Kenese 31:1-55
31 NE logona foki e ia e tau kupu he tau tama tane a Lapana, kua pehe, Kua uta tuai e Iakopo e tau mena oti he matua tane ha tautolu; ko e tau mena foki he matua tane ha tautolu ne moua ai e ia e lilifu lahi oti na.
2 Ne kitia foki e Iakopo e mata a Lapana, kitiala, kua nakai tuai fiafia mai kia ia tuga ne vaha fakamua.
3 Kua pehe mai foki a Iehova kia Iakopo, Liu ā koe ke he motu he hau a tau matua, mo e hau a faoa, to fakalataha foki au mo koe.
4 Ne fekau foki e Iakopo a Rahela mo Lea, ke o age a laua kia ia ke he fonua ha i ai hana fuifui.
5 Ti pehe atu a ia kia laua, Kua kitia e au e mata he matua tane ha mua kua nakai tuai fiafia mai kia au tuga ne vaha fakamua; ka e fakalataha mo au e Atua he haku matua.
6 Kua iloa foki e mua kua fekafekau au ke he matua tane ha mua mo e haku a malolo oti kana.
7 Kua fakavai mai foki he matua tane ha mua kia au, lagahogofulu ni ne hiki e ia haku a totogi; ka e nakai tuku age he Atua kia ia ke fakakelea e ia au.
8 Ka pehe mai a ia, Ko e tau manu ilaila ko e hau a totogi ia, ti fanau mai ai he tau manu oti e tau punua ilaila; ka pehe mai a ia, Ko e tau manu ivaiva ko e hau a totogi ia, ti fanau mai ai he tau manu oti e tau punua ivaiva.
9 Kua uta kehe pihia he Atua e tau manu he matua tane ha mua, mo e foaki mai kia au.
10 Ko e vaha foki ne holi ai e tau manu, ne haga atu mo e kitia e au ke he haku a miti, kitiala, ko e tau manu tane ne hopo ki luga he tau manu, kua ivaiva a lautolu, mo e ilaila, mo e pulepule.
11 Kua pehe mai foki e agelu he Atua kia au ke he miti, Iakopo na e; ti pehe atu au, Ko au hanai.
12 Ti pehe mai a ia, Haga atu ā, mo e kitia e koe, ko e tau manu tane oti kua hopo ki luga he tau manu kua ivaiva, mo e ilaila, mo e pulepule a lautolu; ha kua kitia tuai e au e tau mena oti kua eke e Lapana kia koe.
13 Ko au ko e Atua a Peteli, ko e mena haia ne fakauku ai e koe e maka mo fakamailoga, ko e mena haia ne omonuo ai a koe e omonuo kia au; hanai, kia matike ā, ti toka e koe e motu nai, ka e liu atu a koe ke he motu he hau a faoa.
14 Ti tali mai ai e Rahela mo Lea, kua pehe mai kia ia, Na toe agaia kia ha veveheaga koloa, po ke tufaaga ma maua ke he kaina he matua tane ha maua?
15 Nakai kia eke e ia a maua ko e tau tagata kehe kia ia? ha kua fakafua tuai e ia a maua, kua oti pito foki ha maua a tau tupe he eke e ia.
16 Ha ko e tau koloa oti kua uta kehe he Atua he matua tane ha maua, ko e ha maua ia. mo e ha maua a fanau ia; hanai, ko e tau mena oti kua tala mai e Atua kia koe, kia eke ā e koe.
17 Ti matike ai a Iakopo kua fakaheke hana tau tama mo e hana tau hoana ki luga he tau kamela;
18 Kua takitaki kehe foki e ia hana tau manu oti, mo e hana tau koloa oti kua moua e ia, ko e tau manu ne moua e ia, ne moua e ia i Patanarama; ko e fano ne fai kia Isaako hana matua tane i Kanana.
19 Ne fano foki a Lapana ke hifi hana tau mamoe; ti kaiha ni e Rahela e tau tupua he matua tane hana.
20 Ne hola kaiha a Iakopo ia Lapana e tagata Suria, he nakai tala age a ia kia ia ko e hola ne fai a ia.
21 Ati hola ai a ia mo e hana tau mena oti; ne matike a ia mo e fano ke he fahi atu he vai lele; ti gutu atu a ia ke he mouga ko Kiliata.
