Kenese 43:1-34
43 KUA lahi ni e hoge ke he motu.
2 Kua oti foki he kai e lautolu e tau saito ne ta mai i Aikupito; ti pehe atu ai ha lautolu a matua tane kia lautolu, Kia liliu atu a mutolu ke fakatau mai e falu a mena kai ma tautolu.
3 Ti tala mai ai a Iuta kia ia, kua pehe mai, Ne talahau mai fakalahi he tagata kia mautolu, kua pehe mai, Kaeke ke nakai o mai a mutolu mo e matakainaga ha mutolu, ti nakai ni kitia e mutolu hoku mata.
4 Kaeke ke fakafano e koe a mautolu mo e ha mautolu a matakainaga, ti o hifo a mautolu mo e fakatau mena kai māu.
5 Kaeke ke nakai fakafano e koe a ia, ti nakai ni o hifo a mautolu; ha kua pehe mai e tagata kia mautolu, Kaeke ke nakai o mai a mutolu mo e matakainaga ha mutolu, ti nakai ni kitia e mutolu hoku mata.
6 Ti pehe atu ai a Isaraela, Ko e ha ne mahani kelea mai ai a mutolu kia au, ke tala age ke he tagata kua toe ha matakainaga ha mutolu?
7 Ti pehe mai a lautolu, Ne huhu fakamakutu e tagata ke he faoa ha tautolu, kua pehe mai, kua moui agaia kia ha mutolu a matua tane? Kua fai matakainaga nakai a mutolu? Ti tala age ai e mutolu tuga ne tau kupu ia; ne iloa kia e mautolu to pehe mai a ia, Ta mai a ha mutolu a matakainaga?
8 Ti pehe mai ai a Iuta kia Isaraela hana matua tane, Tuku mai e tama kia au, ti mamatike a mautolu mo e o, kia momoui a tautolu ka e aua neke mamate, ko mautolu, mo koe, katoa mo e ha mautolu a tau tama ikiiki.
9 To eke au mo leveki māna; to kumi mai e koe a ia ia au, kaeke ke nakai liuaki mai e au a ia kia koe, mo e tuku atu a ia ki mua hau, to eke au mo tagata hala kia koe ke he tau aho oti kana.
10 Aua he fakamule a mautolu po kua liliu mai tuai ainei a mautolu, lagaua ia.
11 Ti pehe atu ai a Isaraela ha lautolu a matua tane kia lautolu, Kaeke ke pihia, kia eke e mutolu e mena nai, kia uta ni ke he tau kato ha mutolu e falu a mena he fonua kua mua he mitaki, ke ta hifo mo fakaalofa ke he tagata, ko e maga pasama, mo e maga meli, ko e mena manogi, mo e muro, ko e petuni, mo e sikati.
12 Kia uta foki e mutolu ua e kofukofu tupe ke he tau lima ha mutolu; ko e tau tupe foki ne liuaki mai ke he tau gutu taga ha mutolu kia liu foki uta ia ke he tau lima ha mutolu; na ko e mena galo ia heutehepihia.
13 Kia uta foki mo e matakainaga ha mutolu; ti mamatike a, mo e liliu atu ke he tagata.
14 Kia foaki foki kia mutolu he Atua mana kia ofania a mutolu he tagata, kia tuku mai foki e ia kia mutolu e taha matakainaga ha mutolu katoa mo Peniamina; ka ko au, kaeke ke uta kehe ia au haku fanau, ti uta kehe ai ni.
15 Ti uta ni he tau tagata ia e mena fakaalofa na, ne ua foki e kofukofu tupe ne uta ke he tau lima ha lautolu, katoa mo Peniamina ni; ti mamatike a lautolu, mo e o hifo ki Aikupito, ti tutu ai a lautolu ki mua a Iosefa.
16 Kua kitia e Iosefa a Peniamina fakalataha mo lautolu, ti pehe atu ai a ia ke he tagata ne pule ke he hana magafaoa, Uta a e tau tagata na ke he fale, ti tamate e falu a manu, mo e taute; ha ko e mena kai mena mo au e tau tagata ia ka hoko ke he tupou la.
17 Ti eke e tagata tuga ne tala atu e Iosefa, kua uta e ia e tau tagata ke he fale a Iosefa.
18 Ti matakutaku e tau tagata ha kua uta a lautolu ke he fale a Iosefa, kua pehe a lautolu, Na ko e tau tupe ne liuaki mai ke he tau taga ha tautolu ke he vaha fakamua, ko e mena ia kua ta mai ai a tautolu ke he fale, kia oho mai ai a ia kia tautolu, ti tapaki e ia a tautolu mo e tau asini ha tautolu, ti eke foki a tautolu mo tau tupa.
