Kenese 28:1-22
28 TI ui ai a Isaako kia Iakopo, kua fakamonuina a ia, mo e tala age kia ia, kua pehe age ki ai, Aua neke faihoana a koe ke he taha fifine Kanana.
2 Matike ā mo e fano a koe ki Patanarama, ke he faoa a Petueli, ko e matua tane he hau a matua fifine, ti faihoana ai a koe ke he taha he tau tama fifine a Lapana, ko e tugane he matua fifine hau.
3 Kia fakamonuina a koe he Atua mana, kia fakatupu tokologa e ia mai ia koe, kia fakatokologa foki e ia a koe, kia eke foki e ia a koe mo tau motu loga;
4 Kia foaki foki kia koe e monuina a Aperahamo, ko koe ni mo e hau a fanau fakalataha mo koe; kia eke e koe māu e motu kua nofo paea ai a koe, ko ia ne foaki mai he Atua kia Aperahamo.
5 Kua fakafano atu e Isaako a Iakopo; ti fina atu ai a ia ki Patana-rama; kia Lapana ko e tama e Petueli ko e tagata Suria, ko e tugāne a Repeka ko e matua fifine a Iakopo mo Esau.
6 Ne kitia e Esau kua fakamonuina e Isaako a Iakopo, mo e fakafano atu a ia ki Patana-rama ke faihoana ai, ko e hana fakamonuina foki kia ia, ne tala age ai kia ia, kua pehe, Aua neke faihoana a koe ke he taha fifine Kanana;
7 Ti kua fanogonogo tuai a Iakopo ke he hana matua tane mo e hana matua fifine, mo e fano ki Patana-rama;
8 Kua kitia foki e Esau kua kelea e tau fifine Kanana ke he manatu he hana matua tane ko Isaako;
9 Ti fano ai a Esau kia Isamaeli, mo e faihoana kia Mahalata ko e tama fifine a Isamaeli ko e tama a Aperahamo, ko e mahakitaga foki a Nepaiota, ti lafilafi ai ke he tau hoana ha ha ia ia.
10 Ka ko Iakopo, ne fano a ia i Peresepa, ka e fina atu ki Karana.
11 Ne hoko a ia ke he taha mena, ti mohe ai, ha kua to tuai e la, ne uta foki e ia e tau maka he mena ia, kua tuku mo uluga hana; ti takoto hifo ai ke he mena ia.
12 Ti miti ai a ia; kitiala, ko e papahi kua fakatu ke he kelekele kua hoko hake hana matahiku ke he lagi; kitiala foki, ko e tau agelu he Atua kua o hake me o hifo ai.
13 Kitiala foki, ne tu a Iehova ki luga he papahi, kua pehe mai, Ko au ko Iehova ko e Atua a Aperahamo hau a matua tane, mo e Atua a Isaako; ko e fonua ne takoto ai a koe to foaki atu e au kia koe, mo e hau a fanau;
14 To eke foki hau a fanau ke tuga e efuefu he kelekele, to tolonaki foki a koe ki lalo, mo uta, ke he fahi tokelau mo toga; ko koe foki mo e hau a fanau ke monuina ai e tau magafaoa oti he lalolagi.
15 Kitiala, kua fakalataha au mo koe, to leveki foki e au a koe ke he tau mena oti ke fano a koe ki ai, to liuaki mai foki e au a koe ke he motu nai; ha ko e mena nakai tiaki e au a koe, ato eke e au e mena ne tala atu ai au kia koe.
16 Ti ala ai a Iakopo he mohe hana, mo e pehe mai a ia, Ko e moli ni ha ha he mena nai a Iehova; ka e nakai ni iloa e au.
17 Kua matakutaku ai a ia, mo e pehe mai, Ko e mena matakutakuina hanai, nakai ko e mena kehe hanai ka ko e fale ni he Atua, ko e gutuhala foki hanai he lagi.
18 Ne uhu matike a Iakopo mogoho pogipogi, kua uta e maka ne uluga ai a ia kua fakatu ai mo fakamailoga, ti liligi hifo e lolo ki luga he maka.
19 Ne ui ai e ia e higoa he mena ia ko Peteli, ka ko e higoa fakamua he maga ia ko Lusa.
20 Ti eke ai e Iakopo hana omonuo, kua pehe atu, Kaeke ke ha ia au e Atua, mo e leveki e ia au ke he hala nai kua fano ai au, mo e foaki mai kia au e mena kai ke kai ai au, mo e tapulu ke tapulu ai au,
21 Ti liuaki mai e ia au mo e monuina ke he kaina he haku matua tane; ti eke ai ni a Iehova mo Atua haku;
22 Ko e maka nai foki kua to e au mo fakamailoga, to eke ia mo fale he Atua; ko e tau mena oti foki ke foaki mai e koe kia au to ta atu e au e mena ne hogofulu aki kia koe.