Kenese 37:1-36
37 KUA nofo a Iakopo ke he motu ne nofo fakapaea ai hana matua tane, ko e motu ko Kanana haia.
2 Ko e matohiaga hanai a Iakopo. Ne hogofulu ma fitu e tau tau a Iosefa, ha i ai a ia mo e hana tau matakainaga, kua leveki e fuifui, (ko ia foki ko e tama) fakalataha mo e tau tama a Pila, mo e tau tama a Silepa, ko e tau hoana ia he hana matua tane; ne uta e Iosefa ke he matua tane ha lautolu e tala ke he mahani kelea ha lautolu.
3 Ne mua e fakaalofa a Isaraela kia Iosefa ke he hana tau tama oti; ha kua motua a ia ke he vaha ne fanau ai a ia, ti eke e ia a tapulu loa māna.
4 Kua kitia hana tau matakainaga kua lahi e fakaalofa he matua tane ha lautolu kia ia, ka e tote ke he hana tau matakainaga oti kana, ti vihiatia ai e lautolu a ia, ti nakai maeke ia lautolu ke vagahau fakamitaki kia ia.
5 Kua miti e Iosefa e miti, kua fakamatala ke he hana tau matakainaga; ti au atu ai he vihiatia e lautolu a ia.
6 Kua pehe atu a ia kia lautolu, Fanogonogo mai a ke he miti nai ne miti ai au;
7 Kitiala, ne fuhi e tautolu e tau fuhi saito ke he fonua; kitiala foki, ne tu haku a fuhi saito, ne tu hake ni ki luga, kitiala foki, ne agaagai ki ai ha mutolu a tau fuhi saito mo e fakaveli a lautolu ke he haku a fuhi saito.
8 Ti pehe atu hana tau matakainaga kia ia, To eke kia a koe mo patuiki ha mautolu? To pule kia a koe kia mautolu? Ti kua au atu he vihiatia e lautolu a ia ha ko e hana tau miti, mo e hana tau kupu.
9 Kua liu foki miti e ia e taha miti, kua talahau atu ke he hana tau matakainaga, kua pehe atu, Kitiala, kua liu foki miti e au; kitiala, ko e la, mo e mahina, mo e tau fetu hogofulu ma taha, ne hufeilo mai a lautolu kia au.
10 Kua talahau atu e ia ke he hana matua tane, mo e hana tau matakainaga, ti akonaki ai hana matua tane kia ia, kua pehe mai kia ia, Heinoa e miti nai kua miti e koe? To o mai kia a mautolu, ko au mo e hau a matua fifine, mo e hau a tau matakainaga, ti fakaveli fakafohifo ke he kelekele ki mua hau?
11 Kua mahekeheke kia ia hana tau matakainaga, ka ko e hana matua tane kua taofi e ia e kupu.
12 Ne o atu e tau matakainaga hana ki Sikema, ke leveki ai e fuifui he matua tane ha lautolu.
13 Ti pehe atu a Isaraela kia Iosefa, Nakai kia leveki mamoe he tau matakainaga hau i Sikema? Hau la, ke fakafano atu e au a koe kia lautolu. Ti pehe mai a ia kia ia, Ko au hanai.
14 Ti pehe a ia kia ia, Fano a, ke ahi hau a tau matakainaga po ke monuina a lautolu, po ke monuina foki e tau mamoe, ti liu mai ai a koe kia au mo e talahau. Kua fakafano atu a ia he pahua a Heperona, ti hoko atu a ia ki Sikema.
15 Ne kitia a ia he taha tagata, kitiala, kua hehe tuai a ia ke he vao. Kua huhu e tagata kia ia, kua pehe, Kumi ha e koe?
16 Ti pehe atu a ia, Kua kumi e au haku tau matakainaga; kia talahau mai la kia au po ko fe ne leveki ai e lautolu e tau mamoe.
17 Kua pehe mai e tagata, Kua o kehe tuai a lautolu he mena nai, ha kua logona e au a lautolu ne pehe age, Kia o a tautolu ki Totana. Ti fano ai a Iosefa, kua mui atu ke he hana tau matakainaga, kua moua a lautolu i Totana.