19 Ti fakatata atu ai a lautolu ke he tagata ne pule ke he magafaoa a Iosefa, mo e vagahau atu kia ia ke he gutuhala he fale.
20 Kua pehe atu a lautolu, Ko e iki na e, fanogonogo mai a, ne o mai a mautolu ke he vaha fakamua ke fakatau mena kai.
21 Ne hohoko atu foki a mautolu ke he mena ke momohe ai e tau fenoga, ti vevete ai a mautolu e tau taga ha mautolu, kitiala, takitaha e tagata mo e hana tau tupe ke he gutu taga hana, ha mautolu a tau tupe katoatoa ni; kua liu foki ta mai e mautolu ke he tau lima ha mautolu.
22 Kua ta mai foki e mautolu e falu a tupe ke he tau lima ha mautolu ke fakatau mena kai; nakai iloa e mautolu po ko hai ne tuku ha mautolu a tau tupe ke he tau taga ha mautolu.
23 Ti pehe mai ai a ia, Kia monuina a mutolu, ua matakutaku a mutolu; ko e Atua ha mutolu, mo e Atua he tau matua ha mutolu ne age e ia kia mutolu e koloa ke he tau taga ha mutolu; ne eke e au ha mutolu a tau tupe. Ti ta mai ai e ia a Simeona kia lautolu.
24 Ti ta mai ai he tagata a lautolu ke he fale a Iosefa; ne age foki e ia e magavai, ti holoholo ai e lautolu ha lautolu a tau hui; ne fagai foki e ia ha lautolu a tau asini.
25 Ti taute e lautolu e mena fakaalofa ka e nakala hau a Iosefa ka tupou e la, ha kua logona e lautolu to kai mena ai a lautolu.
26 Kua hau a Iosefa ke he fale, ti ta mai ai e lautolu kia ia ke he fale e mena fakaalofa ha ha he tau lima ha lautolu, ti fakaveli fakafohifo a lautolu ke he kelekele ki mua hana.
27 Kua fakaalofa atu a ia kia lautolu, mo e pehe atu, Kua malolo nakai ha mutolu a matua tane fuakau ne talahau mai ai e mutolu? Po kua moui agaia nakai a ia?
28 Ti pehe mai a lautolu kia ia, Kua malolo e fekafekau hau ko e matua tane ha mautolu, kua moui agaia ni a ia; ti tukutukuhifo a lautolu, mo e fakaveveli fakafohifo.
29 Ne haga atu a ia, ti kitia e ia a Peniamina hana matakainaga, ko e tama he hana matua fifine, ti pehe atu ai a ia, Ko e matakainaga fakamui kia ha mutolu haia, ne talahau mai ai e mutolu kia au? Kna pehe atu foki a ia, Ma mea, kia fakaalofa atu e Atua kia koe.
30 Ti fakatepetepe a Iosefa ha kua hofihofi noa hana fakaalofa ke he hana matakainaga, kua kumi e ia e mena ke tagi ai, ti hu a ia ke he hana poko, mo e tagi ai.
31 Kua holoholo e ia hana mata, ti fina age a ia, kua fakauka a ia, mo e pehe atu, Fakatokatoka mai e tau mena kai.
32 Ti fakatokatoka kehekehe e tau mena, ko e tau mena hana hokoia ni; ko e tau mena ha lautolu hokolautolu ni; ko e tau mena he tau tagata Aikupito ne kai mo ia hokolautolu ni; ha kua nakai maeke ke he tau tagata Aikupito ke kai mena fakalataha mo e tau tagata Heperu; ha ko e mena fakalialia ia ka he tau tagata Aikupito.
33 Kua nonofo a lautolu ki mua hana, ko e uluaki ke he nofoa he uluaki, mo ia ne fakamui ke he nofoa he fakamui; ti ofomate ai a lautolu mo e kitekite ko e taha ke he taha.
34 Ne momoi atu foki e ia e tau tufaaga he mena kai ki mua hana kia lautolu; ka e homo e tufaaga a Peniamina ke he tau tufaaga ha lautolu oti, tatai mo e lima a tufaaga ha lautolu. Kua inu a lautolu mo e fiafia fakalataha mo ia.