Kenese 41:1-57
41 KUA mole atu ua e tau, ti miti ai a Farao, kitiala, kua tu a ia ke he kauvai he vailele.
2 Kitiala, ne hake mai he vailele fitu e povi tino mitaki mo e gako, ti kai e lautolu e tau vao he kauvai.
3 Kitiala, ko e falu a povi ne fitu kua tino kelea mo e pipili ne mumui hake kia lautolu mai he vailele; ti tutu ai a lautolu ke he tapa he tau povi fakamua ke he kauvai he vailele.
4 Ti kai ni he tau povi tino kelea mo e pipili e tau povi ne fitu kua tino mitaki mo e gako. Ti ala ai a Farao.
5 Kua mohe a ia, ti miti foki, ko e lagaua ia, kitiala, fitu e huki saito ne tupu mai he patu taha, kua lahi mo e mitaki.
6 Kitiala, kua tupu mui atu kia lautolu e tau huki saito ne fitu kua ikiiki, mo e fifigo he matagi uta.
7 Ti folo fua he tau huki saito ikiiki e tau huki saito ne fitu kua lahi mo e motua. Ti ala ai a Farao; kitiala, ko e miti ni.
8 Kua hoko ke he magaaho pogipogi, ti fakaatukehe ai hana loto, ti fekau atu e ia mo e ahi e tau taulātua oti kana a Aikupito, katoa mo e tau tagata iloilo oti kana ha ha i ai. Ti talahau atu e Farao hana tau miti kia lautolu; ka e nakai maeke ia taha ke fakamatala kia Farao.
9 Ti tala age ai e patu taute uaina kia Farao, kua pehe age, Kua manatu tuai e au ke he aho nai haku a mahani hepehepe;
10 Ne ita a Farao ke he hana tau fekafekau, ne tuku atu e ia au kia leoleo au ke he fale he takitaki he kau leoleo, ko au ni katoa mo e patu taute mena kai.
11 Ti miti ai e maua e tau miti ke he po taha, ko au ni mo ia, takitaha mo e hana miti fakalata ke he hana fakamatalaaga.
12 Ha he mena ia fakalataha mo mautolu e taha fuata Heperu, ko e fekafekau he takitaki he kau leoleo, ne talahau atu e maua kia ia, ti fakamatala mai ai e ia kia maua ha maua a tau miti ko e tagata mo e hana miti, ne fakamatala mai e ia.
13 Ti hoko ni tuga ne fakamatala mai e ia kia maua; ne liuaki au ke he haku a feua, ka e fakatautau a ia.
14 Ti fekau atu e Farao mo e ui kia Iosefa, kua ta mai alumaki e tautolu a ia mai he luo, kua tafi e ia hana hafe, mo e totogi hana tau tapulu, ti fina atu ai a ia kia Farao.
15 Ti pehe mai a Farao kia Iosefa, Kua miti tuai e au, ka e nakai maeke ia taha ke fakamatala mai ai kia au; kua logona foki e au e tala kia koe, ka logona e koe e miti ti iloa ni e koe ke fakamatala ai.
16 Ti tali atu ai a Iosefa kia Farao, kua pehe atu, Nakai ko au ni, ka ho e Atua to ta atu e ia e tala mitaki ke tali aki a Farao.
17 Ti tala mai ai a Farao kia Iosefa, Kitiala, ko e haku a miti ne tu ai au ke he kauvai he vailele.
18 Kitiala, ne hake mai he vailele fitu e povi gako mo e tino mitaki, ti kai e lautolu e vao he kauvai.
19 Kitiala, ne mumui hake kia lautolu e falu a povi ne fitu kua feko, mo e kelea lahi, mo e pipili, nakai kitia e au ha povi kelea pihia ke he motu oti ko Aikupito;
20 Ti kai ni he tau povi pipili mo e tino kelea e tau povi gako ne fitu ne mua hake.
21 Kua hoko ke he tau manava ha lautolu, ka e nakai ni iloa kua hoko ke he tau manava ha lautolu, ha kua tino kelea agaia ni tuga ne vaha fakamua. Ti ala ai na au.
22 Ne kitia foki e au ke he haku miti, kitiala, fitu ni e huki saito ne tupu mai he patu taha, kua lahi mo e mitaki.
23 Kitiala, kua tupu mui atu kia lautolu e tau huki saito ne fitu kua kelea, mo e ikiiki, mo e fifigo he matagi uta.
24 Ti folo fua he tau huki saito ikiiki e tau huki saito ne fitu kua mitaki. Ne tala age ai e au ke he tau taulātua, ka e nakai maeke ia taha ke fakamatala mia kia au.
25 Ti pehe atu ai a Iosefa kia Farao, Ko e miti a Farao ko e taha maka ni, kua fakakite ai he Atua kia Farao e mena ko e eke ne fai e ia.
26 Ko e tau povi mitaki ne fitu, ko e tau tau haia ne fitu, ko e tau huki saito mitaki ne fitu, ko e tau tau haia ne fitu; taha maka ni e miti.
27 Ko e tau povi foki ne fitu kua pipili mo e tino kelea ne mumui hake kia lautolu, ko e tau tau haia ne fitu, ko e tau huki saito foki ne fitu kua ikiiki mo e fifigo he matagi uta, ko e tau tau hoge ia ne fitu.
