Kenese 35:1-29
35 KUA pehe mai e Atua kia Iakopo, Matike ā, kia hake a koe ki Peteli mo e nofo ai; ti eke ai e koe e fatapoa ke he Atua ne kitia e koe ka kua hola kehe a koe ia Esau e matakainaga hau.
2 Ti pehe age ai a Iakopo ke he hana magafaoa mo lautolu oti kana ha ia ia, Toka kehe ā e tau atua kehe ha ia mutolu, ti fakamea e mutolu a mutolu, ti āki e tau tapulu ha mutolu ka e totogi;
3 Kia matike a tautolu ke o hake ki Peteli; to eke ai e au e fatapoa ke he Atua ne tali mai kia au ke he aho ne matematekelea ai au, ha ia au foki a ia ke he puhala ne fano ai au.
4 Ti āge ai e lautolu kia Iakopo e tau atua kehe oti ha ia lautolu, mo e tau mena tau teliga ha he tau teliga ha lautolu, ti fufu ai e Iakopo ki lalo he aluna kua tata age ki Sikema.
5 Ne o kehe atu ai a lautolu; ha i ai e matakutaku ke he Atua ke he tau maga oti ne tu takai kia lautolu, ti nakai tutuli e lautolu e fanau a Iakopo.
6 Kua hoko atu a Iakopo ki Lusa, (ko Peteli foki haia), ke he motu ko Kanana, ko ia katoa mo e tau tagata oti ha ia ia.
7 Kua ati ai e ia e fatapoa, ti fakahigoa ai e ai e mena ia ko Elipeteli, ha ko e mena ia ne fakakite mai ai e Atua kia ia he hola kehe a ia he hana matakainaga.
8 Ti mate ai a Tapora ko e fekafekau ne leveki a Repeka ke he vaha tote, ti tanu ai a ia ki lalo hifo a Peteli, ki lalo he aluna, ti fakahigoa ai ko Aluna-pakuta.
9 Kua liu foki fakakite mai e Atua kia Iakopo he hau a ia i Patana-rama, ti fakamonuina a ia.
10 Kua pehe mai e Atua kia ia, Ko Iakopo hau a higoa; nakai tuai ui a koe ko Iakopo, ka ko Isaraela, ko e hau a higoa haia; ti ui ai e ia hana higoa ko Isaraela.
11 Kua pehe mai e Atua kia ia, Ko au ko e Atua mana, kia fanau a koe mo e fakatokologa; ko e motu, mo e tau motu kehekehe loga ke tutupu mai ia koe; ke fanau mai foki e tau patuiki ia koe.
12 Ko e motu ne foaki e au kia Aperahamo, mo Isaako, kua foaki tuai e au kia koe; ko e hau a fanau foki ka mole atu a koe, to foaki atu e au ki ai e motu.
13 Ti haele hake e Atua ia ia, mai he mena ne vagavagahau ai a laua mo ia.
14 Ti fakatu ai e Iakopo e fakamailoga ke he mena ne vagavagahau ai a laua mo ia, ko e fakamailoga maka; ne liligi hifo foki e ia ki ai e poa inu, ne liligi foki e lolo ki ai.
15 Kua fakahigoa e Iakopo e mena ne vagavagahau ai a laua mo e Atua, ko Peteli.
16 Kua fano kehe a ia i Peteli, kua teitei hoko atu ki Efarata, ti mamahi ai e fatu a Rahela, kua uka lahi ni hana fanauaga.
17 Ati oti ke e uka lahi hana fanau mai, ti pehe age kia ia e fifine fakafanau, Ua matakutaku a koe, ha ko e mena moua foki e koe e tama tane nai.
18 Ha ha ne mole atu hana moui (ha ko e mena mate ni a ia), ti ui ai e ia hana higoa ko Penani, ka e ui a ia he hana matua tane ko Peniamina.
19 Kua mate a Rahela, ti tanu ni ke he puhala ki Efarata, ko Petelehema foki haia.
20 Kua fakatu e Iakopo e fakamailoga ke he hana tukuaga; ko e fakamailoga haia he tukuaga a Rahela kua hoko ke he aho nai.
21 Ti fano ai a Isaraela kua fakatu hana fale ie ke he fahi atu he kolo, ko Eteru.
22 Ne nofo a Isaraela ke he motu ia, ti fano a Reupena mohe mo Pila e hoana fakahoa he hana matua tane; ne logona ai foki e Isaraela. Ko e tau tama tane a Iakopo, ne tokohogofulu ma ua a lautolu.
23 Ko e tau tama a Lea; ko e tama uluaki a Iakopo ko Reupena, mo Simeona, mo Levi mo Iuta, mo Isakara, mo Sepulona.
24 Ko e tau tama a Rahela; ko Iosefa, mo Peniamina.
25 Ko e tau tama a Pila e fekafekau fifine a Rahela; ko Tano, mo Nafatali.
26 Ko e tau tama a Silepa e fekafekau fifine a Lea; ko Kato mo Asera; ko e tau tama tane ia ne fanau kia Iakopo i Patanarama.
27 Kua hoko atu a Iakopo kia Isaako hana matua tane i Mamere i Kiriataarapa (ko Heperona haia), ne nonofo ai a Aperahamo mo Isaako.
28 Ko e tau aho a Isaako, ne moui ai a ia, ko e taha teau ia e tau, ti valugofulu e tau.
29 Ti fakaoti ai e fafagu a Isaako, kua mate a ia, kua fakalataha atu ke he hana faoa, kua motua tuai, kua leva hana moui; ne tanu foki a ia e Esau mo Iakopo ko e tau tama hana.