Kenese 27:1-46
27 KUA motua tuai a Isaako, kua pouli foki hana tau mata, nakai maeke ke kitia, ti ui ai a ia kia Esau hana tama fakamua, kua pehe atu kia ia, Ma mea; ti pehe mai ai a ia, Ko au hanai.
2 Ti pehe atu ai a ia, Kitiala, kua motua tuai au, nakai iloa e au e aho ke mate ai au,
3 Ko e hanai, kia uta e koe hau a tau kanavaakau ko e hau a tagafana mo e hau a kaufana, ti fano a koe ke he vao mo e tutuli e manu he vao māku.
4 Ti eke aki e koe maku taha mena kai manogi tuga ne mena fa fiafia au ki ai, ti ta mai kia au, kia kai ai e au, kia fakamonuina e au a koe ka e nakai la mate au.
5 Ne logona foki e Repeka e tau kupu a Isaako kia Esau hana tama. Kua fano foki a Esau ke he vao, ke tutuli manu ke ta mai.
6 Ti vagahau e Repeka kia Iakopo hana tama kua pehe atu, Kitiala, ne logona e au, e kupu he hau a matua tane kia Esau e matakainaga hau, kua pehe,
7 Ta mai kia au e taha manu he vao, ti eke aki e koe maku e mena kai manogi, ke kai ai e au, mo e fakamonuina e au a koe ki mua a Iehova ka e nakai la mate au.
8 Hanai, haku tama na e, fanogonogo mai a koe ke he haku kupu ke he mena ka tala atu e au kia koe.
9 Kia fano a koe ke he fuifui, mo e ta mai ai kia au ua e tama koti mitaki, to eke ai e au e mena kai manogi mo e matua tane hau, tuga ne mena fa fiafia ki ai a ia;
10 Ti uta ai ni e koe ke he hau a matua tane, kia kai ai e ia mo e fakamonuina e ia a koe ka e nakai la mate a ia.
11 Ti pehe mai ai a Iakopo kia Repeka hana matua fifine, Kitiala, ko e tagata fulufulu a Esau haku matakainaga, ka ko au ko e tagata molemole au.
12 Ka eke ke amoamo haku matua tane kia au, ti eke ai au kia ia mo tagata fakavai; ti hoko mai ai kia au e kaialu ka e nakai ko e monuina.
13 Ti pehe atu ai hana matua fifine kia ia, Kia ha ha ia au hau a kaialu, ma mea, ka e fanogonogo mai ni a koe ke he haku kupu, mo e fano ke ta mai e tau tama koti kia au.
14 Ti fano ai a ia mo e tapaki mai, kua ta mai ke he hana matua fifine, ti eke ai hana matua fifine e mena kai manogi, tuga ne mena kua fa fiafia ki ai hana matua tane.
15 Ne uta foki e Repeka e tau tapulu mitaki a Esau hana tama fakamua, ne toka ia ia ke he fale, ti fakatapulu ai e ia a Iakopo ko e hana tama fakamui.
16 Ne tuku ai foki e ia e tau kili punua koti ke he hana tau lima, katoa mo e mena molemole he hana ua;
17 Ko e mena kai manogi foki mo e areto, ne taute e ia kua ta age ia ke he lima he hana tama ko Iakopo.
18 Ti fina atu ai a ia ke he hana matua tane, mo e pehe atu, Haku matua na e, ti pehe mai a ia, Ko au hanai, ma mea, ko hai a koe?
19 Ti pehe atu ai a Iakopo ke he hana matua tane, Ko au ko Esau ko e tama uluaki hau, kua eke tuai e au e mena ne tala mai ai e koe kia au; kia matike a koe, ke nofo mo e kai haku manu kia fakamonuina mai e koe au.
20 Ti pehe mai ai a Isaako ke he hana tama, Ma mea, Ne eke fefe he moua vave pihia ai e koe? Ti pehe atu a ia, Ha kua ta mai ki mua haku e Iehova hau a Atua.
21 Ti pehe mai ai a Isaako kia Iakopo, Unu mai a koe, ma mea, kia amoamo e au a koe, po ke tama haku ni a koe ko Esau, po ke nakai.
22 Ti unu atu a Iakopo ke he hana matua tane ko Isaako; ti amoamo ai e ia a ia, kua pehe mai, ko e leo ko e leo ni a Iakopo, ka ko e tau lima ko e tau lima a Esau.
23 Kua nakai iloa e ia a ia, ha kua fulufulu hana tau lima tuga ne tau lima a Esau hana matakainaga; ti fakamonuina ai e ia a ia.
24 Ti pehe mai foki a ia, Ko koe kia ko e haku tama ni ko Esau? ti pehe atu ai a ia, Ko au ni.
25 Ti pehe mai ai a ia, Ta mai la kia au, kia kai ai e au e manu he haku tama, kia fakamonuina e au a koe. Ti ta atu ai kia ia, kua kai ai, ne ta mai foki kia ia e uaina, kua inu ai e ia.
