Kenese 34:1-31
34 NE fano a Tina ko e tama fifine a Lea ne fanau e ia kia Iakopo, ke matamata ke he tau fifine he motu.
2 Ne kitia foki e tama a Hamora, ko e iki e motu, ko e tagata Hivi a ia ko Sikema, ti uta e ia a ia, kua takoto mo ia, mo e fakakelea e ia a ia.
3 Ne pipiki hana loto kia Tina ko e tama fifine a Iakopo, kua loto ni a ia ke he tamafine, kua vagahau foki a ia mo e fakaalofa ke he tamafine.
4 Ne pehe atu foki a Sikema ke he hana matua tane ko Hamora, kua pehe atu, Kia ta mai e koe e tamafine ia māku mo hoana.
5 Kua logona foki e Iakopo kua fakakelea e ia a Tina hana tama fifine; ha he vao foki hana tau tama tane mo e tau manu hana, ti fakamate ai a Iakopo ato o mai a lautolu.
6 Kua hau foki a Hamora e matua tane a Sikema kia Iakopo ke vagahau mo ia.
7 Ne o mai foki e tau tama tane a Iakopo he vao he logona ai e lautolu; ne mamahi foki e tau loto ha lautolu, kua ita lahi ni a lautolu, ha kua eke e ia e mena kelea kia Isaraela, he takoto a ia mo e tama fifine a Iakopo; ha ko e mena nakai lata ia ke eke.
8 Ti vagahau mai a Hamora kia lautolu, kua pehe mai, Ko e tama haku, ko Sikema, kua manako lahi a ia ke he tama fifine ha mutolu; kia ta mai la e mutolu a ia mo hoana hana.
9 Kia fakafetauaki a tautolu; kia ta mai ha mutolu a tau tama fifine ma mautolu, to ta atu foki ha mautolu a tau tama fifine ma mutolu.
10 To nonofo foki a mutolu mo mautolu; ha i mua ha mutolu e kelekele; kia nonofo ai a mutolu mo e fefakafuaaki ai, mo e moua fonua i ai.
11 Ne pehe mai foki a Sikema ke he matua tane he fifine, mo e lafu tugane hana, Kia fakaalofa mai a mutolu kia au; ko e tau mena foki ke tala mai e mutolu kia au, to ta atu ni e au.
12 Talahau la e fakafua ke lahi mahaki ni, mo e tau mena fakaalofa, to ta atu ni e au e tau mena ka talahau mai a mutolu kia au; ka e ta mai ni e tamafine kia au mo hoana haku.
13 Ti tali atu ai e tau tama a Iakopo kia Sikema mo Hamora hana matua tane, mo e fakavai, kua vagahau atu ai ha kua fakakelea e ia a Tina ha lautolu a mahakitaga;
14 Kua pehe atu kia laua, Nakai maeke ia mautolu e mena na, ke ta atu ha mautulu a mahakitaga ke he tagata kua nakai peritome; ha ko e mena fakamā haia kia mautolu;
15 Taha ni e mena ke fanogonogo ai a mautolu kia mutolu; kaeke ke tuga a mautolu a mutolu, ke peritome e tau tane oti ha mutolu;
16 Ti ta atu ai ha mautolu a tau tama fifine kia mutolu, to ta mai ai foki e mautolu ha mutolu a tau tama fifine ma mautolu; ti nonofo foki a tautolu mo mutolu, ti eke a tautolu mo motu taha.
17 Kaeke ke nakai fanogonogo mai a mutolu kia mautolu ke peritome a mutolu, ti uta ai e mautolu ha mautolu a tama fifine, ti o na mautolu.
18 Na mitaki ha lautolu a tau kupu kia Hamora, mo Sikema e tama a Hamora.
19 Ti nakai mule foki e fuata ke eke e mena ia, ha kua fiafia a ia ke he tama fifine a Iakopo, kua mua foki he fakalilifu kia ia ke he magafaoa oti he hana matua tane.
20 Ti o ai a Hamora mo Sikema hana tama ke he gutuhala he maga ha laua, ti vagahau atu ai ke he tau tagata he maga ha laua, kua pehe atu,
21 Ko e tau tagata na kua totonu a lautolu kia tautolu; hanai, mitaki ke nonofo ai a lautolu ke he kelekele mo e fefakafuaaki ai; ha ko e kelekele, kitiala, kua laulahi mahaki ia ke nonofo ai a lautolu; ti ta mai e tautolu ha lautolu a tau tama fifine mo tau hoana ha tautolu, to ta atu foki ha tautolu a tau tama fifine ma lautolu.
22 Taha ni e mena ke maeke ai e tau tagata ia ke fanogonogo kia tautolu ke nonofo ai mo tautolu ke eke mo motu taha; ka peritome e tau tane oti ha ia tautolu, tuga ne peritome ni a lautolu.
23 Ko e ha lautolu a tau mena, mo e ha lautolu a koloa, mo e ha lautolu a tau manu oti, nakai kia eke ia ma tautolu? Kia fanogonogo a tautolu kia lautolu ti nonofo ai ni a lautolu mo tautolu.
24 Ti omaoma a lautolu kia Hamora mo Sikema hana tama, ko lautolu oti kana ne o atu ke he gutuhala he hana maga; ne peritome foki e tau tane oti, ko lautolu oti ne o atu ke he gutuhala he hana maga.
25 Kua hoko foki ke he aho tolu, kua mamahi a lautolu, ti toto ai e na tama tokoua a Iakopo, ko Simeona mo Levi, ko e na tugane a Tina, takitaha hana a pelu, ti feoho fakamalolo atu a laua ke he maga, mo e keli e tau tane oti.
26 Ne keli foki e laua a Hamora mo Sikema hana tama ke he pelu, kua uta foki e laua a Tina he fale a Sikema, ti o na lautolu.
27 Ne o atu foki e tau tama a Iakopo kia lautolu ne keli mo e fofo e tau mena he maga, ha kua fakakelea e lautolu ha lautolu a mahakitaga.
28 Ne uta foki e lautolu ha lautolu a tau mamoe, mo e ha lautolu a tau povi, mo e ha lautolu a tau asini, mo e tau mena ha he maga, mo e tau mena ha he fonua,
29 Katoa mo e tau koloa oti ha lautolu, ti fofo foki e lautolu e tau tama ikiiki oti ha lautolu, mo e tau fifine ha lautolu, ne fofo foki e tau mena oti ha he tau fale.
30 Ti pehe atu a Iakopo kia Simeona mo Levi, Kua fakalavelave e mua au, ke vihiatia ai au e lautolu kua nonofo ke he motu, ko e faoa Kanana, mo e faoa Perisi, kua tokogaogao foki a tautolu, to fakapotopoto fakalataha mai a lautolu ke tau kia au, to keli e lautolu au, ti fakahiku na au, ko au ni, mo e haku a magafaoa.
31 Ti pehe mai ai a laua, Ne eke mo ha e ia ha mautolu a mahakitaga ke tuga ne fifine fakataka?