28 Ko e kupu haia kua tala atu ai e au kia Farao, kua fakakite he Atua kia Farao e mena ko e eke ne fai e ia.
29 Kitiala, ko e hoko mai ne fai fitu e tau ke mahu lahi ai e motu oti ko Aikupito.
30 Ti hoko fakamui mai fitu e tau hoge, to nimo ai e mahu oti kana ke he motu ko Aikupito; to kai ni he hoge e motu.
31 Ti nakai tuai iloa foki e mahu ke he motu ha ko e hoge ke mui age ki ai, ha ko e mauku lahi ni a ia.
32 Ne lagaua mai e miti kia Farao, ha kua fakamau tuai e mena ia he Atua, to fakahoko vave mai he Atua.
33 Ko e hanai, kia kumi e Farao e tagata pulotu mo e iloilo, ti kotofa a ia ke pule ke he motu ko Aikupito.
34 Kia eke pihia e Farao, kia kotofa foki falu ke pule ke he motu, ke uta e veveheaga ne lima aki e tau fua he fonua a Aikupito ke he tau tau mahu ne fitu.
35 Kia fakapotopoto foki e lautolu e tau mena kai oti he tau tau mitaki ia ko e hoko mai ne fai, kia tanaki ai e tau saito ke he pule a Farao; kia toka e lautolu e tau mena kai ke he tau māga.
36 To eke e tau mena kai ia mo tanakiaga mo e motu ke he tau tau hoge ne fitu ka ha i ai ke he motu ko Aikupito, neke mahaikava e motu he hoge.
37 Ti mitaki e kupu ia kia Farao, mo e hana tau fekafekau oti kana.
38 Ti pehe age ai a Farao ke he hana tau fekafekau, To moua kia e tautolu taha ke tuga mo e tagata nai, ha ha i ai e Agaga he Atua?
39 Ti pehe mai a Farao kia Iosefa, Ha kua fakakite atu he Atua e tau mena oti ia kia koe; ko e mena ia nakai fai tagata ke pulotu mo e iloilo tuga na koe.
40 To pule ni a koe ke he haku a magafaoa, ko e hau a kupu foki ke omaoma ki ai haku motu, ko e nofoaiki hokoia ke mua ai au kia koe.
41 Ti pehe mai ai a Farao kia Iosefa, Kitiala, kua tuku atu e au kia koe e pule ke he motu oti ko Aikupito.
42 Ti aki ai e Farao hana mama he hana lima, kua tuku ke he lima a Iosefa; kua fakatapulu foki a ia ke he tau tapulu ie lino, kua tuku foki e kahoa auro ke he hana ua.
43 Ti fakanofo a ia ke he hana nofoa fakataveli ne ua aki, ti hea ai a lautolu ki mua hana, Hufeilo a. Kua tuku atu e ia kia ia e pule ke he motu oti ko Aikupito.
44 Kua pehe mai a Farao kia Iosefa, Ko au, ko Farao, to nakai nikiti he taha hana lima po ke hana hui ke noa mo e pule hau ke he motu oti ko Aikupito.
45 Ti ui foki e Farao e higoa a Iosefa, ko Sapenapanea ne age foki kia ia a Asenati mo hoana hana, ko e tama fifine a ia a Potifele ko e ekepoa i Onu; ti faifano ai a Iosefa ke he motu ko Aikupito.
46 Ko e tau foki hana ne tolugofulu he tu ai a Iosefa ki mua a Farao ko e patuiki a Aikupito. Ti fina atu ai a ia mai mua a Farao, kua faifano a ia ke he motu oti ko Aikupito.
47 Ne fua loga mai e fonua ke he tau tau mahu ne fitu.
48 Ti fakapotopoto e ia e tau mena kai oti kana he tau tau ne fitu ha ha i ai ke he motu ko Aikupito, kua fetuku e tau mena kai ke he tau māga; ko e tau mena kai he fonua ne takai aki e tau māga ne fetuku ai e ia ki loto he maga ia.
49 Ne loga lahi e tau saito ne tanaki e Iosefa tuga ni e oneone he tahi, ati oti ka e fakahiku ni e totou, ha kua nakai maeke ke totou.
50 Tokoua la e tau tama tane ne fanau kia Iosefa ka e nakai la hohoko mai e tau tau hoge, ne fanau kia ia e Asenati ko e tama fifine a Potifele ko e ekepoa i Onu.
51 Ne ui e Iosefa e higoa he tama uluaki ko Manase, kua pehe age a ia, Ha kua eke e Atua ke nimo ia au haku a mamahi oti kana, katoa mo e magafaoa oti kana he haku matua.
52 Ne ui e ia e higoa he tama ne ua aki ko Efaraimo, kua pehe age a ia, Ha kua fakatokologa he Atua au ke he motu ne matematekelea ai au.
53 Kua fakahiku tuai e tau tau mahu ne fitu ha ha i ai ke he motu ko Aikupito.
54 Ti kamata ni ke hohoko mai e tau tau hoge ne fitu tuga ne talahau a Iosefa; ha ha i ai e hoge ke he tau motu oti, ka e ha ha i ai e tau mena kai ke he motu oti ko Aikupito.
55 Kua mate hoge e motu oti ko Aikupito, ti tagi atu ai e motu kia Farao ke he tau mena kai; ti tala age e Farao ke he tau tagata Aikupito oti, Kia o a mutolu kia Iosefa, ko e mena ke tala atu ai e ia kia mutolu, kia eke a e mutolu.
56 Ha i ai foki e hoge ke he tau motu oti kana, ti vevete ai e Iosefa e tau mena oti ne toka ai e tau saito, mo e fakatau atu ke he tau tagata Aikupito; ne tupu lahi ni e hoge ke he motu ko Aikupito.
57 Ne o atu foki e tau motu oti ki Aikupito ke fakatau mai e tau saito ia Iosefa, ha kua tupu lahi e hoge ke he tau motu oti kana.