Kenese 9:1-29
9 NE fakamonuina he Atua a Noa mo e hana tau tama tane, kua pehe atu ai kia lautolu, Kia fanau a mutolu, ti fakatokologa, ti fakapuke e mutolu e lalolagi.
2 Kia matakutakuina a mutolu mo e hopo ate kia mutolu e tau manu huifa oti he lalolagi mo e tau manu lele oti he pulagi, mo e tau mena oti kua totolo ke he kelekele, katoa mo e tau ika oti he tahi; kua tuku atu ia ke he tau lima ha mutolu.
3 Ko e tau mena momoui oti kua o fano, to eke ia mo mena kai ma mutolu; kua foaki atu e au ma mutolu e tau mena oti kana, tuga ne tau akau ikiiki lau mukamuka.
4 Ka ko e kakano manu ha i ai hana moui, ko e hana toto haia, aua neke kai ai e mutolu.
5 Ko e moli to kumi e au ha mutolu a tau toto he tau moui ha mutolu; to kumi e au ke he tau manu oti, mo e tau tagata; ko e moui he tagata to kumi e au ke he tagata hana e matakainaga.
6 Ko ia ne fakamaligi e toto he tagata, to fakamaligi he tagata hana ni a toto; ha ko e fakatai he Atua ne eke ai e ia e tagata.
7 Ko mutolu foki kia fanau a mutolu, mo e fakatokologa; kia tolotologa ke he lalolagi mo e fakatokologa i ai.
8 Ne vagahau mai e Atua kia Noa mo e hana tau tama tane fakalataha mo ia, kua pehe mai,
9 Kitiala, ko au nai to fakatu e au haku a maveheaga mo mutolu, mo e ha mutolu a fanau ka mole atu a mutolu;
10 Mo e tau mena momoui oti ha ia mutolu, ko e tau manu lele, ko e tau manu huifa he kaina, mo e tau manu vao oti ha ia mutolu, ke kamata ke he tau mena oti ne huhū atu he vaka, ato hoko ke he tau manu oti he lalolagi.
11 To fakatu e au haku a maveheaga mo mutolu; ti nakai tuai mahaikava ni e tau mena momoui oti ke he vai he fakapuke; ti nakai tuai hoko mai e fakapuke ke mahakava ai e lalolagi.
12 Ne pehe mai foki e Atua, Ko e fakamailoga hanai he maveheaga kua eke e au mo mutolu, katoa mo e tau mena momoui oti ha ha ia mutolu, ke hahau mo hahau;
13 Kua tuku atu e au haku a tagaloa ke he aolagi, to eke ia mo fakamailoga he maveheaga he lalolagi mo au;
14 Ka fakamalumalu e au e lalolagi ke he tau aolagi, ti kitia ai e tagaloa ke he aolagi;
15 Ti manatu ai e au haku a maveheaga kua eke e au mo mutolu, mo e tau mena kehekehe oti kua momoui; ti nakai tuai eke e vai mo fakapuke ke mahakava ai e tau mena oti ne momoui.
16 To ha i ai foki e tagaloa ke he aolagi, to kitekite au ki ai, ke manatu ai e maveheaga tukulagi kua eke e au ko e Atua, mo e tau mena kehekehe oti kua momoui ke he lalolagi.
17 Ne pehe mai e Atua kia Noa, Ko e fakamailoga hanā he maveheaga kua fakatu e au, mo e tau mena momoui oti ha ha he laloagi.
18 Ko e tau tama tane foki a Noa ne huhu atu he vaka, ko Semu ia, mo Hamo, mo Iafeta; ko Hamo foki ko e matua tane haia a Kanana.
19 Ko e tau tama haia a Noa ne tokotolu; ko lautolu foki ne kaputia ai e lalolagi oti kana.
20 Ti kamata ai a Noa ke gahua ke he kelekele; kua to foki e ia e uluvine.
21 Ti inu ai e ia e uaina mo e konahia ai, ti nakai felevehi a ia ke he loto fale ie hana.
22 Kua kitia e Hamo e matua tane a Kanana hana matua tane kua nakai felevehi; ti tala age ai e ia ke he hana tau matakainaga tokoua i fafo.
23 Ti toto ai e Semu mo Iafeta e tapulu mo e tuku ke he vahegatua ha laua, ti o hala tua a laua mo e ufiufi e matua tane ha laua nakai felevehi; ti kua haga kehe e tau mata ha laua, ti nakai kitia e laua e matua tane ha laua kua nakai felevehi.
24 Ne ala foki a Noa he hana uaina, ti iloa ai e ia e mena ne eke hana tama fakamui kia ia.
25 Ti pehe age ai a ia, To malaia a Kanana, to eke ni a ia mo tupa ke he hana tau matakainaga.
26 Na pehe age foki a ia, Kia fakaaueai a Iehova ko e Atua a Semu; to eke foki a Kanana mo tupa māna.
27 To fakalahi he Atua a Iafeta, to nofo foki a ia ke he tau fale ie a Semu; to eke foki a Kanana mo tupa māna.
28 Ko e tau tau foki ne moui ai a Noa tali mai he fakapuke, tolu e teau ia ti limagofulu e tau.
29 Ko e katoatoa foki he tau aho a Noa, ko e hiva e teau ia he tau tau, ti limagofulu; ti mate ai a ia.