Kenese 29:1-35
29 TI fano ai a Iakopo ke he hana fenoga, kua hoko atu ke he motu he tau tagata he fahi uta.
2 Ne kitekite a ia, kitiala, ko e vai keli ha he fonua, kitiala foki, ha ne takoto fakatata ki ai tolu e fuifui mamoe, ha ko e vai keli ia ne fakainu ai e lautolu e tau fuifui manu; ne toka ai foki e maka lahi ke he gutu he vai keli.
3 Ne fakapotopoto foki e tau fuifui manu oti ke he mena ia, to fuluhi kehe ai e lautolu e maka he gutu he vai keli, mo e fakainu e tau mamoe; ti liuaki ai e lautolu e maka ke he gutu he vai keli ke he hana ni a tokaaga.
4 Ti pehe atu ai a Iakopo kia lautolu, Haku tau matakainaga na e, mai fe a mutolu? Ti pehe mai ai e lautolu, Mai Karana a mautolu nai.
5 Ti pehe atu ai a ia kia lautolu, Kua iloa nakai e mutolu a Lapana ko e tama a Nakori? Ti pehe mai ai a lautolu, Kua iloa ni e mautolu a ia.
6 Ti pehe atu ai a ia kia lautolu, Kua malolo nakai a ia? Ti pehe mai ai a lautolu, Kua malolo; kitiala, ko e hana tama fifine ko Rahela ha ne hau mo e tau mamoe.
7 Ti pehe atu ai a ia, Kitiala, kua aho loa agaia, kua nakai la hoko ke he magaaho ke fakapotopoto ai e tau manu, kia fakainu la e mutolu e tau mamoe, ti o a mutolu ke fagai ai.
8 Ti pehe mai ai a lautolu, Nakai maeke ia mautolu, ato fakapotopoto mai e tau fuifui oti, ato fuluhi kehe foki e lautolu e maka he gutu he vai keli; ti fakainu ai e mautolu e tau mamoe.
9 Ha ha ne vagahau a lautolu mo ia, ti hau ai a Rahela mo e tau mamoe he hana matua tane, ha kua leoleo ne ia.
10 Kua kitia e Iakopo a Rahela ko e tama fifine a Lapana ko e tugane he matua fifine hana, mo e tau mamoe a Lapana ko e tugane he matua fifine hana, ti fakatata atu ai a Iakopo mo e fuluhi kehe e maka he gutu he vai keli, ti fakainu e ia e tau mamoe a Lapana ko e tugane he matua fifine hana.
11 Ti figita e Iakopo a Rahela, mo e tagi fakaleolahi.
12 Ti tala age ai e Iakopo kia Rahela, ko ia ko e matakainaga he hana matua tane, ko e tama ni a Repeka; ti poi atu ai a ia ke tala age ke he hana matua tane.
13 Kua logona e Lapana e tala kia Iakopo e tama he mahakitaga hana, ti poi atu ai a ia ke feleveia mo ia, kua peka kia ia mo e figita a ia, kua ta mai foki a ia ke he hana fale; ti talatala atu e ia e tau mena oti ni kia Lapana.
14 Ti pehe mai ai a Lapana kia ia, Ko e moli ko e haku huimotua a koe, mo e haku kakano ni a koe. Ne nonofo foki a laua mo ia ke he mahina katoa.
15 Ti pehe mai ai a Lapana kia Iakopo, To fekafekau noa mai kia a koe kia au, ha ko koe ko e haku a matakainaga? kia tala mai ā kia au po ke totogi ha ha a koe.
16 Ne tokoua la e tama fifine ha Lapana, ko e higoa he tama fakamua ko Lea ia, ka ko e higoa he tama fakamui, ko Rahela ia.
17 Kua kelea e tau mata a Lea, ka ko Rahela kua tino mitaki a ia, kua mitaki mo e hana mata.
18 Kua loto a Iakopo kia Rahela, ti kua pehe atu a ia, To fekafekau au kia koe fitu ni e tau ke moua a Rahela hau a tama fifine fakamui.
19 Ti pehe mai ai a Lapana, Kua mitaki ke ta atu e au a ia kia koe ka e kelea ke ta atu ke he taha tagata, ati nonofo ā taua.
20 Ti fekafekau ai a Iakopo ke moua a Rahela fitu ni e tau; ka e tuga ni e falu a aho gahoa kia ia, he loto lahi a ia kia Rahela.
21 Ti pehe atu ai a Iakopo kia Lapana, Ta mai la haku hoana; ha kua katoa tuai haku tau aho, kia fina atu ai au kia ia.
22 Ti fakapotopoto ai e Lapana e tau tagata oti he mena ia, kua eke e galue.
23 Kua hoko ke he po, ti uta ai e ia hana tama fifine ko Lea, kua ta age kia ia, ti fina atu ai a ia kia ia.
24 Ne āge foki e Lapana ke he hana tama fifine ko Lea, hana fekafekau fifine ko Silepa mo fekafekau fifine māna.
25 Kua hoko ke he magaaho pogipogi, kitiala, ko Lea ni; ti pehe atu ai a ia kia Lapana, Ko heigoa e mena nai kua eke e koe kia au? nakai kia fekafekau au kia koe ke moua a Rahela ni? ti ko e heigoa e mena ne fakavai ai e koe au?
26 Ti pehe mai ai a Lapana, Nakai pihia e mahani he motu ha mautolu ke ta atu fakamua e tama fakamui, ka e fakamui e tama uluaki.
27 Kia fakakatoa hana po fitu, ti ta atu ai foki e au kia koe a ia nai, ha ko e gahua ke fekafekau mai ai a koe kia au ke he falu a tau ne fitu.
28 Ti eke pihia e Iakopo, kua fakakatoa e ia hana po fitu; ti ta age ai e ia hana tama fifine ko Rahela mo hoana māna.
29 Ne āge foki e Lapana ke he hana tama fifine ko Rahela, hana fekafekau fifine ko Pila mo fekafekau fifine māna.
30 Ti fina atu ai a ia kia Rahela foki, kua fiafia lahi foki a ia kia Rahela ka e tote kia Lea; ti fekafekau ai a ia kia Lapana e falu a tau ne fitu la.
31 Kua fioia e Iehova kua fakavihia a Lea, ti tuku age e ia ke fai tama ai a ia; ka e tufua a Rahela.
32 Ti fatu ai a Lea, ti fanau e ia e tama tane, kua ui e ia hana higoa ko Reupena; ha kua pehe age a ia, Kua fioia tuai e Iehova haku a mamahi, to fiafia a enei haku tane kia au.
33 Kua liu foki fatu a ia, kua fanau e tama tane, ti pehe age a ia, Kua fanogonogo a Iehova kua vihiatia au, ko e mena ia kua foaki mai ai e ia e tama nai foki, ti ui ai e ia hana higoa ko Simeona.
34 Kua liu foki fatu a ia, kua fanau e tama tane, ti pehe age a ia, To pipiki ainei kia au e loto he tane haku ha kua tokotolu ia e tama tane kua fanau e au māna; ko e mena ia ne ui ai e ia hana higoa ko Levi.
35 Kua liu foki fatu a ia, kua fanau e tama tane, ti pehe age a ia, To fakaheke au a enei kia Iehova; ko e mena ia ne ui ai e ia hana higoa ko Iuta; ti tufua ai a ia.