Kenese 49:1-33
49 TI ui a Iakopo ke he hana tau tama tane, kua pehe age, Kia fakapotopoto mai a mutolu, to fakakite atu e au kia mutolu e tau mena ke hohoko mai kia mutolu ke he tau aho a mui.
2 Fakapotopoto mai ti fanogonogo mai a mutolu ko e tau tama a Iakopo; kia fanogonogo mai a kia Isaraela ha mutolu a matua.
3 Ko Reupena, ko e haku a tama uluaki ni a koe, ko e haku a malolo, mo e mataulu he haku a malolo, ko e lilifu fulufuluola, ko e malolo fulufuluola.
4 Kua matahavala a koe tuga ne vai kua puā, nakai mua a koe, ha kua hake a koe ke he mohega he hau a matua tane, ti fakakelea ai e koe; ne hake a ia ke he haku mohega.
5 Ko Simeona mo Levi, ko e matakainaga a laua, ko e tau pulega ha laua ko e tau kanavaakau ia ke favale ai.
6 Aua neke fifitaki haku loto ke he tau pulega fufu ha laua; aua neke fakalataha au mo e fakapotopotoaga ha laua; ha kua keli e laua e tagata ke he ha laua a ita, ko e ha laua a matahavala ne helehele hokohoko e tau hui he tau povi.
7 Kia ulaafia ha laua a ita, ha kua kaka ia, mo e ha laua a ita lahi ha kua favale ia; to vehevehe e au a laua ke he motu ko Iakopo, mo e fakapaea fano a laua i Isaraela.
8 Ko koe ma Iuta, to fakaheke kia koe hau a tau matakainaga, to hoko atu hau a tau lima ke he tau ua ha lautolu kua fai fi kia koe; to hufeilo kia koe e fanau he hau a matua tane.
9 Ko e punua leona a Iuta, haku tama na e, kua hake a koe mai he tau ola hāu; na takoto a ia mo e fakamemege tuga ne leona, tuga ne leona motua, ko hai taha ke fakalagalaga a ia?
10 Nakai uta kehe e tokotoko ia Iuta, po ke ekepule mai hana tau hui, ato haele mai a Sailo, to omaoma e tau motu kia ia.
11 Kua fakave e ia hana asini ke he vine, mo e hana punua asini ke he vine mitaki; kua unu e ia hana tau tapulu ke he uaina, mo e hana tau ie kafu ke he toto he tau fua vine;
12 Kua kula hana tau mata he uaina, ti hina hana tau nifo he puke huhu.
13 Ko Sepulona, to nofo a ia ke he tapa tahi, to eke a ia mo tukuaga taula he tau foulua, to hoko atu hana katofia ki Saitonu.
14 Ko Isakara, ko e asini malolo a ia, kua takoto ke he vaha he na loto pa mamoe.
15 Kua kitia e ia e okioki kua mitaki ia, mo e fonua foki kua fulufuluola ia, ti tuku atu hana ua ke hahamo kavega, kua eke foki mo tupa.
16 To fakafili e Tano hana motu tuga ne taha magafaoa a Isaraela;
17 To eke a Tano mo gata ke he puhala, ko e gata favale ke he puhala, kua gagau e muihui he solofanua kia to ki tua ai a ia ne heke ai.
18 Iehova na e, kua amaamanaki au ke he fakamouiaga mai ia koe.
19 Ko Kato, to kautu e kau kia ia; ka e fakamui to kautu a ia.
20 Mai ia Asera e tau mena lolo, ko e hana mena kai ia; ko ia foki ke ta atu e tau mena ke fakafiafia aki e tau patuiki.
21 Ko Nafatali, ko e aila ia kua fakahola; ko ia ke fakamatala atu e tau kupu mitaki.
22 Ko Iosefa, ko e la akau fua ia, ko e la akau fua ke he tapa vai puna; to totolo hana tau la ki luga he pa.
23 Ne fakamamahi a ia e lautolu ne fa fana, ne fana e lautolu a ia mo e ita a lautolu kia ia.
24 Ka e tumau ni e mao he hana kaufana, ko e hana tau lima foki kua fakamalolo ia he lima he Atua malolo a Iakopo; kua tupu mai ai foki e leveki mamoe, ko e maka haia a Isaraela;
25 Mai he Atua he hau a matua, ko ia ne lagomatai kia koe, ko ia hana e mana, to fakamonuina e ia a koe ke he monuina mai he lagi i luga, mo e monuina mai he mena hokulo ha i lalo, ko e monuina he tau huhu mo e manava;
26 Ko e fakamonuina he hau a matua kua mua ia ke he fakamonuina he haku a tau tupuna, kua hoko ke he katofia ni he tau mouga tukulagi; to ha i ai i luga he ulu a Iosefa, mo e tumuaki ulu hana ne vevehe kehe mo e hana tau matakainaga.
27 Ko Peniamina, kua hēhē e ia tuga ne luko; ko e pogipogi ke kai ai e ia e ola hana, ko e afiafi ke tufatufa ai e tau mena ne fofo.
28 Ko lautolu oti na, ko e tau magafaoa a Isaraela ne hogofulu ma ua; ko e tau kupu foki haia he matua tane ha lautolu kia lautolu, kua fakamonuina ai e ia a lautolu, kua takitokotaha mo e hana monuina kua fakamonuina ai e ia a lautolu.
29 Ne poaki foki e ia a lautolu, kua pehe atu, Ko e lafilafi ne fai au ke he haku a faoa; kia tanu e mutolu au fakalataha mo e haku tau matua ke he ana ha he fonua a Eferona ko e tagata Heti;
30 Ko e ana haia ha he fonua a Makapelu, ha i mua a Mamere, ke he motu ko Kanana, ko e fonua ia ne fakatau e Aperahamo ia Eferona ko e tagata Heti māna ke eke mo tukuaga.
31 Ko e mena haia ne tanu ai a Aperahamo mo e hana hoana ko Sara, ko e mena foki ia ne tanu ai a Isaako mo e hana hoana ko Repeka, ko e mena foki ia ne tanu ai e au a Lea.
32 Ko e fonua ia katoa me e ana ha i ai ne fakatau ia mai he fanau a Heti.
33 Kua oti he mavehe a Iakopo mo e hana fanau, ti fakapukupuku ai hana tau hui ke he hana mohega, ti fakaoti ai hana fafagu, kua lafilafi a ia ke he hana faoa.