Kenese 42:1-38
42 KUA iloa e Iakopo kua fai saito i Aikupito, ti pehe atu ai a ia ke he hana tau tama tane, Ko e ha ne fakafepulāki ai a mutolu?
2 Kua pehe atu foki a ia, Kua logona e au ha i Aikupito e tau saito, ati o hifo a mutolu ki ai, mo e fakatau mai ai ma tautolu, kia momoui ai a tautolu, ka e aua neke mamate.
3 Ti o hifo ai e tau matakainaga a Iosefa ne tokohogofulu, ke fakatau saito mai i Aikupito.
4 Ka ko Peniamina ko e matakainaga a Iosefa, nakai fakafano e Iakopo a ia fakalataha mo e hana tau matakainaga, ha kua pehe a ia, neke hoko ha mena kelea kia ia.
5 Ne o foki e tau tama tane a Isaraela ke fakatau fakalataha mo e tau tagata ne o ke fakatau; ha ko e mena ha i ai e hoge ke he motu ko Kanana.
6 Ko Iosefa foki ne pule ke he motu, ko ia ni ne fakatau atu ke he tau tagata oti he motu; ti o mai ai e tau matakainaga a Iosefa mo e fakaveli fakafohifo ke he kelekele ki mua hana.
7 Kua kitia e Iosefa hana tau matakainaga, ti iloa ni a lautolu, ka kua fakatupua a ia kia lautolu, mo e vagahau fakatokoluga kia lautolu, kua pehe mai kia lautolu, Ne o mai a mutolu i fe? ti pehe atu a lautolu Ne o mai a mautolu he motu ko Kanana ke fakatau mena kai.
8 Kua iloa e Iosefa hana tau matakainaga, ka e nakai ni iloa e lautolu a ia.
9 Ti manatu ai e Iosefa e tau miti ne miti ai e ia kia lautolu, ti pehe mai a ia kia lautolu. Ko e tau tagata toko a mutolu, kua o mai a mutolu ke toko ke he tau fahi toka noa he motu.
10 Ti pehe atu ai a lautolu, Nakai, ma iki na e, kua o mai ni hau a tau fekafekau ke fakatau mena kai.
11 Ko mautolu oti ni ko e tau tama he tagata tokotaha, kua fakamoli ni a mautolu, ka e nakai ko e tau tagata toko hau a tau fekafekau.
12 Ti pehe mai a ia kia lautolu, Nakai, ka e o mai ni a mutolu ke toko ke he tau fahi toka noa he motu.
13 Ti pehe atu a lautolu kia ia, Ko e matakainaga hau a tau fekafekau, ne tokohogofulu ma ua a mautolu, ko e tau tama he tagata tokotaha ke he motu ko Kanana; kitiala, ha i ai ainei e tama fakamui mo e hana matua tane, ka ko e taha, kua nakai ha i ai.
14 Ti pehe mai ai a Iosefa kia lautolu, Haia ne tala atu ai e au kia mutolu, kua pehe, ko e tau tagata toko a mutolu.
15 Ko e mena nai ke fakafili aki a mutolu. Ko e moui a Farao kua tala atu ai au, nakai o kehe a mutolu mo e mena nai, ka nakai hau ha mutolu a matakainaga fakamui ki hinei.
16 Ati fakafano atu a e taha ha mutolu ke ta mai ha mutolu a matakainaga, ka e lili na mutolu ka fakafili aki ha mutolu a tau kupu po ke moli nakai a mutolu; kaeke ke nakai, ko e moui a Farao kua tala atu ai au, ko e tau tagata toko a mutolu.
17 Ti tuku atu ai e ia a lautolu fakalataha ke he fale puipui po tolu.
18 Ti ko e aho tolu ne pehe mai ai a Iosefa kia lautolu, Kia eke e mutolu e mena nai, ti momoui ai a mutolu; ha ko au ko e tagata matakutaku ke he Atua.
19 Kaeke kua fakamoli a mutolu kia lili ai e taha ha mutolu a matakainaga ke he fale puipui, ka e o a mutolu mo e uta e tau saito ke he hoge he tau magafaoa ha mutolu.
20 Ti ta mai a mutolu ha mutolu a matakainaga fakamui kia au, ke fakamoli aki ha mutolu a tau kupu, ti nakai ni mamate a mutolu. Ti eke ai pihia e lautolu.
21 Kua fevagavagahauaki a lautolu, Kua hala moli a tautolu, ke he matakainaga ha tautolu, ne kitia e tautolu e mamahi he hana loto he olelalo mai a ia kia tautolu, ka e nakai mahalohalo ai a tautolu, ko e mena ia kua hoko mai ai kia tautolu e matematekelea nai.
