Kenese 47:1-31
47 TI fano ai a Iosefa mo e tala age kia Faroa, kua pehe age, Kua o mai tuai he moto ko Kanana haku a matua tane mo e haku a tau matakainaga, mo e ha lautolu a tau fuifui mamoe, mo e ha lautolu a tau fuifui povi, mo e tau mena oti kana ha ha ia lautolu; kitiala, ha he magamotu ko Kosena a lautolu.
2 Ne uta foki e ia e falu he hana matakainaga ne tokolima e tagata, mo e tuku atu a lautolu ki mua a Farao.
3 Kua pehe age a Farao ke he hana tau matakainaga, Ko heigoa ha mutolu a feua? Ti pehe age ai a lautolu kia Farao, Ko e tau leveki mamoe hau a tau fekafekau nai, ko mautolu katoa mo e ha mautolu a tau matua.
4 Ne pehe age foki a lautolu kia Farao, Kua o mai a mautolu ke api ke he motu nai, ha kua nakai fai mena ke fagai aki e tau fuifui mamoe he hau a tau fekafekau, ha kua lahi ni e hoge ke he motu ko Kanana; ko e hanai, kua ole atu e mautolu kia tuku mai e koe hau a tau fekafekau ke nonofo ke he magamotu ko Kosena.
5 Ti tala age e Farao kia Iosefa, kua pehe age, Kua o mai kia koe hau a matua tane mo e hau a tau matakainaga;
6 Ha i mua hau e motu ko Aikupito, kia tuku age e koe ke he hau a matua tane mo e hau a tau matakainaga ke nonofo ke he fonua kua mua ai e mitaki; kia nonofo a lautolu ke he magamotu ko Kosena; kaeke foki kua iloa e koe e falu ia lautolu kua malolo, kia eke a lautolu mo tau patu leoleo ke he haku tau manu.
7 Ne ta mai foki e Iosefa hana matua tane ko Iakopo, mo e tuku atu a ia ki mua a Farao; ti fakamonuina ai e Iakopo a Farao.
8 Ti pehe age a Farao kia Iakopo, Ka e fiha kia hau a tau tau?
9 Ti pehe age ai a Iakopo kia Farao, Ko e tau tau he haku a moui, ne taha e teau ia ti tolugofulu e tau tau; kua gahoa to kelea e tau tau he haku a moui nakai hoko ni ke he tau tau he tau moui he haku tau matua ke he tau aho ne nonofo ai a lautolu.
10 Ti fakamonuina e Iakopo a Farao, ti fano kehe ai a ia mai mua a Farao.
11 Ti tuku atu e Iosefa e magamotu ke nonofo ai hana matua tane mo e hana tau matakainaga, ti age e ia kia lautolu e fonua ke eke ma lautolu ke he motu ko Aikupito, ko e mena ne mua e mitaki he motu, ha he magamotu ko Ramesi; tuga ne poaki a Farao.
12 Ne fagai foki e Iosefa hana matua tane; mo e hana tau matakainaga, mo e magafaoa oti he hana matua tane ke he tau mena kai, kua hoko ni ke he tau tama ikiiki.
13 Nakai fai mena kai foki ke he motu oti, ha kua lahi mahaki ni e hoge, kua nakai tuai fahia e motu ko Aikupito, mo e motu ko Kanana, ha ko e hoge.
14 Ti tanaki ai e Iosefa e tau tupe oti kana ha he motu ko Aikupito, mo e motu ko Kanana, ko e totogi he tau saito ne fakatau e lautolu; ti uta e Iosefa e tau tupe ke he fale a Farao.
15 Kua oti tuai e tau tupe ke he motu ko Aikupito, mo e motu ko Kanana, ti o age ai e tau tagata Aikupito oti kana kia Iosefa, mo e pehe age, Kia ta mai e koe e fala mena kai kia mautolu; ke mamate he ha a mautolu ki mua hau? ha kua oti tuai e tau tupe.
16 Ti pehe mai ai a Iosefa, Kia ta mai ha mutolu a tau manu, to ta atu e au e tau mena kai ke fakatau aki ha mutolu a tau manu, kaeke kua oti e tau tupe.
17 Ti ta atu e lautolu ha lautolu a tau manu kia Iosefa; ti age e Iosefa kia lautolu e tau mena kai ke fakatau aki e tau solofanua, mo e tau fuifui mamoe, mo e tau fuifui povi, katoa mo e tau asini; ne fagai e ia a lautolu ke he tau mena kai ke he tau ia ha ko e tau fuifui manu oti ha lautolu.
