Kenese 8:1-22
8 TI kua manatu he Atua a Noa, mo e tau mena momoui oti, mo e tau manu huifa oti ha he vaka mo ia. Ti fakaagi atu he Atua e matagi ke he lalolagi, ti matuku hifo ai e vai;
2 Ne ponotia foki e tau puna vai he moana, mo e tau pa he lagi; ne māo foki e uha mai he lagi.
3 Ti liu atu e vai he lalolagi, hagaaki liu ni; kua mole e tau aho taha ni e teau ti limagofulu ha ha ne matuku hifo e vai.
4 Kua hoko ke he mahina fitu, ko e aho hogofulu ma fitu he mahina, ti tu ai e vaka ki luga he tau mouga a Ararata.
5 Ne hagaaki matukutuku hifo e vai kua hoko ke he mahina hogofulu; ko e mahina hogofulu ko e aho fakamua he mahina ne kitia ai e tau tapunu mouga.
6 Kua tu e aho fagofulu, ti vevete ai e Noa e fakamaama he vaka ne eke e ia;
7 Ti fakafano atu e ia e oreva; kua lele atu a ia mo a tafeliuaki ato pakupaku e vai mai he kelekele.
8 Ti fakafano atu e ia e lupe ia ia, ke iloa ai po ke teitei pakupaku e vai mai he fuga kelekele.
9 Ka e nakai moua he lupe ha mena ke tu ai hana hui, ti liu mai ai a ia kia ia ke he vaka; ha ko e mena toka agaia e vai ke he fuga kelekele oti kana. Ti fakaolo atu e ia hana lima mo e toto a ia, ti eke mai kia ia ke he vaka.
10 Ti tatali po fitu foki a ia, ti liu foki fakafano atu e ia e lupe he vaka;
11 Kua hau foki kia ia e lupe ke he magaaho afiafi, kitiala, ha he gutu hana e lau olive mata; ti iloa ai e Noa kua teitei pakupaku e vai ke he lalolagi.
12 Ti tatali po fitu foki a ia, ti fakafano atu ai e ia e lupe, ka e nakai tuai liu mai a ia kia ia.
13 Kua hoko ke he tau ne ono e teau ma taha, ko e mahina fakamua, ko e aho fakamua he mahina kua momo ai e vai ke he lalolagi; ti uta kehe e Noa e ufiufi he vaka, mo e kitekite atu, kitiala, kua momo tuai e fuga kelekele.
14 Ko e mahina ua, ko e aho uafulu ma fitu he mahina ne pakupaku ai e lalolagi.
15 Kua vagahua mai e Atua kia Noa, kua pehe mai,
16 Kia huhū atu a he vaka, ko koe, mo e hoana hau, mo e tau tama tane hau, mo e tau hoana he hau a tau tama tane, fakalataha mo koe.
17 Kia uta ki fafo fakalataha mo koe e tau mena momoui oti ha ha ia koe mai he tau mena moui oti, ko e tau manu lele, mo e tau manu huifa, katoa mo e tau mena totolo oti kua totolo ke he kelekele; kia tolotologa a lautolu ke he lalolagi, kia fanau a lautolu mo e fakaloga ke he lalolagi.
18 Ti huhū atu ai a Noa, mo e hana tau tama tane, mo e hana hoana, mo e tau hoana he tau tama hana fakalataha mo ia.
19 Ti huhū atu ai he vaka, ko e tau manu huifa oti, mo e tau mena totolo oti, mo e tau manu lele oti, katoa mo e tau mena oti kua totolo ke he lalolagi, takitaha mo e hana vahega.
20 Ti ati ai e Noa e fatapoa kia Iehova, ne uta foki e ia e falu a manu he tau manu huifa, oti kua mea, mo e tau manu lele oti kua mea, ke eke aki e tau poa huhunu ke he fatapoa.
21 Ti logona e Iehova e namu manogi, to pehe hifo a Iehova ke he hana finagalo, Pete ni kua kelea e tau fatuakiloto he tau loto he tau tagata kua kamata mai he vaha tote, ka e nakai liu foki fakahoko e au e malaia ke he kelekele ha ko e tau tagata; ti nakai liu foki keli e au e tau mena momoui oti tuga ne eke e au.
22 Ko e tau aho oti he lalolagi nakai tuai fakahiku e tau ke to mena ai, mo e tau ke helehele mai ai, ko e makalili foki mo e vevela, ko e tau mateafu mo e tau tupu, ko e aho foki mo e po.