Kenese 32:1-32
32 NE fano a Iakopo he hana fenoga, kua feleveia mo ia e tau agelu he Atua.
2 Na pehe foki a Iakopo he kitia e ia a lautolu, Ko e kau he Atua hanā; ti ui e ia e higoa he mena ia ko Mahanaima.
3 Ne fakafano atu foki e Iakopo e tau fekau ke mumua kia ia ke ahi Esau hana matakainaga, ke he motu ko Seira, ko e motu a Etoma.
4 Ne poaki atu foki a ia kia lautolu, kua pehe atu, Kia pehe atu a mutolu ke he haku iki ko Esau; Kua poaki mai hau a fekafekau ko Iakopo, Kua nofo au mo Lapana, ti kua nofo ai au ato hoko ke he vaha nai;
5 Ha ha ia au foki e tau povi, mo e tau asini, mo e tau mamoe, mo e tau fekafekau tane, mo e tau fekafekau fifine; kua fekau atu foki e au ke tala atu ke he haku iki, kia ofania ai e koe au.
6 Ti liliu atu kia Iakopo a lautolu ne fekau atu e ia, kua pehe mai, Ne hohoko atu a mautolu ke he matakainaga hau ko Esau, ha ne hau foki a ia, ti tokofa e teau tagata kua o mai mo ia, ke fonofono a koe.
7 Ti matakutaku lahi ai a Iakopo mo e fakaatukehe; ti veveheua ai e ia e tau tagata ha ia ia, katoa mo e tau fuifui mamoe, mo e tau fuifui povi, mo e tau kamela ke he ua a vahega;
8 Kua pehe age foki a ia, Kaeke ke hau a Esau ke he taha vahega, mo e keli ai, ti hao ai e vahega kua toe.
9 Na pehe atu foki a Iakopo, Ko e Atua na e, ko e Atua he haku matua tane ko Aperahamo, ko e Atua foki he haku matua tane ko Isaako, ko Iehova, ne pehe mai kia au, Kia liu a koe ke he hau a motu, mo e hau a faoa, to eke fakamitaki e au a koe;
10 Kua nakai aoga au mo e tau mena fakaalofa oti, mo e tau kupu moli oti kua fakahoko mai e koe ke he hau a fekafekau; ha kua hau au he fahi atu a Ioritana na, mo e haku a tokotoko noa ni; ka ko ainei kua hau au mo e na vahega ua.
11 Kua ole atu au kia laveaki e koe au mai he lima he haku a matakainaga, ko e lima ni a Esau; ha kua matakutaku au kia ia, neke hau a ia mo e keli au, katoa mo e matua fifine mo e fanau.
12 Ne pehe mai foki a koe kia au, To eke fakamitaki atu ni e au a koe, to fakatokologa foki e au hau a fanau, ke tuga e oneone he tahi, kua nakai maeke ke totou he loga.
13 Ne nofo ai foki a ia ke he po ia; ti uta ai e ia mai he tau mena ha ha ia ia e fakaalofa ke he hana matakainaga ko Esau;
14 Ko e tau koti fifine ne ua e teau, mo e tau koti tane ne uafulu; ko e tau mamoe fifine ne ua e teau, mo e tau mamoe tane ne uafulu,
15 Ko e tau kamela kua fanau ne tolugofulu mo e tau punua he lautolu ni; ko e tau povi fifine fagofulu ni, mo e tau povi tane hogofulu ni, ko e tau asini fifine ne uafulu, mo e tau punua asini hogofulu ni.
16 Ti tuku atu e ia e tau fuifui takitaha ke he tau lima he hana tau fekafekau; kua pehe atu foki a ia ke he hana tau fekafekau, Kia mumua atu a mutolu ki mua haku, mo e vevehe fakavahavaha e tau fuifui.
17 Ne tala age foki a ia kia ia ne mua, kua pehe age, Ka feleveia a mua mo Esau e matakainaga haku, ti huhu mai a ia kia koe pehe, Ko e fekafekau ha hai a koe? Fano a koe ki fe? Ha hai kia e tau mena na kua mumua kia koe.
18 Ti pehe atu ai a koe kia ia, Ko e tau mena haia he hau a fekafekau ko Iakopo; ko e mena fakaalofa kua fakafano mai ke he haku iki ko Esau; kitiala, ko ia foki ha ne mui mai kia mautolu.
19 Ne tala age pihia foki a ia kia ia ne tokoua aki, mo ia ne tokotolu aki, mo lautolu oti kana ne mumui ke he tau fuifui, kua pehe atu, Kia pihia ni ha mutolu a vagahau atu kia Esau ka feleveia a mutolu mo ia.
20 Kia pehe atu foki a mutolu, Kitiala, ha ne mui mai hau a fekafekau ko Iakopo kia mautolu. Ha ko e mena pehe a ia, To fakalotomafola e au a ia ke he mena fakaalofa kua mumua atu kia au, ka mole atu ia ti kitia ai e au hana fofoga; po ke ne talia nakai e ia au.
21 Ti mumua atu kia ia e mena fakaalofa; ka ko ia ne nofo a ia ke he heaga api he po ia.
22 Ne matike foki a ia ke he po ia kua uta e na hoana tokoua hana, mo e na fekafekau fifine tokoua hana, mo e tau tama tane hana ne tokohogofulu ma taha, ti o atu ke he fahi atu ke he hala potaki ko Iapoka.
23 Ne uta e ia a lautolu, mo e fakahoko atu a lautolu ke he fahi atu he vai lele, ne uta foki ki ai hana tau mena.
24 Ti kua toe a Iakopo tokotaha ni; ti taufagatua ai a laua mo e taha tagata ato ahogia.
25 Ne kitia foki e ia kua nakai kautu a ia kia ia, ti piki ai a ia ke he patupula hana, ti mahui ai e patupula a Iakopo he taufagatua a laua mo ia.
26 Ti pehe mai a ia, Toka au ke fano, ha kua aho tuai. Ka e pehe atu a ia kia ia, Nakai toka e au e koe ke fano ato fakamonuina e koe au.
27 Ti pehe mai a ia, Ko hai e higoa hau? Ti pehe atu a ia, ko Iakopo.
28 Ti pehe mai a ia, Nakai tuai totoku e higoa hau ko Iakopo, ka ko Isaraela ni, ha kua tuga ne iki ne laga a koe mo e Atua katoa mo e tau tagata, ti kautu e koe.
29 Ti huhu atu e Iakopo, kua pehe atu, Talahau mai a hau a higoa. Ti pehe mai a ia, Ko e ha ne huhu mai ai e koe haku higoa? Ti fakamonuina ai e ia a ia ke he mena ia.
30 Ti ui ai e Iakopo e higoa he mena ia ko Penieli; ha kua pehe a ia. Kua kitia tuai e au e Atua kua fehagaoaki a maua mo ia, ti fakamoui ni au.
31 Ne hake foki e la he fina age a ia i Penueli, ne koki fakateto foki hana hui.
32 Ko e mena ia kua nakai kai he fanau a Isaraela e hokohoko ne memege, ha he patupula kua hoko ke he aho nai; ha kua piki a ia ke he patupula a Iakopo ke he hokohoko ne memege.