22 Kua hoko ke he aho tolu, ti tala age ai kia Lapana, kua hola tuai a Iakopo.
23 Ti fakapotopoto ai e ia hana tau matakainaga mo e tutuli a ia po fitu; ti moua ai a ia ke he mouga ko Kiliata.
24 Ne ahi e Atua a Lapana e tagata Suria ke he miti ke he po, kua pehe mai kia ia, A koe, neke vagahau atu a koe kia Iakopo ha kupu mitaki, po ke kelea.
25 Ne moua e Lapana a Iakopo. Kua fakatu foki e Iakopo hana fale ie ke he mouga; ko Lapana foki mo e hana tau matakainaga, kua fakatu ha lautolu a fale ke he mouga ko Kiliata.
26 Ati pehe atu a Lapana kia Iakopo, Heinoa e mena nai kua eke e koe, he hola kaiha a koe ia au, mo e uta haku a tau tama fifine tuga ne fofo he kau?
27 Ko e ha ne hola fufu ai a koe, mo e hola kaiha ai a koe ia au? ti nakai talahau mai e koe kia au, kia fakafano atu e au a koe mo e fiafia, mo e lologo, mo e topa, mo e kitara;
28 Ti nakai toka e koe au ke figita haku a tau tama tane mo e haku a tau tama fifine. Hanai, kua goagoa a koe ke he mena kua eke nai e koe.
29 Na maeke foki ia au ke fakakelea a mutolu; ka kua vagahau mai e Atua he matua tane ha mutolu kia au ne po, kua pehe mai, A koe, neke vagahau a koe kia Iakopo ha kupu mitaki, po ke kelea.
30 Hanai foki, kua fano tuai a koe he lahi hau a manako ke he kaina he hau a matua tane; ka ko heigoa kia e mena ne kaiha ai e koe haku tau atua?
31 Ti tali mai ai a Iakopo kia Lapana, kua pehe mai, ne hola au he matakutaku; ha kua pehe au, neke fofo e koe hau a tau tama fifine ia au.
32 Ko ia ka moua e koe ha ne toka ki ai hau a tau atua, aua neke moui a ia; kia kitekite a koe ki mua he tau matakainaga nai ha tautolu po ke heigoa e mena hāu kua toka ia au, ti uta ni e koe. Ha ko e mena nakai iloa e Iakopo kua kaiha e Rahela.
33 Ti hu atu ai a Lapana ke he fale ie a Iakopo, mo e fale foki a Lea, katoa mo e tau fale he tau fekafekau fifine tokoua, ka e nakai moua e ia. Ti hau ai a ia he fale a Lea mo e hu atu ke he fale a Rahela.
34 Ka kua uta tuai e Rahela e tau tupua, mo e tuku ke he nofoa kamela, kua nofo foki a ia ki luga ha lautolu. Ne kumikumi foki e Lapana ke he fale oti, ka e nakai moua.
35 Ti pehe atu a ia ke he hana matua tane, Haku iki na e, aua neke ita a koe ha kua nakai maeke ia au ke matike ki mua hau; ha kua mena tuai au tuga ne mahani he tau fifine. Kua kumi ni e ia, ka e nakai moua e tau tupua.
36 Ti ita ai a Iakopo, kua totoko atu kia Lapana; ne vagahau atu a Iakopo kia Lapana, kua pehe atu, Ko heigoa haku a hala? Ko heigoa haku a mahani hepehepe he tutuli fakalahi mai ai e koe au?
37 Hanai, kua oti he kumi e koe haku tau mena oti, ti ko e fe kia ha mena he tau mena oti he hau a kaina kua moua e koe? Kia tuku mai a ki mua haku tau matakainaga, mo mua hau a tau matakainaga, kia fakafili mai e lautolu a taua.
38 Uafulu e tau tau ia ne nofo ai au ia koe; kua nakai fanau maua hau a tau mamoe fifine, mo e hau a tau koti fifine, kua nakai kai foki e au e tau mamoe tane he hau a fuifui.
