Kenese 30:1-43
30 KUA kitia e Rahela kua nakai fanau e ia ha tama kia Iakopo; ti mahekeheke ai a Rahela ke he hana matakainaga; kua pehe mai foki a ia kia Iakopo, Ta mai la e falu a tama kia au, ka nakai ti mate na au.
2 Ti tupu ai e ita a Iakopo kia Rahela, kua pehe atu a ia, Ko au kia ke hukui aki e Atua, ko ia ni kua nakai foaki kia koe ha tama?
3 Ti pehe mai a ia, Kitiala, ko e haku a fekafekau fifine ko Pila, kia fina atu a koe kia ia, ti fai tama au ia ia, kia moua ai e au e falu a fanau ia ia.
4 Ti age ai e ia a Pila hana fekafekau fifine ke he hana tane, ti fina atu ai a Iakopo kia ia.
5 Ti fatu ai a Pila, kua fanau ai e ia e tama tane kia Iakopo.
6 Ti pehe mai a Rahela, Kua fakafili tuai he Atua au, kua fanogonogo foki a ia ke he haku a leo, mo e foaki mai kia au e tama tane, ko e mena ia ne ui ai e ia hana higoa ko Tano.
7 Kua liu foki fatu e fekafekau fifine a Rahela ko Pila, ti fanau ai e ia e tama tane kia Iakopo, ko e tokoua ia.
8 Ti pehe ai a Rahela, Ko e tau laga fakalahi, ne laga ai au mo e haku matakainaga, ti kua kautu tuai au; ti ui ai e ia e higoa hana ko Nafatali.
9 Kua kitia e Lea kua tufua tuai a ia, ti uta ai e ia hana fekafekau fifine ko Silepa, mo e age a ia kia Iakopo mo hoana hana.
10 Ti fanau ai e fekafekau fifine a Lea ko Silepa e tama tane kia Iakopo.
11 Ti pehe ai a Lea, Ko e kau ne hau, ti ui ai e ia hana higoa ko Kato.
12 Ti fanau foki e fekafekau fifine a Lea ko Silepa e taha tama tane kia Iakopo, ko e tokoua ia.
13 Ti pehe ai a Lea, Kua monuina au, ha ko e mena talahaua au he tau fifine kua monuina; ti ui ai e ia hana higoa ko Asera.
14 Ko e vaha helehele saito ne fina atu ai a Reupena, ti moua e ia e tau tutaima ke he vao, ti ta mai ai e ia ke he hana matua fifine ko Lea. Ti pehe atu ai a Rahela kia Lea, Ta mai la māku e falu a tutaima na he tama hau.
15 Ti pehe mai ai a ia kia ia, Ko e mena tote kia he fofo e koe hoku tane? ti eke kia e koe ke fofo foki e tau tutaima he haku tama? Ti pehe atu ai a Rahela, Hanei, to momohe a mua mo ia ke he po a magaaho ke totogi aki e tau tutaima he tama hau.
16 Kua hau a Iakopo he fonua ke he magaaho, afiafi, ti fina atu ai a Lea ke fonofono a ia, kua pehe atu, Kia hau a koe kia au ha kua fakafua tuai e au a koe, kua totogi aki he tau tutaima he tama haku. Ti momohe ai a laua mo ia he po ia.
17 Kua fanogonogo e Atua kia Lea, ti fatu ai a ia, kua fanau e ia e tama tane kia Iakopo, ko e tokolima ia.
18 Ti pehe ai a Lea, Kua foaki mai he Atua e totogi kia au ha kua āge e au haku a fekafekau fifine ke he haku tane; ti ui ai e ia hana higoa ko Isakara.
19 Ti liu foki fatu ai a Lea, kua fanau e tama tane kia Iakopo, ko e tokoono ia.
20 Ti pehe ai a Lea, Kua foaki mai he Atua kia au e koloa mitaki, to nofo mo au ainei haku tane, ha kua fanau e au tokoono e tama tane māna; ti ui ai e ia hana higoa ko Sepulona.
