Kenese 50:1-26
50 TI fakaveli ai a Iosefa ke he fofoga he hana matua, kua tagi ai i luga hana, mo e figita kia ia.
2 Ti fekau e Iosefa hana tau fekafekau ekekafo ke vakavakai hana matua tane, ti vakai ai a Isaraela he tau ekekafo.
3 Kua katoa hana tau aho ne fagofulu, ha kua pihia ni he fakakatoa he tau aho ha lautolu kua vakavakai; kua tagi foki a Aikupito kia ia fitugofulu ni e tau aho.
4 Kua mole e tau aho ne tagi ai a ia, ti vagahau atu a Iosefa ke he magafaoa a Farao, kua pehe atu, Kaeke kua ofania e mutolu au, kia tala age pehe a mutolu kia Farao;
5 Ne tala mai haku matua tane kia au ke omonuo au kia ia, ne pehe mai a ia, Kitiala, ko e mate ne fai au; ko e tukuaga ne keli e au māku ke he motu ko Kanana, ko e mena ia ni ke tanu ai e koe au. Ko e hanai, kia toka e koe au ke hake ke tanu haku matua tane, to liu mai na au.
6 Ti pehe mai ai a Farao, Hake a koe, mo e tanu e matua tane hau tuga ne omonuo e koe kia ia.
7 Ti hake ai a Iosefa ke tanu hana matua tane, ne o hake foki fakalataha mo ia e tau fekafekau oti a Farao, ko e tau momotua he hana kaina, mo e tau momotua oti ni he motu ko Aikupito;
8 Katoa mo e magafaoa oti a Iosefa, mo e hana tau matakainaga, mo e magafaoa he hana matua tane, ko e tau tama ikiiki hokoia, mo e tau mamoe mo e tau povi, ne toka e lautolu ke he magamotu ko Kosena.
9 Ne hake foki fakalataha mo ia e tau nofoa fakataveli mo lautolu foki kua heke solofanua, ko e lanu tagata tokologa ni.
10 Ne hohoko atu a lautolu ke he mena taholi saito a Atatu, ke he fahi atu a Ioritana; ti tagi tatuki ai a lautolu ke he mena ia, ko e tagi aue lahi ni; kua tagi ai ha ko e hana matua tane fitu e aho.
11 Ne kitia foki he tau tagata kua nonofo ke he motu ko Kanana e tagi ke he mena taholi saito a Atatu, ti pehe age ai a lautolu, Ko e tagi aue lahi hanā he tau tagata Aikupito; ko e mena ia ne ui ai e lautolu e mena ia ko Apelamisarima, ha he fahi atu a Ioritana.
12 Kua eke hana tau tama kia ia, tuga ne poaki e ia a lautolu.
13 Ha ko e mena uta hana tau tama a ia ke he motu ko Kanana, mo e tanu a ia ke he ana he fonua ko Makapelu, ne fakatau mai e Aperahamo katoa mo e fonua, ia Eferona ko e tagata Heti ke eke māna mo tukuaga, ha i mua a Mamere.
14 Ti liu atu a Iosefa ki Aikupito, ko ia mo e hana tau matakainaga mo lautolu oti kana ne o hake mo ia ke tanu hana matua tane, ka kua mole he tanu e ia hana matua tane.
15 Kua kitia he tau matakainaga a Iosefa kua mate tuai ha lautolu a matua tane, ti pehe ai a lautolu, Neke fakatuatua a Iosefa kia tautolu, mo e liuaki mai ni kia tautolu e tau mena kelea oti ne eke e tautolu kia ia.
16 Ti poaki age e lautolu kia ia, kua pehe age, Ne poaki mai hau a matua tane ka e nakala mate a ia, kua pehe mai,
17 Kia pehe ha mutolu a vagahau atu kia Iosefa, Kua ole atu e au, kia fakamagalo e koe e mahani kelea he hau a tau matakainaga mo e hala ha lautolu, ha ko e mena kelea ne eke e lautolu kia koe; hanai, kua ole atu a mautolu kia fakamagalo e koe e mahani kelea he tau fekafekau nai he Atua he matua tane hau. Ti tagi ni a Iosefa ha ko e tau kupu ha lautolu kia ia;
18 Ne o foki e tau matakainaga hana mo e fakaveveli fakafohifo ki mua hana, ti pehe atu a lautolu, Kitiala, ko e hau a tau fekafekau a mautolu nai.
19 Ti pehe mai ai a Iosefa kia lautolu, Ua matakutaku a mutolu; ko au kia ke hukui aki e Atua?
20 Ko e moli ne eke e mutolu ke kelea ai au; ka ko Atua ne eke e ia ke fakahiku ke he mitaki, kia hokotaki ai e fakamoui ke he tau tagata tokologa, tuga ne fakamoli ai ke he vaha nai.
21 Hanai, ua matakutaku a mutolu; to fagai e au ni a mutolu mo e ha mutolu a fanau; ti fakamafana e ia a lautolu, mo e vagahau fakamitaki mai kia lautolu.
22 Kua nofo a Iosefa i Aikupito, ko ia katoa mo e magafaoa he hana matua tane; ko e moui a Iosefa ko e taha teau ti hogofulu e tau tau ia;
23 Ne kitia foki e Iosefa e fanau a Efaraimo kua hoko ke he hau tolu; ko e fanau foki a Makiro ko e tama a Manase ne hapai ki luga he tau tulihui a Iosefa.
24 Ti pehe age a Iosefa ke he hana tau matakainaga, Ko e mate ne fai au, ka ko e Atua, to ahi mai ni e ia a mutolu, mo e ta hake e ia a mutolu mai he motu nai ke he motu ne omonuo ai a ia kia Aperahamo, mo Isaako, mo Iakopo.
25 Ti tala age ai a Iosefa ke omonuo mai e fanau a Isaraela, na pehe age, Ka ahi mai ni he Atua a mutolu; ti ta hake ai e mutolu haku tau huimotua he mena nai.
26 Ti mate ai a Iosefa ko e hana tau tau taha e teau ia, ti taha e hogofulu e tau; ne vakavakai foki e lautolu a ia, mo e tuku ke he puha i Aikupito.