Kenese 40:1-23
40 KUA mole e tau mena ia, ti mahani hepehepe ai e tagata taute uaina he patuiki a Aikupito, katoa mo e tagata ne taute e tau mena kai ke he iki ha laua, ko e patuiki a Aikupito.
2 Ti ita ai a Farao ke he tokoua he hana tau fekafekau, ko e patu taute uaina mo e patu taute mena kai.
3 Ti tuku atu e ia a laua kia leoleo a laua ke he fale he takitaki he kau leoleo, ke he fale puipui, ke he mena ne lili ai a Iosefa.
4 Ne tuku atu a laua he takitaki he kau leoleo kia Iosefa, ti fekafekau atu a ia kia laua. Ha i ai foki a laua fala aho ke he fale puipui.
5 Ti miti ai e laua tokoua e miti, ko e tagata mo e hana ni a miti ke he po taha, fakalata takitaha ke he fakamatalaaga he hana miti; ko e tagata taute uaina katoa mo e tagata taute mena kai he patuiki a Aikupito, ko laua ne lili ke he fale puipui.
6 Ne hu atu a Iosefa kia laua ke he magaaho pogipogi, kua kitekite atu ki ai, kitiala, kua fakatutuku a laua.
7 Ti huhu atu ai a ia ke he na fekafekau a Farao kua puipui fakalataha mo ia ke he fale he hana iki, kua pehe atu, Ko e ha ne kelea ai ha mua a tau mata ke he aho nai?
8 Ti pehe mai ai a laua kia ia, Kua miti ni e maua, ti nakai fai tagata ke fakamatala mai ai. Ti pehe atu ai a Iosefa kia laua, Nakai kia ha ha he Atua e tau fakamatalaaga? kia talahau mai la e miti kia au.
9 Ti talahau e patu taute uaina hana a miti kia Iosefa, kua pehe mai kia ia, Ko e haku a miti, kitiala, ha i mua haku e vine.
10 Ha he vine foki tolu e la; ti tuga ni e mena kua fufua mai a ia, kua matala mai hana tau fiti, ne fua mai foki hana tau fuhi vine kua momoho.
11 Ha he lima haku foki e kapiniu a Farao; ti toto e au e tau fua vine, mo e tatau ke he kapiniu a Farao, ti ta atu ai e au e kapiniu ke he lima a Farao.
12 Ti pehe atu a Iosefa kia ia, ko e hana fakamatalaaga hanai; ko e tau la ne tolu, ko e tau aho haia ne tolu.
13 Ka mole atu tolu e aho, ti fakatokoluga ai e Farao hau a ulu, mo e liuaki a koe ke he hau a feua; to ta age foki e koe e kapiniu kia Farao ke he hana lima ni, tuga ne vaha fakamua ne taute uaina ai e koe mana.
14 Ka kia manatu mai e koe au ka monuina ai a koe, ti fakaalofa mai a koe kia au; kia talahau foki e koe au kia Farao, mo e uta kehe au he fale nai;
15 Ha kua kaiha ni au mai he motu he tau tagata Heperu, kua nakai eke foki e au i hinei ha mena taha ke tuku ai e lautolu au ke he luo.
16 Kua kitia he patu taute mena kai kua mitaki e fakamatalaaga; ti pehe mai a ia kia Iosefa, Ne kitia foki e au ke he haku miti, kitiala, tolu ni e kato lalaga ha i luga hoku ulu,
17 Ha i ai foki ke he kato i luga muatau e tau mena kai kehekehe oti kua tao ma Farao; ti kai ai he tau manu lele mai he kato ha i luga hoku ulu.
18 Ti tali atu ai a Iosefa, kua pehe atu, Ko e hana fakamatalaaga hanai; ko e tau kato ne tolu, ko e tau aho haia ne tolu.
19 Ka mole atu tolu e aho, ti uta ai e Farao hau a ulu ia koe, to tautau e ia a koe ki luga he akau; ti kai ai he tau manu lele hau a kakano.
20 Kua hoko foki ke he aho tolu, ko e fakamanatuaga haia he aho ne fanau ai a Farao, ne eke ai e ia e galue mo e hana tau fekafekau oti; ti fakatokoluga ai e ulu he patu taute uaina, mo e ulu he patu taute mena kai, ki mua hana tau fekafekau.
21 Kia liuaki e ia e patu taute uaina ke he hana feua; ti ta age e ia e kapiniu ke he lima a Farao.
22 Ka ko e patu taute mena kai, kua fakatautau a ia, tuga ne fakamatala atu e Iosefa kia laua.
23 Kua nakai manatu e patu taute uaina a Iosefa, ke a nimo ni ia ia.