21 Kua mole e tau mena ia ti fanau ai e ia e tama fifine; kua ui e ia hana higoa ko Tina.
22 Ne manatu he Atua a Rahela, kua fanogonogo foki e Atua kia ia, kua fakafua e ia e tama māna.
23 Ti fatu ai a ia, ti fanau e ia e tama tane, kua pehe a ia, Kua uta kehe tuai he Atua e mena ne ma ai au.
24 Kua ui e ia hana higoa ko Iosefa, kua pehe, To lafilafi mai e Iehova kia au e taha tama tane.
25 Kua fanau e Rahela a Iosefa, ti pehe atu ai a Iakopo kia Lapana, Toka au ke fano ke he haku motu; mo e haku kelekele.
26 Tuku mai kia au haku tau hoana mo e haku a fanau, ko lautolu ne fekafekau ai au kia koe, ti fano na au; ha kua iloa ni e koe haku a gahua ne fekafekau aki au kia koe.
27 Ti pehe mai ai a Lapana kia ia, Kaeke kua ofania e koe au, nofo mau ai a koe, ha kua kitia tonuhia e au kua fakamonuina e Iehova au ha ko koe.
28 Kua pehe mai foki a ia, Fakatonu mai a kia au hau a totogi; to ta atu ni e au kia koe.
29 Ti pehe atu ai a ia kia ia, Kua iloa ni e koe e tau mena ne fekafekau atu ai au kia koe, mo e tau manu hāu ne toka ia au.
30 Ha kua gahoa hau a tau mena he nakala hau au, ka e tupu ni, ti kua loga tuai ainei, kua fakamonuina e Iehova a koe ha ko au; ka ko ainei to kumi, a fe kia e au ha mena mo e haku a magafaoa?
31 Ti pehe mai ai a ia, Ko e heigoa e mena ke ta atu e au kia koe? Ti pehe atu ai a Iakopo kia ia, Ua ta mai e koe ha mena kia au; to liu foki fagai e au hau a fuifui, mo e leveki ai, kaeke ke eke e koe e mena nai māku:
32 To faifano au ke he aho nai ke he vaha loto he hau a fuifui oti kana, to tuku kehe foki e au e tau manu oti kua ilaila mo e pulepule; ko e tau mamoe uli oti he fuifui, mo e tau koti oti kua pulepule mo e ilaila, to eke ia mo totogi haku.
33 Ko e mena ia ke iloa ai haku tututonu ke he taha aho, ka hoko mai haku a totogi ki mua hau; ko e tau koti oti kua nakai ilaila po ke pulepule, mo e tau mamoe oti kua nakai uli, to talahaua ia kua kaiha e au.
34 Ti pehe mai ai a Lapana, Kitiala, kua loto au kia eke tuga ne tala mai e koe.
35 Ko e aho ia ni ne tuku kehe ai e tau koti tane oti ne ivaiva mo e pulepule, mo e tau koti fifine oti ne ilaila mo e pulepule, katoa mo e tau koti oti ne toka ai ha mena tea, mo e tau mamoe oti foki kua uli; ti tuku atu ai e ia ke he hana tau tama tane.
36 Ti tuku e ia e vaha ke vevehe aki ha lautolu mo Iakopo, lata e vaha ia mo e fenoga po tolu; ka e leveki e Iakopo e tau fuifui ne toe a Lapana.
37 Ti uta ai e Iakopo e tau akau ikiiki, ko e lipene mata, mo e lusa mo e alemoni; ti fole ai e ia e kili fakakupukupu kia kitia ai e tea he tau akau.
38 Ti tuku ai e ia e tau akau ne fole e ia ke he liu mena ne fa inu ai, ki mua he fuifui, ka o mai e fuifui ke inu ai, kia fatu ai e fuifui ka o mai ke inu.
39 Ti fatu ai e fuifui ki mua he tau akau, kua fanau ai e tau manu ivaiva, mo e ilaila, katoa mo e pulepule.
40 Kua tuku kehe foki e ia e tau punua mamoe, kua fakahagao atu foki e ia e tau mata he fuifui ke he tau manu ivaiva, mo e tau manu uli oti he fuifui a Lapana; ne tuku kehe foki e ia hana tau fuifui, ka e nakai tuku fakalataha mo e fuifui a Lapana.
41 Ka fatu e tau manu malolo, ti tuku ai e Iakopo e tau akau ke he mena kua fa inu ai, ki mua he tau manu, kia fatu ai ki mua he tau akau.
42 Kaeke ko e tau manu kua lolelole, ti nakai tuku ai e ia e tau akau; ti ko e tau manu lolelole, ha Lapana ia, ka ko e tau manu malolo, ha Iakopo ia.
43 Ti fakaloga lahi ni e tau mena he tagata ia, ha ha ia ia e tau mamoe loga, mo e tau fekafekau fifine, mo e tau fekafekau tane, mo e tau kamela, katoa mo e tau asini.