Kenese 3:1-24
3 NE mua he loto matala he gata ke he tau manu oti he kelekele ne eke e Iehova ko e Atua. Ne pehe mai a ia ke he fifine, Ko e moli kia kua pehe mai e Atua, aua neke kai e mua ke he tau akau oti he kaina?
2 Ti pehe atu ai e fifine ke he gata, Mena kai e maua e tau fua he tau akau he kaina.
3 Ka ko e fua he akau ha he vaha loto he kaina, ne pehe mai e Atua, Aua neke kai ai e maua, po ke pipiki a maua ki ai, neke mamate a maua.
4 Ti pehe mai ai e gata ke he fifine, Nakai ni mamate a mua;
5 Ha kua fioia he Atua ko e aho ka kai ai e mua, ti fakaala ai ha mua a tau mata; ti eke ai ni a mua ke tuga ne tau atua ke iloa ai e mitaki mo e kelea.
6 Ne kitia he fifine ko e akau mitaki ni ke kai, mo e fulufuluola mai, ti ko e akau aoga foki ke moua ai e iloilo, ti toto ai e ia ke he fua he akau mo e kai ai; ne āge foki ke he hana tane ne fakalataha mo ia, ti kai ai foki e ia.
7 Ti fakaala ai e tau mata ha laua tokoua, ti iloa ai e laua kua nakai felevehi a laua; ti tui ai e laua e tau lau mati ke eke mo titi ma laua.
8 Na logona e laua e leo a Iehova ko e Atua ha ne haele fano ke he kaina ke he magaaho hauhau; ti fakamumuli ai a Atamu mo e hana hoana mai mua a Iehova ko e Atua ki tua he tau akau he kaina.
9 Ti ui ai a Iehova ko e Atua kia Atamu, kua pehe mai kia ia, Ko fe a koe?
10 Ti pehe atu ai a ia, Ne logona e au hau a leo ke he kaina, ti matakutaku ai au, he nakai felevehi au; ti fakamumuli na au.
11 Ti pehe mai a ia, Tala atu e hai kia koe kua nakai felevehi a koe? Kua kai kia e koe e akau ne poaki atu ai au kia koe, aua neke kai ai e koe?
12 Ti pehe atu ai a Atamu, Ko e fifine ne ta mai e koe ke fakalataha mo au, ne ta mai e ia e fua akau kia au, ti kai ai e au.
13 Kua pehe mai a Iehova ko e Atua ke he fifine. Ko heigoa e mena nai kua eke e koe? Ti pehe atu ai e fifine, Ne fakavai mai he gata au, ti kai e au.
14 Ti pehe mai ai a Iehova ko e Atua ke he gata, Ha kua eke e koe e mena nai, ko e mena ia ke mua ai hau a malaia ke he tau manu huifa oti he kaina, katoa mo e tau manu huifa oti he vao; to totolo a koe ke he manava hau, mo e kai efuefu e koe ke he tau aho oti he moui hau;
15 To fakatupu e au e faitaua kia mua mo e fifine, ko e hau a fanau foki mo e hana fanau; to tatuki e ia hau a ulu, ka e tatuki ni e koe hana muihui.
16 Ne pehe atu a ia ke he fifine, To fakalahi ni e au hau a mamahi, ko e mamahi he hau a fatu; to fanau mai e koe e tau tama mo e mamahi; ka e hagao atu hau a manako ke he tane hau, to pule foki a ia kia koe.
17 Na pehe mai foki a ia kia Atamu, Ha kua fanogonogo a koe ke he kupu he hoana hau, mo e kai e koe e fua he akau ne poaki atu ai au kia koe, ne pehe atu, aua neke kai ai e koe; ko e mena ia ni kua malaia ai e kelekele ha ko koe; to kai ai e koe mo e mamahi ke he tau aho oti he moui hau;
18 To tutupu mai ai māu e tau akau talatala, mo e mahukihuki; to kai foki e koe e tau akau ikiiki he fonua.
19 To kai foki e koe hau a mena kai mo e kavakava he hau a mata, ato liu a koe ke he kelekele; ha ko e mena eke mai ai a koe; ha ko e efuefu ni a koe, to liu foki a koe ke he efuefu.
20 Ne ui e Atamu e higoa he hana hoana, ko Eva; ha ko e matua fifine a ia he tau tagata momoui oti kana.
21 Ne eke foki e Iehova ko e Atua e tau tapulu kili manu ma Atamu mo e hoana hana, me e fakatapulu ai a laua.
22 Ne pehe age foki a Iehova ko e Atua, Kitiala, kua eke tuai e tagata ke tuga ne taha ha tautolu ke iloa ai e mitaki mo e kelea; ko e hanai, neke fakaolo atu hana lima, mo e toto e fua he akau he moui, ti kai ai, mo e moui tukulagi;
23 Ti vega ai a ia e Iehova ko e Atua he kaina ko Etena, kia gahua ke he kelekele ne eke mai ai a ia.
24 Ti vega kehe ai e ia a Atamu; ne fekau atu foki e ia e tau kerupi ke nonofo ke he fahi tokelau he kaina ko Etena, mo e pelu puhopuho, kua tafeliuaki ke leoleo aki e hala ke he akau he moui.