22 Ti tali atu ai a Reupena kia lautolu, kua pehe atu, Nakai kia tala atu e au kia mutolu, kua pehe, aua neke mahani kelea a mutolu ke he tama, ka e nakai ni fanogonogo a mutolu? hanai foki, kitiala, kua kumi tuai hana toto.
23 Ka e nakai iloa e lautolu kua logona e Iosefa, ha kua ha ia lautolu mo ia e tagata liliu kupu ka fevagahauaki.
24 Kua fano kehe a ia ia lautolu mo e tagi; ti liu mai foki kia lautolu, kua vagahau mo lautolu, ti uta e ia a Simeona ia lautolu, mo e lili a ia ki mua ha lautolu.
25 Ti poaki e Iosefa ke fakapuke e tau taga ha lautolu ke he saito, ke liuaki foki ha lautolu a tau tupe takitaha ke he hana taga, ke age foki kia lautolu e oho mo e fenoga ha lautolu. Ne eke pihia e ia kia lautolu.
26 Kua fakatoka e tau saito ki luga he tau asini ha lautolu, ti o ai na lautolu he mena ia.
27 Kua vevete foki e taha hana taga ke fagai e asini hana ke he mena ke momohe ai e tau fenoga, ti kitia ai e ia hana tau tupe, kitiala, ha he gutu he hana taga.
28 Ti pehe atu a ia ke he hana tau matakainaga, Kua liuaki mai haku tau tupe, kitiala, ha ha he taga haku. Ti hopokia ai ha lautolu a moui, kua matakutaku, kua pehe age e taha ke he taha, Ko e heigoa e mena nai kua eke he Atua kia tautolu?
29 Ti hohoko atu a lautolu kia Iakopo ha lautolu a matua tane, ke he motu ko Kanana; kua talatala atu e lautolu kia ia e tau mena oti ne hohoko kia lautolu, kua pehe atu,
30 Ne vagahau fakatokoluga kia mautolu e tagata ko e iki he motu, ti eke e ia ko e tau tagata toko a mautolu.
31 Ti tala age ai e mautolu kia ia, Kua fakamoli ni a mautolu, nakai ko e tau tagata toko a mautolu;
32 Ko e matakainaga a mautolu ne tokohogofulu ma ua, ko e tau tama ni he matua tane ha mautolu; ko e taha kua nakai ha i ai, ka ko e tama fakamui ha i ai a ia ainei mo e matua tane ha mautolu ke he motu ko Kanana.
33 Ne pehe mai foki kia mautolu e tagata, ko e iki he motu, Ko e mena nai ke iloa ai e au kua fakamoli a mutolu, tuku mai a e taha he tau matakainaga ha mutolu kia au, ti uta e mutolu e mena kai ke he hoge he tau magafaoa ha mutolu, ti o a mutolu,
34 Ka e ta mai e mutolu ha mutolu a matakainaga fakamui kia au, ti iloa ai e au nakai ko e tau tagata toko a mutolu, ka kua fakamoli a mutolu; to ta atu e au kia mutolu e matakainaga ha mutolu, ti fakafua ai e mutolu ke he motu.
35 Kua liligi e lautolu ha lautolu a tau taga, ti kitia ai e lautolu takitaha e tagata mo e hana kofukofu tupe ke he hana taga, kua kitia e lautolu e tau kofukofu tupe ha lautolu, ko lautolu ni mo e matua tane ha lautolu, ti matakutaku ai a lautolu.
36 Ti pehe atu ha lautolu a matua tane ko Iakopo kia lautolu, Kua uta kehe e mutolu haku fanau ia au; ko Iosefa kua nakai, ko Simeona kua nakai; kua eke e mutolu ke uta kehe a Peniamina; kua pehia au he tau mena oti ia.
37 Ti tala age ai a Reupena ke he hana matua tane, kua pehe age, Ati keli a e koe haku na tama tokoua kaeke ke nakai ta mai e au a ia kia koe. Kia tuku mai e koe a ia kia au, to liuaki atu e au a ia kia koe.
38 Ka kua pehe atu a ia, Nakai hifo haku tama mo mutolu; ha kua mate tuai hana matakainaga, ti toe tokotaha ni a ia, kaeke ke hoko ha mena kelea kia ia ke he puhala ka o ai a mutolu, ti ta hifo ai e mutolu haku tau lauulu hina ke he tukuaga mo e mānu.