39 Ko e tau manu ne hēhē nakai uta ai e au kia koe; ne totogi e au ni; ko e tau mena ne kaiha ke he aho, po ke kaiha ke he po, ne kumi mai e koe kia au.
40 Na pehe ni au; ne kai au he vevela ke he aho, mo e makalili ke he po; nakai iloa foki haku tau mata e mohe.
41 Na pihia ai au ke he hau a kaina ke he tau tau ne uafulu, ne hogofulu ma fa e tau tau ne fekafekau ai au kia koe ke moua hau a tau tama fifine tokoua, ti ono e tau ia mo e hau a tau manu; laga hogofulu foki ne hiki e koe haku a totogi.
42 Aua he fakalataha mo au e Atua he haku matua tane, ko e Atua a Aperahamo, ko ia kua matakutaku ki ai a Isaako, po kua fakafano kehe e koe au mo e nakai fai mena au. Kua fioia he Atua haku a matematekelea, mo e gahua he haku tau lima, ne akonaki foki e ia a koe ne po.
43 Ti tali mai ai a Lapana kia Iakopo, kua pehe mai, Ko e tau fifine nai ko e haku a tau tama fifine ia, ko e fanau foki nai ko e haku a fanau ia, ko e tau manu nai foki ko e haku tau manu ia, ko e tau mena oti foki kua kitia atu nei e koe ko e haku haia; ko heigoa foki taha mena ke eke e au ke he aho nai ke he haku tau tama fifine nai, po ke ha laua a fanau ne fanau mai e laua?
44 Hanai, hau a, kia eke e taua e maveheaga, ko taua mo koe; kia eke mo fakamoli kia taua tokoua.
45 Ti toto ai e Iakopo e maka, mo e to ke eke mo fakamailoga.
46 Na pehe atu foki a Iakopo ke he hana tau matakainaga, Kia fakapotopoto mai e tau maka, ti ta mai ai e lautolu e tau maka, mo e eke ai e tanakiaga maka; ti kai mena ai a lautolu ki luga he tanakiaga maka.
47 Ti fakahigoa ai e Lapana ko Ika setuta; ka kua fakahigoa ai e Iakopo ko Kaleta.
48 Ti pehe atu foki a Lapana, Kia eke e tanakiaga maka nai mo fakamoli kia taua tokoua ke he aho nai; ko e mena ia ne ui ai e higoa he mena ia ko Kaleta;
49 Mo Misepa ha kua pehe age a ia, Kia kitekite mai a Iehova kia taua tokoua, ka nonofo kehekehe a taua.
50 Kaeke ke mahani kelea a koe ke he haku tau tama fifine, po ke lafilafi e koe e falu a hoana ke he tau tama fifine haku, nakai fai tagata ia taua, kitiala, ko e Atua kua fioia a taua tokoua.
51 Ti pehe atu a Lapana kia Iakopo, Kitiala, ko e tanakiaga maka nai, kitiala foki, ko e fakamailoga nai kua fakatu e au ke he vaha loto ha taua;
52 Kia eke e tanakiaga maka nai mo fakamoli, kia eke foki e fakamailoga nai mo fakamoli, to nakai lakafia e au e tanakiaga maka nai ke fano kia koe ti nakai lakafia foki e koe e tanakiaga maka nai, mo e fakamailoga nai ke hau kia au, ke eke ai ha mena kelea.
53 Ko e Atua a Aperahamo, ko e Atua foki a Nakori, ko e Atua he matua tane ha laua, kia fakafili mai e ia kia taua. Ti omonuo ai a Iakopo kia ia kua matakutaku ki ai hana matua tane, ko Isaako.
54 Ti keli ai e Iakopo e tau manu ke he mouga, kua ui atu foki ke he hana tau matakainaga ke o mai ke kai mena ai; ti kai mena ai a lautolu, mo e nonofo ai ke he mouga ke he po ia.
55 Ti uhu matike a Lapana mogoho pogipogi, kua taufigita hana tau tama tane mo e hana tau tama fifine, kua fakamonuina foki e ia a lautolu; ti fano ai a Lapana mo e liu ke he hana motu.