu ke tala atu ai au kia koe,
3 Kia nofo paea a koe ke he motu nai, to ha i ai au ia koe, mo e fakamonuina e au a koe, ha kua foaki atu e au kia koe mo e hau a fanau e tau motu oti na; to fakamoli ni e au e omonuo ne omonuo ai au ke he hau a matua tane ko Aperahamo;
4 To fakatokologa e au e fanau hau ke tuga ne tau fetu he lagi, to foaki atu foki e au ke he fanau hau e tau motu oti na; ko e hau a fanau foki ke monuina ai e tau motu oti he lalolagi;
5 Ha kua fanogonogo a Aperahamo ke he haku kupu, mo e omaoma ke he haku a fekau, mo e haku tau poaki, mo e haku tau kotofaaga, mo e haku tau fakatufono.
6 Ti nofo ai a Isaako i Kira;
7 Ti huhu e tau tagata he motu kia ia ke he hoana hana, ti pehe atu a ia, Ko e haku mahakitaga a ia, ha kua matakutaku a ia ke pehe atu, Ko e haku hoana a ia, ha kua manatu a ia, Neke keli au he tau tagata he motu ha ko Repeka; ha ko e fifine mitaki ni a ia.
8 Kua leva he nofo ai a ia, ti kitekite atu ai a Apimeleko e patuiki a Filisitia he fakamaama; kua kitia atu e ia, kitiala, ko Isaako ha ne fefena mo Repeka hana hoana.
9 Ti ui atu ai a Apimeleko kia Isaako, mo e pehe atu, Kitiala, ko e hau a hoana ni a ia, ko e ha kia ne tala mai ai e koe ko e hau a mahakitaga a ia? Ti pehe mai ai a Isaako kia ia. Ha kua pehe na au, Neke mate au ha ko ia.
10 Ti pehe atu ai Apimeleko, Ko e heigoa e mena nai kua eke e koe kia mautolu? ane fano fakahaupo taha tagata he motu ke he hoana hau, po kua hoko mai e hala kia mautolu ha ko koe.
11 Ti poaki atu Apimeleko ke he motu oti, kua pehe atu, Ka piki taha ke he tagata nai, po ke hana hoana ti mate ni a ia.
12 Ne to mena foki e Isaako ke he motu ia, ti moua ai e ia taki teau e tau fua ke he tau ia; ne fakamonuina foki e Iehova a ia.
13 Ti kua tagata lahi te e tagata ia, kua lahi mo lahi a ia, ati oti ka e tagata lahi mahaki ni a ia;
14 Ha kua toka ia ia e tau fuifui mamoe, mo e tau fuifui povi, mo e tau fekafekau tokologa; ti mahekeheke e tau tagata Filisitia kia ia.
15 Ha ko e tau vai keli oti ne keli he tau fekafekau he matua tane hana ke he vaha ia Aperahamo hana matua tane, kua ponoti he tau Filisitia mo e fakapuke ke he kelekele.
16 Ne pehe atu foki Apimeleko kia Isaako, Kia haele kehe a koe ia mautolu, ha kua mua ue atu a koe kia mautolu.
17 Ti fano kehe ai a Isaako he mena ia, kua fakatu hana fale ie ke he pahua a Kira, mo e nofo ai.
18 Ti liu foki keli e Isaako e tau vai keli ne keli e lautolu ke he vaha ia Aperahamo hana matua tane, ha kua mate a Aperahamo ti ponoti ai he tau Filisitia; ne ui foki e ia e tau higoa ne fakahigoa aki he hana matua tane.
19 Kua keli hifo he tau fekafekau a Isaako ke he pahua, ti moua ai e lautolu e vai puna.
20 Ti taufetoko ai e tau leoleo, manu a Kira mo e tau leoleo manu a Isaako, kua pehe age, Ko e vai ha mautolu ia; ti ui ai e higoa he vai keli, ko Eseki, ha kua taufetoko ai a lautolu mo ia.
21 Ne keli foki e lautolu taha vai, ti taufetoko ai foki a lautolu; ti fakahigoa ai a ia ko Sitani.
22 Kua toka e ia e mena ia ti keli ai e ia e taha vai; kua nakai taufetoko ai a lautolu, ti fakahigoa ai ko Rehopo, kua pehe a , Ha kua fakalaulahi ainei e Iehova e mena ma tautolu, to tupu lahi a tautolu ke he motu.
23 Ti hake a ia he mena ia ki Pere-sepa.
24 Ti fakakite ai a Iehova kia ia ke he po ia ni, kua pehe mai, Ko au ko e Atua a Aperahamo e matua tane hau; ua matakutaku a koe, ha ko au ni ke fakalataha mo koe, to fakamonuina foki e au a koe, mo e fakatokologa hau a fanau, ha ko e haku a fekafekau ko Aperahamo.
25 Ne ati e ia ke he mena ia e fatapoa, ti ui ke he higoa a Iehova, ti fakatu ai foki e ia hana fale ie; ne keli ai foki he tau fekafekau a Isaako e vai keli.
26 Ti fina atu ai kia ia a Apimeleko i Kira, ko lautolu mo Ahusata hana kapitiga, mo Fikolo ko e iki he hana tau kau.
27 Ti pehe atu ai a Isaako kia lautolu, Ko heigoa e mena ne o mai ai a mutolu kia au, ha kua fakavihia e mutolu au, kua vega foki e mutolu au?
28 Ti pehe mai ai a lautolu, Ne kitia tonu e mautolu ha ha ia koe a Iehova, ti pehe ai a mautolu, kia eke e tautolu nai e omonuo, ko mautolu ni mo koe, kia eke foki e tautolu e maveheaga ha tautolu mo koe;
29 Ke aua neke mahani kelea mai a koe kia mautolu, ka e tuga na mautolu nakai pipiki kia koe, tuga foki e mahani ha mautolu kia koe ko e mitaki hokoia, ti fakafano atu e mautolu a koe mo e mafola; kua fakamonuina a koe ainei e Iehova.
30 Ne eke e ia e galue mo lautolu, ti kai mena a lautolu mo e inu.
31 Kua uhu matike a lautolu mogoho pogipogi, kua omonuo ko e taha ke he taha; ti fakafano atu ai e Isaako a lautolu, ti o ai a lautolu ia ia mo e mafola.
32 Ko e aho ia ni ne o mai ai e tau fekafekau a Isaako mo e fakamatala mai kia ia e vai keli ne keli e lautolu, kua pehe mai kia ia, Kua moua tuai e mautolu e vai.
33 Ti fakahigoa ai e ia ko Sepa, ko e mena ia ne higoa ai e maga ko Pere-sepa kua hoko ni ke he aho nai.
34 Kua hoko a Esau ke he tau fagofulu hana, ti faihoana ai a ia kia Iutiti ko e tama fifine a Peeri, ko e tagata Heti, mo Pasemeta e tama fifine a Ailona, ko e tagata Heti.
35 Ne fakamamahi e laua e tau loto a Isaako, mo Repeka.