Kenese 45:1-28
45 TI nakai maeke ia Iosefa ke fakauka ki mua ha lautolu oti ne tutu ki mua hana, ti ui ai a ia, Kia o kehe ia au e tau tagata oti. Ti nakai tu mai ha tagata ia Iosefa ka kua fakakite e ia a ia ke he hana tau matakainaga.
2 Kua tagi a ia fakaleo lahi; ti logona ai he tau tagata Aikupito, ti logona mo e magafaoa a Farao.
3 Kua pehe atu a Iosefa ke he hana tau matakainaga Ko au ko Iosefa; kua moui agaia kia haku matua tane? Ti nakai maeke ke he hana tau matakainaga ke tali mai kia ia, ha kua memege noa ni a lautolu ki mua hana.
4 Ti pehe atu a Iosefa ke he hana tau matakainaga, Unuunu mai a kia au; to unuunu atu ai a lautolu. Ti pehe atu a ia, Ko au ni ko Iosefa ko e matakainaga ha mutolu ne fakafua mai e mutolu ki Aikupito.
5 Ko e hanai, aua neke mamahi a mutolu, po ke ita a mutolu kia mutolu he fakafua mai e mutolu au ki hinei; ha kua fakafano mai he Atua au ke mua kia mutolu ke eke mo fakamoui;
6 Ha ko e tau ua ainei ha i ai e hoge ke he motu, ka e toe agaia lima e tau nakai keli ai e kelekele, ti nakai helehele ai e tau saito.
7 Ne fakafano mai foki he Atua au ke mua kia mutolu ke fakatumau e faoa ha mutolu ke he lalolagi; ke fakamoui foki a mutolu ke he fakamoui lahi.
8 Ko e hanai, nakai ko mutolu ne fakafano mai au ki hinei, ka ko e Atua ni; kua eke foki e ia au mo matua a Farao, mo iki foki he hana magafaoa oti, mo pule foki ke he motu oti ko Aikupito.
9 Kia fakaave a mutolu ke o hake ke he haku matua tane, mo e tala age a mutolu kia ia, Kua pehe mai hau a tama ko Iosefa, Kua eke he Atua au mo iki he motu ko Aikupito; kia hau a koe kia au, aua neke mule mai.
10 To nofo foki a koe ke he magamotu ko Kosena, ti tata mai ni a koe kia au, ko koe mo e hau a fanau, mo e fanau he hau a fanau; mo e hau a tau mamoe, mo e hau a tau povi, mo e hau a tau mena oti,
11 To fagai e au a koe ke he mena ia, ha kua toe agaia lima e tau hoge, neke fakanofogati ai a koe, mo e hau a magafaoa, mo e tau mena oti ha ha ia koe.
12 Kitiala, kua kitia he tau mata ha mutolu, mo e tau mata he haku a matakainaga ko Peniamina, ko e haku a gutu ni kua vagahau atu nai kia mutolu.
13 Kia talahau foki e mutolu ke he matua tane haku e lilifu oti haku i Aikupito, mo e tau mena oti kua kitia e mutolu; ti fakaave a mutolu ke ta mai haku matua tane ki hinei.
14 Ti peka ai a ia kia Peniamina hana matakainaga, mo e tagi ke he hana ua, kua tagi foki a Peniamina ke he hana ua.
15 Ti taufigita a ia mo e hana tau matakainaga oti kana, mo e tagi kia lautolu. Kua mole ia, ti vagavagahau hana tau matakainaga mo ia.
16 Kua logona foki e ogo ke he fale a Farao, kua pehe, Kua o mai tuai e tau matakainaga a Iosefa; ti fiafia ai a Farao mo e hana tau fekafekau.
17 Ti pehe mai ai a Farao kia Iosefa, Tala age ke he hau a tau matakainaga, Kia eke e mutolu e mena nai, fakatoka e tau mena ke he tau manu ha mutolu, ti o a mutolu ke he motu ko Kanana.
18 Ti ta mai e mutolu ha mutolu a matua tane mo e ha mutolu a tau magafaoa, ti o mai ni kia au; ti ta atu ai e au kia mutolu e mitaki he motu ko Aikupito; to kai e mutolu e tau mena he motu ne mua he mitaki.
19 Kua poaki tuai kia koe, kia eke e mutolu e mena nai; kia uta ni e mutolu e tau fata fakataveli he motu ko Aikupito ma e fanau ha mutolu, ma e tau hoana foki ha mutolu, ti ta mai e mutolu ha mutolu a matua tane, ti o mai ai a mutolu.
20 Ua manatu foki ke he tau mena ha mutolu, ha ko e mitaki he motu oti ko Aikupito, ko e ha mutolu haia.
21 Ti kua eke pihia he fanau a Isaraela; ne āge foki e Iosefa e tau fata fakataveli kia lautolu, tuga ne kupu a Farao; ne age foki e ia kia lautolu e oho mo e fenoga.
22 Ne āge foki e ia kia lautolu oti takitaha e tagata mo e ua e tapulu; ka e āge e ia kia Peniamina tolu e teau e tau tupe, mo e tau tapulu ne hogofulu ni.
23 Ka ko e hana matua tane, kua fakafano atu kia ia pehenai; hogofulu e asini ne uta e tau mena mitaki a Aikupito, ti hogofulu e asini fifine ne uta saito, mo e areto, katoa mo e tau mena kai mo e fenoga he hana matua tane.
24 Ti fakafano atu e ia hana tau matakainaga, ti o ai a lautolu; kua pehe atu foki a ia kia lautolu, A mutolu, neke latau a mutolu ke he magahehala.
25 Kua o hake a lautolu i Aikupito, kua o ke he motu ko Kanana, kia Iakopo ha lautolu a matua tane.
26 Kua tala age foki a lautolu kia ia, kua pehe, Kua moui agaia a Iosefa, kua pule foki a ia ke he motu oti ko Aikupito. Ti momoko ai hana loto, ha kua nakai talia e ia ha lautolu a tau kupu.
27 Ka e talahau e lautolu kia ia e tau kupu oti a Iosefa ne poaki mai a ia ia lautolu; ne kitia foki e ia e tau fata fakataveli ne fakafano mai e Iosefa ke uta a ia, ti liu foki puna e moui a Iakopo ha lautolu a matua tane.
28 Ti pehe mai ai a Isaraela, Tokai, kua moui gaia haku tama ko Iosefa, to fano au ke feleveia mo ia ka e nakai la mate au.