18 Kua kitia fakamamao atu e lautolu a ia ke e nakai la tata mai a ia kia lautolu, ti pulega ai a lautolu ke kelipopo a ia.
19 Kua pehe age a lautolu ko e taha ke he taha, Kitiala, ha ne hau e tagata fa miti na;
20 Hanai, o mai a, kia kelipopo e tautolu a ia, mo e tuku a ia ke he taha luo, ti pehe a tautolu, Kua kai tuai a ia he taha manu favale; to kitia ai e tautolu po ke eke fefe hana tau miti,
21 Kua fanogonogo ai a Reupena, mo e laveaki a ia mai he tau lima ha lautolu, kua pehe atu, Aua neke keli e tautolu a ia.
22 Ti kua pehe atu a Reupena kia lautolu, Aua neke fakamaligi toto e tautolu; kia tuku a ia ke he luo nā ha he vao, ka e aua neke hoko atu ha lima kia ia. Na pihia a ia ke laveaki e ia a ia mai he tau lima ha lautolu, mo e liuaki atu a ia ke he hana matua tane.
23 Kua hoko atu a Iosefa ke he hana tau matakainaga, ti āki ai e lautolu ia Iosefa hana tapulu, ko e hana tapulu loa haia.
24 Ti uta e lautolu a ia mo e tuku ke he luo, ko e luo toka noa ni, nakai toka ai ha vai.
25 Ti nonofo ai a lautolu mo e kai mena; kua haga atu a lautolu mo e kitia, kitiala, ko e fenoga he tau tagata Isamaeli ne o mai i Kiliata, mo e tau kamela ha lautolu, kua uta mena manogi, mo e pasama, mo e muro, ha ne o a lautolu ke ta hifo ai ki Aikupito.
26 Kua pehe age a Iuta ke he hana tau matakainaga, To aoga ha ha ka keli e tautolu ha tautolu a matakainaga, mo e ufiufi hana toto.
27 O mai a, kia fakafua atu e tautolu a ia ke he tau tagata Isamaeli, ka e aua neke hoko e tau lima ha tautolu kia ia, ha ko e matakainaga ha tautolu a ia, mo e tino ni ha tautolu a ia; ti fanogonogo ai hana tau matakainaga kia ia.
28 Ti o age e tau tagata Mitiana, ko e tau tagata fakafua koloa, ti futi e lautolu mo e ta hake a Iosefa mai he luo, kua fakafua atu e lautolu a Iosefa ke he tau tagata Isamaeli ke he tau tupe ne uafulu; ti uta ai e lautolu a Iosefa ki Aikupito.
29 Kua liu mai a Reupena ke he luo, kitiala, nakai ha i ai a Iosefa ke he luo; ti hēhē ai e ia hana tau tapulu.
30 Ti liu atu ai a ia ke he hana tau matakainaga, kua pehe atu, Nakai ha i ai e tama, ka ko au to fano au ki fe?
31 Kua uta e lautolu e tapulu a Iosefa, kua keli e lautolu e koti, mo e fuifui e tapulu ke he toto.
32 Kua uta e lautolu e tapulu loa, mo e ta atu ke he matua tane ha lautolu, kua pehe atu, Ko e mena ē ne moua e mautolu, kia kikite ā e koe po ke tapulu hanai he tama hau po ke nakai.
33 Kua kitia e ia, kua pehe mai, Ko e tapulu ni he tama haku, kua kai tuai he manu favale a ia; kua hehe tuai a Iosefa.
34 Kua hehe e Iakopo hana tau tapulu, kua felevehi a ia ke he ie talatala; kua manu a ia po loga ha ko e hana tama.
35 Kua tutu mai hana tau tama tane oti kana, mo e hana tau tama fifine oti kana ke fakamafana a ia; ka e nakai fakai ke mafanatia ai a ia, kua pehe mai a ia, Ha ko e mena hifo au mo e manu ke he tukuaga ke he tama haku; ti tagi ai hana matua tane kia ia.
36 Kua fakafua atu he tau tagata Mitiana a ia i Aikupito kia Potifara ko e fekafekau pule a Farao, ko e takitaki he kau leoleo.