Kenese 48:1-22
48 KUA mole e tau mena ia, ti talahau ni kia Iosefa, Kitiala, kua mamahi tuai e matua tane hau; ti uta e ia fakalataha mo ia e na tama tokoua hana, ko Manase mo Efaraimo.
2 Ti fakailoa atu ni kia Iakopo, kua pehe, Kitiala, ko e tama hau, ko Iosefa, ha ne hau kia koe; ti fakamalolo ai a Isaraela mo e nofo ke he mohega.
3 Ti pehe age ai a Iakopo kia Iosefa, Ne fakakite mai e Atua mana kia au i Lusa ke he motu ko Kanana, mo e fakamonuina e ia au;
4 Ne pehe mai a ia kia au, Kitiala, to eke e au a koe ke fanau loga, to fakatokologa e au a koe, to eke foki e au a koe mo tau motu loga; to ta atu e au e motu nai ke he fanau hau ka mole atu a koe, ke eke ma lautolu tukulagi.
5 Hanei foki, ko e na tama tokoua hau ne fanau kia koe ke he motu ko Aikupito, ka e nakala hau au kia koe ki Aikupito, maku ni a laua, ko Efaraimo mo Manase, to eke ni a laua māku ke tuga a Reupena mo Simeona.
6 Ko e fanau foki hau ke fanau e koe ke he tua ha laua, to eke a lautolu māu, to talahaua a lautolu ke he tau higoa he tau matakainaga ha lautolu ke he fonua ha lautolu.
7 Ko au foki, ne hau au i Patana, ti mate ai ia au a Rahela ke he motu ko Kanana, ke he hala ne toe tote ti pu i Efarata; ne tanu e au a ia ke he puhala ki Efarata, ko Pete-lehema haia.
8 Kua kitia e Isaraela e na tama a Iosefa ti pehe age a ia, Ko hai kia a laua nai?
9 Ti pehe age ai a Iosefa ke he hana matua tane, Ko e haku tau tama a laua nai ne foaki mai he Atua kia au ke he motu nai; ti pehe age a ia, Ta mai la kia au ke fakamonuina e au a laua.
10 Ne hegihegi foki e tau mata a Isaraela he motua a ia, nakai maeke ia ia ke kitia mitaki; ti fakatata atu a laua kia ia, kua figita e ia a laua, mo e peka kia laua.
11 Ti pehe age ai a Isaraela kia Iosefa, Piko na au nakai kitia foki e au e mata hau, kitiala, kua fakakite mai he Atua kia au hau a fanau.
12 Ti takitaki mai e Iosefa a laua he vaha hui hana, kua fakaveli fakafohifo foki a ia ke he kelekele.
13 Ti uta ni e Iosefa a laua tokoua, ko Efaraimo ke he hana lima matau kua fehagai mo e lima hema a Isaraela, ko Manase foki ke he hana lima hema kua fehagai mo e lima matau a Isaraela, ti fakatata atu ai kia ia.
14 Ti fakaolo atu e Isaraela hana lima matau, mo e fakalago ke he ulu a Efaraimo, ko e tama fakamui a ia; ka e fakalago hana lima hema ke he ulu a Manase, kua eke hana tau lima mo e loto matala, ha ko Manase ko e tama uluaki a ia.
15 Ti fakamonuina e ia a Iosefa, kua pehe age ki ai, Ko e Atua ni ne o fano ki mua hana e tau matua haku, ko Aperahamo mo Isaako, ko e Atua ni ne fagai au ke he haku a moui oti ato hoko mai ni ke he aho nai;
16 Ko e Agelu ni ne laveaki au mai he tau mena kelea oti kana, kia fakamonuina e ia e tau tama nai; kia ui ni a laua e higoa haku katoa mo e higoa he haku tau matua ko Aperahamo mo Isaako, kia pa foki a laua ke tolotologa ke he lalolagi.
17 Kua kitia e Iosefa kua fakalago hana matua tane e lima matau hana ke he ulu a Efaraimo, kua kelea e mena ia kia ia, ti lagaaki e ia e lima he hana matua tane ke uta kehe mai he ulu a Efaraimo ke he ulu ni a Manase.
18 Na pehe age foki a Iosefa ke he hana matua, Haku matua na e, aua neke pihia, ha ko e tama uluaki hanai, ati fakalago ā hau a lima matau ke he hana ulu.
19 Ka e nakai mafai hana matua, ka kua pehe mai a ia, Kua iloa e au, haku tama na e, kua iloa ni e au, to eke foki a ia mo motu, to fakatokologa foki a ia, ka e homo atu ni hana matakainaga tote kia ia, to eke foki hana fanau mo tau motu loga.
20 Ti fakamonuina e ia a laua ke he aho ia ni, kua pehe age, Ko koe ke fakamonuina ai he tau tagata Isaraela ke pehe, Kia eke he Atua a koe ke tuga a Efaraimo mo Manase; ne tofotofo e ia a Efaraimo ke mua kia Manase.
21 Ti pehe age a Isaraela kia Iosefa, Kitiala, ko e mate ne fai au nai, ka e fakalataha ni e Atua mo mutolu; to liuaki foki e ia a mutolu ke he motu he tau matua ha mutolu.
22 Ko au foki kua ta atu e au kia koe taha tufaaga ke mua ke he hau a tau matakainaga, ko e mena haia ne fofo mai e au he tau tagata Amori ke he haku a pelu mo e haku a kaufana.