Kolose 1:1-29
1 KO au ko Paulo, ko e aposetolo a Iesu Keriso ke he finagalo he Atua, ko maua mo e matakainaga ko Timoteo,
2 Ko e tohi ha maua hanai ke he tau tagata tapu i Kolose, ko e tau matakainaga fakamoli foki ha ia Keriso; kia ha ha ia mutolu e fakaalofa noa mo e monuina mai he Atua ha tautolu a Matua, katoa mo e Iki ko Iesu Keriso.
3 Kua fakaaue atu a maua ke he Atua, ko e Matua he Iki ha tautolu ko Iesu Keriso, kua liogi nakai noa ma mutolu,
4 He fanogonogo atu a maua ke he tua ha mutolu kia Keriso Iesu, mo e fakaalofa ha mutolu ke he tau tagata tapu oti kana;
5 Ha ko e amaamanaki kua toka ma mutolu ke he lagi; ne fanogonogo fakamua a mutolu ki ai ke he kupu he mena moli ha he vagahau mitaki,
6 Ko ia ha ha ia mutolu ainei, kua pihia foki ke he lalolagi oti; kua fua mai foki e tau fua tuga he eke ia mutolu, tali mai he aho ne fanogonogo atu ai a mutolu mo e iloa mitaki e fakaalofa noa he Atua mo e fakamoli,
7 Tuga foki he fakaako e Epafara a mutolu, ko ia ko e lagomatai ha maua kua fakahelehele, ko e fekafekau fakamoli a Keriso a ia ma mutolu,
8 Ko ia foki ne fakailoa mai kia maua ha mutolu a fakaalofa mai ha he Agaga.
9 Ko e mena ia, nakai okioki ai a maua he liogi ma mutolu, tali mai he aho ne fanogonogo atu a maua ki ai, kua ole atu foki kua puke a mutolu ke he maama mitaki ke he hana finagalo, ke he pulotu oti katoa mo e loto matala kua fakalata ke he Agaga.
10 Kia mahani a mutolu ke lata mo e Iki, kia fiafia mai a ia kia mutolu ke he tau mena oti; kia fua mai ai a mutolu ke he tau gahua mitaki oti, kia tupu foki ha mutolu a maama mitaki ke he Atua;
11 Kia fakamalolo e ia a mutolu ke he malolo oti kana ke lata mo e malolo he hana lilifu, kia tupu kia mutolu e fakauka katoatoa, mo e fakamanavalahi katoa mo e fiafia;
12 Kua fakaaue atu ke he Matua, ko ia kua taute a tautolu ke lata a tautolu mo e tufaaga he mena kua eke he tau tagata tapu ha he maama;
13 Ko ia kua laveaki a tautolu mai he pule he pouli, ti ta mai a tautolu ke he kautu he hana Tama fakahele;
14 Ha ia ia kua moua ai e tautolu e lukutoto ke he hana toto, ko e fakamagaloaga he tau hala;
15 Ko ia foki ko e fakatai he Atua nakai kitia, ko e uluaki he tau mena oti kana kua eke;
16 Ha ko e mena ne eke e ia e tau mena oti kana, ko e tau mena ha he lagi, mo e tau mena ha he lalolagi, ko e tau mena kua kitia mo e tau mena nakai kitia, po ke tau nofoaiki, po ke tau iki, po ke tau patuiki, po ke tau pule; ko ia ne eke e tau mena oti kana, ne eke foki māna.
17 Ko ia foki kua fakamua ke he tau mena oti; kua tumau foki e tau mena oti kana ia ia.
18 Ko e ulu foki a ia he tino, ko e ekalesia ia; ko e kamataaga foki a ia, ko e uluaki, mai he tau tagata mamate, kia mua ue atu a ia ke he tau mena oti kana.
19 Ha kua finagalo e Atua ke nofo i loto ia ia e katoatoaga oti kana;
20 Kia fakafeilo foki ia ia e tau mena oti mo ia, ha kua fakatupu ai e ia e mafola ke he toto he hana satauro; ia ia ni po ke tau mena ha he lalolagi, po ke tau mena ha he lagi.
21 Ko mutolu foki ko e tau tagata kehe a mutolu i tuai, ne fai fi a mutolu kia ia ke he tau loto ha mutolu ke he tau gahua kelea; ka ko e vaha nai kua fakafeilo tuai e ia a mutolu mo ia,
22 Ke he hana tino tagata, ha kua matulei, kia tuku atu ai e ia a mutolu, ko e tau tagata fakatapu, kua nakai fai kelea, kia nakai fai mena foki ke fakahala ai a mutolu ki mua hana ni;
23 Kaeke ke tumau a mutolu ke he tua, kua fakamau, mo e mauokafua, ka nakai hiki a mutolu mai he amaamanaki ha he vagahau mitaki, ne fanogonogo a mutolu ki ai, ne fakamatala atu ke he tau tagata oti ke he lalolagi; ko au foki ko Paulo kua eke mo fekafekau ki ai.
24 Kua fiafia au ainei ke he tau mena kua mamahi ai au ma mutolu, kua fakakatoatoa foki e au ke he haku a tino e tau mena kua toe he tau matematekelea a Keriso ha ko e hana tino, ko e ekalesia ia.
25 Kua eke au mo fekafekau ki ai, ke lata mo e feua he fekafekau pule he Atua, kua tuku mai kia au ma mutolu, kia fakamatala tolomaki e au e kupu he Atua;
26 Ko e kupu galo ia ne ufia tali mai he tau tau mo e tau hau kua mole atu, ka ko e vaha nai kua fakakite mai ai ke he hana tau tagata tapu;
27 Ne finagalo foki e Atua ke fakailoa atu ki ai po ke heigoa e koloa lahi he monuina ha he kupu galo nai ke he tau tagata kehe, ko Keriso haia ha ha ia mutolu ko e amaamanaki ke he monuina;
28 Ko ia ni kua fakamatala atu e mautolu, mo e tomatoma atu ke he tau tagata oti kana, mo e fakaako atu ai ke he tau tagata oti kana ke he iloilo oti, kia tuku atu ai e mautolu e tau tagata oti kua katoatoa e mitaki ha ia Keriso Iesu;
29 Ko e mena foki ia kua gahua ai au mo e fakamalolo, ke lata mo e gahua hana kua gahua ai ni ki loto ia au mo e malolo.