Kenese 7:1-24
7 NA pehe mai a Iehova kia Noa, Kia hu atu a koe katoa mo e hau a magafaoa oti ke he vaka; ha kua kitia tuai e au a koe kua tututonu ki mua haku ke he hau nai.
2 Kia uta e koe takifitu he tau manu huifa oti kua mea, ko e tau tane mo e tau fifine; ka e takiua ni he tau manu hui fa kua nakai mea, ko e tane mo e fifine.
3 Kia takifitu foki he tau manu lele he pulagi, ko e tau tane mo e tau fifine, kia momoui ai ha lautolu a tau punua ke he fuga kelekele oti kana.
4 Ha ko e mena toe po fitu to fakato hifo ai e au e uha ke he lalolagi ke he fagofulu e aho ti fagofulu e po; to fakaoti ai e au mai he fuga kelekele e tau mena momoui oti kana ne eke e au.
5 Ti eke ni e Noa, tuga ne tau mena oti ne poaki mai ai e Iehova kia ia.
6 Ko e ono ni e teau he tau tau a Noa, ti hoko ai e fakapuke ke he lalolagi.
7 Ne hu atu a Noa, mo e hana tau tama tane, mo e hana hoana, mo e tau hoana he hana tau tama tane, fakalataha mo ia ke he vaka ha ko e fakapuke.
8 Ko e tau manu huifa kua mea, mo e tau manu huifa kua nakai mea, mo e tau manu lele, katoa mo e tau mena oti kua totolo ke he lalolagi,
9 Ne huhu atu takiua a lautolu ke he vaka kia Noa, ko e tane mo e fifine; tuga ne poaki mai e Atua kia Noa,
10 Kua hoko ke he aho fitu, ti hoko mai ai e vai he fakapuke ke he lalolagi.
11 Ko e tau ne ono e teau he moui a Noa, ko e mahina ne ua, ko e aho hogofulu ma fitu he mahina, ko e aho ia ni ne maihi ai e tau vai puna oti kana he moana lahi, ti hafagi ni e tau pa he lagi.
12 Ti ha ha he lalolagi e uha ke he fagofulu e aho, ti fagofulu e po.
13 Ko e aho ia ni ne hu atu ai a Noa, mo e tau tama tane a Noa, ko Semu, mo Hamo, mo Iafeta, mo e hoana a Noa, mo e tau hoana ne tokotolu he hana tau tama, fakalataha mo lautolu, ke he vaka;
14 Ko lautolu nai, mo e tau manu huifa he vao oti takitaha mo e hana kakano, mo e tau manu huifa oti he kaina takitaha mo e hana kakano, mo e tau mena totolo oti kua totolo ke he kelekele takitaha mo e hana kakano, mo e tau manu lele oti takitaha mo e hana kakano, ko e tau mena lele oti kua tapakau kehekehe.
15 Ne huhu atu foki a lautolu kia Noa ke he vaka, takiua ni he tau mena momoui oti ha i ai e fafagu he moui.
16 Ne huhu atu a lautolu, ko e tane mo e fifine he tau mena momoui oti, ne huhu atu a lautolu, tuga ne poaki he Atua kia ia; ti puipui ai e Iehova a ia.
17 Ha i ai foki e fakapuke ke he lalolagi po fagofulu; ne hake taha e vai, ti holo ai e vaka, kua malagaaki foki ki luga he lalolagi.
18 Ne malolo foki e vai, mo e lahi mahaki ni ke he lalolagi; ti holo ni e vaka ke he fuga vai.
19 Ti lahi mahaki ni e malolo he vai ke he lalolagi; ti lofia ai e tau mouga tokoluga oti, ha i lalo he lagi oti.
20 Ne kautu e vai hogofulu ma lima e kupita hana tokoluga, kua lofia ai e tau mouga.
21 Ti fakahiku ai e tau mena momoui oti ne o fano ke he lalolagi, ko e tau manu lele, mo e tau manu huifa he kaina, mo e tau manu huifa he vao, mo e tau mena totolo oti kua totolo ke he kelekele, katoa mo e tau tagata oti.
22 Ne mamate e tau mena oti ha i ai e fafagu he moui ke he tau pokoihu ha lautolu, ke he kelekele momo oti kana.
23 Ne fakaoti e tau mena momoui oti kana ha he fuga kelekele, ko e tau tagata, mo e tau manu huifa, mo e tau mena totolo, katoa mo e tau manu lele he pulagi; ne fakaoti a lautolu mai he lalolagi; ne toe a Noa hokoia, mo lautolu kua fakalataha mo ia ke he vaka.
24 Ne kautu e vai ke he lalolagi, taha ni e teau he tau po, li limagofulu.