Kenese 39:1-23
39 KUA ta hifo a Iosefa ki Aikupito, kua fakafua a ia e Potifara ko e fekafekau pule a Farao ke e takitaki he kau leoleo, ko e tagata Aikupito, ne fakafua a ia mai he tau tagata Isamaeli ne ta hifo a ia ke he mena ia.
2 Ne fakalataha a Iehova mo Iosefa, ko e tagata monuina ni a ia; ha he fale a ia he hana iki ko e tagata Aikupito.
3 Ne kitia he iki hana kua fakalataha a Iehova mo ia, ko e tau mena oti foki ne eke e ia, kua fakamonuina e Iehova ke he hana lima.
4 Ne ofania a Iosefa e ia, ne fekafekau foki a ia kia ia; ti kotofa e ia a ia ke pule ke he hana magafaoa, ko e tau mena oti foki ha ia ia ne tuku atu e ia ke he hana lima.
5 Kua kamata mai he vaha ne kotofa ai a ia ke pule ke he hana magafaoa mo e tau mena oti hana, he fakamonuina ai e Iehova e magafaoa he tagata Aikupito ha ko Iosefa ni; ne monuina ia Iehova hana tau mena oti kana ha he fale, katao mo e tau mena ha he fonua.
6 Ne toka e ia hana tau mena oti ke he lima a Iosefa, ti nakai iloa e ia ha mena hana, ka ko e mena kai hokoia ne kai e ia. Ko e tagata tino mitaki a Iosefa, to mitaki hana mata.
7 Kua mole e tau mena ia, kua haga atu e hoana he hana iki kia Iosefa, ti kua pehe mai a ia, Kia momohe a taua.
8 Ka e nakai mafai a ia, kua pehe atu a ia ke he hoana he hana iki, Kitiala, kua nakai iloa he haku iki ha mena ha ia au ke he fale, ko e hana tau mena oti foki kua tuku mai e ia ke he haku lima.
9 Nakai ni ha i ai taha ke he fale nai ke mua kia au, nakai taofi e ia ha mena taha neke eke au, ko koe hokokoe ni, ha ko e hana hoana a koe; to maeke fefe ia au ke eke e, mena kelea lahi ia mo e hala au ke he Atua?
10 Kua vagahau a ia kia Iosefa ke he taha aho mo e taha aho, ka e nakai fanogonogo a ia kia ia ke mohe fakalataha mo ia, po ke nofo mo ia.
11 Kua hoko ke he taha aho, ne fano ai a ia ke he fale ke eke ai hana gahua, nakai ha he fale ha tagata taha he magafaoa ia.
12 Ti toto ai a ia ke he hana tapulu, kua pehe mai, Kia momohe a taua; ti toka atu ai e ia hana tapulu ke he hana lima ka e hola ni, kua fano ki fafo.
13 Kua kitia e ia kua toka e ia hana tapulu ke he hana lima, ka e hola ni ki fafo.
14 Ti ui ai a ia ke he tau tagata he hana magafaoa, kua vagahau atu kia lautolu, kua pehe, kikite la, kua ta mai e ia kia tautolu e tagata Heperu na ke fefeua kia tautolu; ne hau a ia kia au ke mohe mo au, ti hea ai na au mo e leo lahi.
15 Kua logona e ia kua fakatutū au mo e hea, ti toka ai e ia hana tapulu ia au, ka e hola ni, kua fano ki fafo.
16 Kua fakatoka e ia hana tapulu ia ia ni ato hau hana iki ke he hana fale.
17 Ti talahau atu ai kia ia e tau kupu nai, kua pehe, Ne hau kia au e fekafekau Heperu ne ta mai e koe kia mautolu, ke fefeua kia au.
18 Ti fakatutū na au mo e hea, ti toka ai e ia hana tapulu ia au, ka e hola ni ki fafo.
19 Kua logona hana iki e tau kupu he hana hoana ne talahau e ia kia ia, kua pehe, Ne eke pihia kia au e fekafekau hau; ti tupu ai hana ita.
20 Kua uta he iki a Iosefa a ia, kua tuku a ia ke he fale puipui, ke he mena ne lili ai e tau tagata lili he patuiki; ha i ai a ia ke he fale puipui.
21 Ka e fakalataha a Iehova mo Iosefa, ne fakaalofa foki a ia kia ia, mo e fakatupu e fakaalofa he iki he fale puipui kia ia.
22 Ne tuku atu he iki he fale puipui ke he lima a Iosefa e tau tagata lili oti kana ha he fale puipui; ko e tau mena oti ne eke e lautolu ke he mena ia, ko ia ni ne eke.
23 Nakai kikite he iki he fale puipui ke he taha mena taha ha ha he lima hana, ha kua fakalataha a Iehova mo ia; kua fakamonuina foki e Iehova e tau mena ne eke e ia.