Kolose 2:1-23
2 HA ko e mena kua manako au kia iloa e mutolu haku a tau lahi ha ko mutolu, mo lautolu ha i Laotikaia, katoa mo lautolu oti kua nakai kitia e au ke he tino;
2 Kia fakamafanatia ha lautolu a tau loto, kua fevihiaki he fakaalofa, kia moua ai e koloa oti he maliali ke he loto matala, kia iloa mitaki ai e kupu galo he Atua, ko e Matua ia, katoa mo Keriso;
3 Ha ha ia ia e tau tanakiaga koloa oti kana he iloilo mo e maama kua galo ai.
4 Kua tala atu e au e kupu ia, neke fakahehe e taha a mutolu ke he tau kupu fakavai.
5 Ha ko e mena pete ni he nakai ha i ai au ia mutolu ke he tino, kua ha i ai au ia mutolu ke he agaga, kua fiafia au mo e kikite atu ke he ha mutolu a tauteute mitaki, mo e mauokafua he tua ha mutolu kia Keriso.
6 Haia, tuga ne talia e mutolu a Keriso Iesu, ko e Iki, kia o fano ai a mutolu ia ia;
7 Kua fai vaka a mutolu ia ia, mo e ati hake kia ia, ti fakatumau ke he tua, tuga ne fakaako ai a mutolu mo e fakaaue.
8 A mutolu, neke lautaki e taha a mutolu ke he pulotu nakai aoga ke fakahehe ai, ke lata mo e kupu toka tuai he tau tagata, ke lata foki mo e tau kupu fakamua he lalolagi, ka e nakai lata mo Keriso;
9 Ha ko e mena kua nofo i loto ia ia e katoatoaga oti he Atua kua tino mai;
10 Kua fakapuke namo foki a mutolu ia ia; ko e ulu haia he tau iki oti kua mumua, katoa mo e tau pule.
11 Ha ha ia ia ne fakaperitome foki a mutolu ke he peritomeaga nakai eke he tau lima, ke he tukukeheaga he tau hala oti kana he tino ke he peritomeaga mai ia Keriso;
12 Ne tanumia a mutolu fakalataha mo ia ke he papatisoaga, ko ia foki kua liliu foki tutu mai ai a mutolu fakalataha mo ia he tua a mutolu ke he gahua malolo he Atua, ko ia haia ne fakatu mai a ia mai ia lautolu kua mamate.
13 Ko mutolu foki, ne mamate a mutolu he tau holifono mo e nakai peritome ha mutolu a tau tino, ne fakamomoui e ia a mutolu fakalataha mo ia, kua fakamagalo mai tuai ha mutolu a tau holifono oti kana;
14 Kua holoholo kehe tuai e tohilima ne kelea ai a lautolu ha he tau fakatufono ne totoko mai kia tautolu, kua uta kehe ai foki mai he vaha loto, mo e fakamau fao ai ke he satauro;
15 Kua tuku kehe tuai e ia e tau mena he tau iki mumua mo e tau pule, ti fakakite mai ai a lautolu ke iloa oti, kua kautu a ia kia lautolu ke he mena ia ni.
16 Hanai, aua neke fakafili e taha a mutolu ke he kai mena, po ke inu, po ke tau mena he tau galue, po ke mahina pula fou, po ke tau sapati;
17 Ko e ata ni a ia he tau mena ne tatali, ka ko e tino, ko Keriso ni a ia.
18 Aua neke fakavai e taha a mutolu ke uta e palepale, he hana fia fakatokolalo, mo e hufeilo ke he tau agelu, kua kumi ke he tau mena kua nakai kitia e ia, kua fakatokoluga noa ke he hana a manamanatu ke lata mo e tino;
19 Kua nakai toto mau foki ke he Ulu, ko ia kua mua ai mo e tutaki fakalataha ai e tino katoa ke he tau fatia mo e tau hokohoko kua tupu ai, he fakatupu mai he Atua.
20 Hanai, kaeke kua mamate a mutolu fakalataha mo Keriso ke he tau kupu fakamua he lalolagi, ko e ha kia kua omaoma ai a mutolu ke he tau poaki tuga he nonofo a mutolu ke he lalolagi?
21 (Aua neke fakapiki atu ki ai, aua neke kamata, aua neke toto;
22 Ko e tau mena oti ia ke mole atu he eke ai;) ke lata mo e tau poaki mo e tau mena fakaako he tau tagata;
23 Ko e tau mena ia ha ha i ai e talahaua iloilo mo e fia tapuaki, mo e fakatokolalo, mo e fakateaga ke he tino, kua nakai aoga ai, ka kia makona lahi ai e tino.