26 Ti pehe mai ai a Isaako hana matua tane kia ia, Unu mai a koe, ma mea, ke figita mai kia au.
27 Ti unu atu ai a mo e figita atu kia ia, ne logona e ia e namu he hana tau tapulu, kua fakamonuina a ia, kua pehe mai, Kitiala, ko e namu he haku tama tuga ne namu ia he fonua kua fakamonuina e Iehova.
28 Kia foaki atu he Atua kia koe e hahau mai he lagi, mo e mena uho he fonua; kia loga foki e saito mo e uaina.
29 Kia fekafekau e tau motu kia koe, kia hufeilo foki e tau tagata kia koe kia eke a koe mo iki ke he hau a tau matakainaga, kia hufeilo foki kia koe e tau tama he hau a matua fifine; kia malaia a lautolu kua kaialu kia koe; kia monuina a lautolu kua fakamonuina a koe.
30 Kua oti he fakamonuina e Isaako kia Iakopo kua kito fina atu foki a Iakopo i mua a Isaako hana matua tane, ti hau ai a Esau hana matakainaga he tutuli manu.
31 Kua eke foki e ia e mena kai manogi mo e uta ke he hana matua tane, kua pehe atu foki ke he hana matua tane, Kia matike a koe, haku matua na e, mo e kai e manu he hau a tama, kia fakamonuina mai e koe au.
32 Ti pehe mai ai a Isaako hana matua tane kia ia, Ko hai a koe? Ti pehe atu ai a ia, Ko au ko e hau a tama, ko e hau a tama uluaki ko Esau.
33 Ti vivivivi ai a Isaako, kua vivivivi fakalahi na ati kehe, kua pehe mai, Ko hai kia a ia ne tutuli manu, mo e ta mai kia au, ti kua kai oti tuai e au ka e nakala hau a koe, kua fakamonuina foki e au a ia? to monuina ai ni a ia.
34 Kua logona e Esau e tau kupu he hana matua tane, ti tagi aue ai a ia, ko e tagi aue fakalahi ni, kua pehe atu ke he hana matua tane, Haku matua na e, kia fakamonuina foki e koe au, ko au nai ni.
35 Ti pehe mai ai a ia, Kua hau tuai hau a matakainaga mo e fakavai, ti kua uta tuai e ia hau a monuina.
36 Ti pehe atu ai a ia, Ko e mena ia kia ne ui ai hana higoa ko Iakopo? ha kua lagaua a enei kua fakavai e ia au, ne uta e ia haku a tufaaga he uluaki, kitiala, kua uta ai nei e ia haku a monuina. Ne pehe atu foki a ia, Nakai kia toe ha monuina ia koe māku?
37 Ti tali mai ai a Isaako, kua pehe mai kia Esau, Kitiala, kua kotofa tuai e au a ia mo iki hau, kua āge foki e au kia ia hana tau matakainaga oti mo fekafekau, kua fakamalolo e au a ia ke he saito, mo tau e uaina; ko heigoa foki e mena kua toe ke eke e au māu, ma mea?
38 Ti pehe atu ai a Esau ke he hana matua tane, Taha maka kia e monuina ha ha ia koe, haku matua na e? Kia fakamonuina, foki e koe au, ko au nai ni, haku matua na e? Ti tagi fakaleolahi ai a Esau.
39 Ti tali mai ai hana matua tane ko Isaako, kua pehe mai kia ia, Kitiala, to nofo kehe a koe mo e mena uho he fonua, ke kehe foki mo e mena ne to ai e hahau mai he lagi i luga.
40 Ko e hau a pelu ke moui ai a koe, to fekafekau foki a koe ke he hau a matakainaga, ka hoko foki ke he vaha ke hao ai a koe, ti fati ai e koe hana akau hahamo he ua hau.
41 Ti fakavihia e Esau a Iakopo, ha ko e monuina ne fakamonuina atu ai a ia he hana matua tane; ti pehe ai a Esau ke he hana loto kua tata tuai e tau aho ke tagi ai ha ko e haku matua tane, ti keli e au haku matakainaga ko Iakopo.
42 Ne fakamatala atu kia Repeka e tau kupu a Esau hana tama fakamua, ti fekau atu e ia ke ahi a Iakopo hana tama fakamui ke hau, ti pehe atu kia ia, Kitiala, ko Esau hau a matakainaga, kua fakamafana e ia hana loto kia koe, ko e keli ne fai e ia a koe.
43 Ko e hanai, haku tama na e, kia fanogonogo mai a koe kia au; kia matike a koe mo e hola atu kia Lapana haku tugane i Karana.
44 Ti nofo a koe ia ia ke he falu a aho, ato mole atu e ita he hau a matakainaga;
45 Ato mole atu e ita he hau a matakainaga kia koe, ato nimo foki ia ia e mena ne eke e koe kia ia; ti fekau atu e au ke ta mai ai a koe; ke uta kehe he ha a mua tokoua ia au ke he aho taha?
46 Ti pehe atu a Repeka kia Isaako, Kua vihia e au haku moui ha ko e tau fifine Heti, kaeke ke faihoana a Iakopo ke he taha fifine Heti, tuga ne tau fifine ia he motu, po ke aoga ha ha haku moui kia au?