Kenese 4:1-26
4 NE iloa e Atamu hana hoana ko Eva; ti fatu ai a ia, ti fanau ai e ia a Kaino, kua pehe age a ia, Kua moua tuai e au e tagata mai ia Iehova.
2 Kua liu foki fanau e ia, ko e hana matakainaga ko Apelu. Ko Apelu foki ko e leveki mamoe a ia; ka ko Kaino ko e gahua fonua a ia.
3 Kua hoko atu ke he katoatoa he tau aho, ti ta atu ai e Kaino e tau fua he fonua mo poa kia Iehova.
4 Ka ko Apelu kua ta atu e ia e tau punua uluaki he hana fuifui mamoe, mo e tau mena gako i ai. Kua kitekite mai a Iehova kia Apelu, katoa mo e hana poa;
5 Ka ko Kaino mo e hana poa, kua nakai kitekite a ia ki ai. Ti ita lahi ai a Kaino, kua fakatetefu hana mata.
6 Ti pehe mai a Iehova kia Kaino, Kua ita he ha a koe? Ti fakatetefu mai he ha e mata hāu?
7 Kaeke kua mahani mitaki a koe ti ha ia koe e fiafia, kaeke kua nakai mahani mitaki a koe, kua takoto tuai e hala ke he gutuhala. To hagao atu hana manako kia koe, to pule foki a koe kia ia.
8 Kua vagahau foki a Kaino kia Apelu hana matakainaga; ti hoko ai ke he magaaho ha ha he fonua a laua, ti oho atu ai a Kaino kia Apelu hana matakainaga, mo e kelipopo a ia.
9 Kua pehe mai a Iehova kia Kaino, Ko fe e matakainaga hau ko Apelu? Ti pehe atu ai a ia, Ai kitia e au; ko au kia ko e leoleo he haku a matakainaga.
10 Ti pehe mai a ia, Ko heigoa e mena ne eke e koe? Ko e leo he toto he matakainaga hau, kua tagi mai ia kia au mai he kelekele.
11 Ko e hanai, kua malaia a koe, mai he kelekele kua fakamaga mai he hana gutu, ke talia ai e toto he matakainaga hau mai he tau lima hau.
12 Ka gahua a koe ke he kelekele, nakai tuai fua fakamitaki mai hana tau fua māu; to eke a koe mo tagata hekepefano mo tagata paea fano ke he lalolagi.
13 Ti pehe atu a Kaino kia Iehova, Kua lahi haku a fakahala, nakai fahia au.
14 Kitiala, kua vega kehe e koe au ke he aho nai mai he fuga kelekele; to galo au ke he fofoga hau; to eke au mo tagata hekepefano mo tagata paea fano ke he lalolagi; ati oti ka e kelipopo au e lautolu oti ka moua au.
15 Kua pehe mai a Iehova kia ia, hanai, ka kelipopo e taha a Kaino, ti taui lagafitu ni a ia. Ti tuku atu ai e Iehova e fakamailoga kia Kaino, neke kelipopo e taha a ia ka moua a ia.
16 Ti fina atu ai a Kaino mai mua a Iehova, ne nofo foki a ia ke he motu ko Nota, ke he fahi uta a Etena.
17 Ne iloa e Kaino hana hoana, ti fatu ai a ia, ti fanau e ia a Enoka; kua ati e ia e māga ti fakahigoa ai e ia e maga ke he higoa ni he hana tama ko Enoka.
18 Ne fanau e Enoka a Irata; ne fanau e Irata a Mehuela. Ne fanau e Mehuela a Metusela; ne fanau e Metusela a Lameko.
19 Ko Lameko foki ne tokoua e hoana ne eke e ia; ko e higoa he taha ko Ata, ko e higoa foki he taha ko Sila.
20 Ne fanau foki e Ata a Iapalu; ko e tupuna foki a ia ha lautolu ne nonofo ke he tau fale ie, mo lautolu kua eke fuifui manu.
21 Ko e higoa he hana matakainaga ko Iupalu haia; ko ia ko e tupuna ha lautolu oti kua ta kitara, mo e fakatagi kofe.
22 Ko Sila foki ne fanau e ia a Tupalu-kaino, ko e tufuga a ia ke he tau mena oti kua eke ke he apa kula, mo e lapatoa; ko e mahakitaga foki a Tupalu-kaino, ko Naama haia.
23 Na pehe atu a Lameko ke he hana tau hoana, ko Ata mo Sila, Fanogonogo mai a ke he haku a leo, ko e na hoana a Lameko na e, kia fakateliga mai ke he haku a vagahau; ha kua kelipopo e au e tagata ha ko e haku a kafokia, ko e fuata foki ha ko e haku a tau kalavalava;
24 Kaeke ke taui lagafitu ka keli a Kaino; ti lagafitugofulu ma fitu ni ka keli a Lameko.
25 Ti liu foki iloa e Atamu hana hoana, ti fanau ai e ia e tama tane, ti ui ni e higoa hana ko Setu; ha kua pehe mai a ia. Kua foaki mai he Atua kia au e taha tama ke hukui aki a Apelu, ne kelipopo e Kaino.
26 Ne fanau foki e Setu e tama tane, ne ui foki hana higoa, ko Enosa; ko e vaha ia ne kamata ai ke ui atu ke he higoa a Iehova.