18 Kua fakahiku e tau ia, ti o age ai a lautolu kia ia ke he tau ne ua aki e tau ia, kua pehe atu a lautolu kia ia, Nakai fufu e mautolu ke he iki ha mautolu, kua oti tuai e tau tupe, ha ha ha i ai foki ke he iki ha mautolu e tau fuifui manu; nakai tuai toe ha mena ia mautolu ki mua he iki ha mautolu, ka ko e tau tino ni hokoia ha mautolu mo e ha mautolu a tau fonua.
19 Ke mamate he ha a mautolu ki mua hau, mo e taluē ha mautolu a tau fonua? Kia fakatau e koe a mautolu mo e ha mautolu a tau fonua ke he tau mena kai, to eke a mautolu mo tau fekafekau a Farao, ko mautolu mo e ha mautolu a tau fonua; kia ta mai foki kia mautolu e tau fua saito kia momoui ai a mautolu, neke mamate a mautolu, neke toka noa foki e fonua.
20 Ti fakatau e losefa e fonua oti a Aikupito ma Farao; ha kua fakatau atu he tau tagata Aikupito takitaha hana fonua; ha kua kautu e hoge kia lautolu; ti eke ni e fonua ma Farao.
21 Ko e tau tagata foki ne uta e ia a lautolu ke he tau maga, kua kamata ke he taha katofia a Aikupito ti hoko atu ke he taha katofia.
22 Ka ko e fonua he tau ekepoa, nakai fakatau e ia, ha kua fai tufaaga mena kai e tau ekepoa ne kotofa e Farao; ti kai e lautolu ha lautolu a tufaaga mena kai ne age e Farao kia lautolu; ko e mena ia nakai fakatau ai ha lautolu a tau fonua.
23 Ti tala age a Iosefa ke he tau tagata, Kitiala, kua fakatau tuai e au a mutolu ke he aho nai, katoa mo e ha mutolu a tau fonua ma Farao; kitiala, ko e tau fua saito hanai ma mutolu, ke to aki e mutolu e fonua.
24 Ka hoko ke he fuaaga, ti ta atu ai e mutolu kia Farao e veveheaga ne lima aki, ka ko e tau veveheaga ne fa kua toe, ha mutolu ia, ke eke mo fua ke to aki e fonua mo mena kai foki ma mutolu, katoa mo e tau magafaoa ha mutolu, mo mena kai foki he tau fanau ha mutolu.
25 Ti pehe mai ai a lautolu, Kua fakamoui tuai e koe a mautolu, kia ofania a mautolu he iki ha mautolu to eke foki a mautolu mo tau fekafekau a Farao.
26 Kua eke e Iosefa e mena ia mo fakatufono ke he fonua a Aikupito kua hoko mai ni ke he aho nai, ke ta atu kia Farao e veveheaga ne lima aki; ko e fonua hokoia he tau ekepoa kua nakai eke ma Farao.
27 Ti nonofo ai e tau tagata Isaraela ke he motu ko Aikupito, ke he magamotu ko Kosena, ti fai fonua a lautolu, i ai; kua fanau loga a lautolu, mo e fakatokologa lahi.
28 Ne nofo a Iakopo ke he motu ko Aikupito hogofulu ma fitu e tau, ko e tau aho foki he tau tau ne moui ai a Iakopo, ko e taha teau ia, ti fagofulu, ti fitu ni e tau.
29 Kua tata foki e aho ke mate ai a Isaraela, ti ui ai a ia ke he hana tama ko Iosefa, mo e pehe age kia ia, Kaeke kua ofania au e koe, kia tuku e koe hau a lima ki lalo he tega haku, ti fakaalofa mai a koe mo e fakamoli kia au; aua neke tanu e koe au i Aikupito;
30 Ka e takoto au fakalataha mo e haku tau matua, kia uta e koe au i Aikupito mo e tanu e koe au ke he tukuaga ha lautolu. Ti pehe mai a ia kia ia, To eke ni e au tuga ne tala mai ai e koe.
31 Ti pehe a ia, Omonuo mai kia au; ti omonuo ai a ia kia ia; ti hufeilo ai a Isaraela ke he ulu he mohega.