Kenese 6:1-22
6 KUA hoko ke he vaha ne kamata ai ke fakatokologa e tau tagata ke he fuga kelekele; ne fanau foki kia lautolu e tau tama fifine.
2 Ti kitia ai he tau tama tane he Atua e tau tama fifine he tau tagata kua mitaki ni a lautolu; ti faihoana ai kia lautolu oti ne loto a lautolu ki ai.
3 Ti pehe age ai a Iehova, Nakai taufetoko tukulagi haku Agaga mo e tau tagata, ha ko lautolu foki ko e tau tagata ni; ka ko e tau aho ha lautolu ko e taha teau he tau tau ia, ti uafulu ni e tau.
4 Ha ha he lalolagi ke he vaha ia e tau tagata makimaki, ti pihia foki ke he vaha fakamui ne o age ai e tau tama tane he Atua ke he tau tama fifine he tau tagata, ne fanau foki e lautolu e fanau ma lautolu, ko e tau tagata malolo ia mo e talahaua i tuai.
5 Ne fioia e Iehova kua lahi ni e mahani kelea he tau tagata ke he lalolagi; ko e tau fatuakiloto oti foki he tau manatu he tau loto ha lautolu, ko e kelea hokoia ni ke he tau aho oti kana.
6 Ti kua tokihala a Iehova he eke e ia e tau tagata ke he lalolagi, ti mamahi foki hana finagalo.
7 Ti pehe age ai a Iehova, To tafi kehe e au mai he fuga kelekele e tau tagata ne eke e au; ko e tau tagata mo e tau manu huifa, ko e tau mena totolo mo e tau manu lele he pulagi; ha kua tokihala tuai au he eke e au a lautolu.
8 Ka ko Noa kua ofania a ia e Iehova.
9 Ko e tala hanai kia Noa; ko Noa ko e tagata tututonu ia mo e mahani hakohako ke he hana hau; ne o fano ai e Atua mo Noa.
10 Ne fanau foki e Noa e tau tama tane ne tokotolu, ko Semu, mo Hamo, mo Iafeta.
11 Ne kelea ni e lalolagi ki mua he Atua; ti puke ni e lalolagi ke he favale.
12 Kua kitekite e Atua ke he lalolagi, kitiala, kua kelea tuai, ha ko e tau tagata oti kana kua kelea ia lautolu ni ha lautolu a mahani ke he lalolagi.
13 Ti pehe mai ai e Atua kia Noa, Kua hoko mai ki mua haku e fakahikuaga he tau tagata oti; ha kua puke ni e lalolagi ke he favale ha ko lautolu; kitiala, to fakaotioti ni e au a lautolu katoa mo e lalolagi.
14 Kia ta e koe māu e vaka ke he akau ko e kofa; ti eke e koe e tau fata ke he vaka, kia goigoi foki e koe e liu mo e tua ke he pili.
15 Kia eke pehe foki e koe; tolu ni e teau e kupita ko e loa haia he vaka, ti limagofulu e kupita hana laulahi, ti tolugofulu e kupita hana tokoluga.
16 Kia eke e koe e fakamaama ke he vaka, ko e kupita ke fakaoti ai e koe ki luga, kia eke foki e koe e pa gutuhala he vaka ke he hana fahi; kia eke e tau fata he ke vaka, ko e taha he kelekele, taha ke ua aki, ti taha ke tolu aki.
17 Kitiala, ko au nai, ko e fakahoko ne fai e au e fakapuke ki luga he kelekele, to fakaoti ai e tau mena oti kana ha i ai e fafagu he moui i lalo ni he lagi; to fakahiku e moui he tau mena oti ha he lalolagi.
18 Ka e fakamau e au haku a maveheaga mo koe; to hu foki a koe ke he vaka, ko koe, mo e hau a tau tama tane, mo e hau a hoana, katoa mo e tau hoana he tau tama tane hau fakalataha mo koe.
19 To uta e koe ke he vaka e tau mena momoui, takiua ni he tau mena moui oti, kia fakamoui ai fakalataha mo koe; ko e manu tane mo e manu fifine;
20 Ko e tau manu lele takitaha mo e hana kakano, mo e tau manu huifa takitaha mo e hana kakano, ko e tau mena oti foki kua totolo ke he kelekele takitaha mo e hana kakano, to o mai takiua ni he tau mena oti kia koe, kia fakamoui ai.
21 Ko koe foki, kia uta e koe māu e falu a mena kai he tau mena oti kua kai, kia tanaki e koe ia koe; to eke foki ia mo oho māu katoa foki mo lautolu.
22 Ti eke ni e Noa; tuga ne poaki mai he Atua kia ia ke he tau mena oti, ne eke pihia ai e ia.