Levitika 11:1-47
11 KUA vagahau mai e Iehova kia Mose mo Arona, kua pehe mai kia laua,
2 Kia tala age e mua ke he fanau a Isaraela, kia pehe age, Ko e tau manu hanai ke kai ai e mutolu mai he tau manu huifa oti ha ha i luga he kelekele;
3 Ko e tau manu oti kua magaua e mahina hui, mo e ihiua ai hana tau mahina hui, kua liuaki kai foki hana mama; kia kai ai e mutolu.
4 Ka e aua neke kai e mutolu e tau mena nai he tau manu kua liuaki kai hana mama, mo e tau manu kua magaua ai e tau mahina hui; ko e kamela ha ko e mena liuaki kai e ia hana mama, ka e nakai magaua ai hana tau mahina hui, kua kelea ia kia mutolu.
5 Ko e sifanai foki ha ko e mena liuaki kai e ia hana mama, ka e nakai magaua ai hana tau mahina hui, kua kelea a kia mutolu.
6 Ko e aranapata foki, ha ko e mena liuaki kai e ia hana mama, ka e nakai magaua ai e tau mahina hui; kua kelea a ia kia mutolu.
7 Ko e puaka foki, ha kua magaua hana tau mahina hui kua ihiua ai, ka e nakai liuaki kai e ia hana mama; kua kelea a ia kia mutolu.
8 Aua neke kai e mutolu ha lautolu a kakano; ko e tau tino mamate foki he tau manu ia aua neke pipiki atu ki ai a mutolu; kua kelea ia kia mutolu.
9 Ko e tau mena nai foki ke kai ai e mutolu he tau mena oti ke he vai; ko e tau mena oti kua fai vaha mo e tau hinafi ke he vai, ko e tahi, mo e tau vailele, kia kai ai e mutolu.
10 Ka ko e tau mena oti ke he tahi mo e tau vailele kua nakai fai vaha, mo e tau hinafi he tau mena oti kua faifano ke he vai, katoa mo e tau mena momoui oti ha ha he vai, to eke ia mo mena fakalialia kia mutolu.
11 Kia eke e lautolu mo mena fakalialia kia mutolu, aua neke kai e mutolu e kakano ha lautolu, ko e tau tino mamate foki ha lautolu kia eke ai mo mena fakalialia kia mutolu.
12 Ko e tau mena oti ke he vai kua nakai fai vaha, mo e tau hinafi, ko e tau mena fakalialia kia mutolu haia.
13 Ko e tau manu foki hanai he tau manu lele ke eke mo mena fakalialia kia mutolu, aua neke kai ai e mutolu kia eke a lautolu mo mena fakalialia kia mutolu, ko e aeto, mo e peresi, mo e oseni,
14 Ko e taa foki, mo e aie, mo e tau manu kua kakano fakalataha mo ia.
15 Ko e tau oreva oti, mo e tau manu kua kakano fakalataha mo ia.
16 Ko e iaena, mo e takemasa, mo e sakafa, mo e nesa, mo e tau manu kua kakano fakalataha mo ia.
17 Ko e kusa, mo e salaka, mo e ianesufa,
18 Mo e tanisamiti, mo e kati, mo e rakama,
19 Mo e kasita, mo e motuku, mo e tau manu kua kakano fakalataha mo ia, ko e tukapiti foki, mo e peka.
20 Ko e tau mena lele oti kua totolo, ko e tau mena huifa kua totolo, kia eke ia mo mena fakalialia kia mutolu.
21 Ka ko e tau mena nai ke kai ai e mutolu he tau mena totolo oti kua lele ko e tau mena huifa kua totolo, kua fai maga hui i luga he tau polohui ke hopo ai ke he kelekele.
22 Ko e tau mena ke kai ai e mutolu he tau mena ia hanai, ko e hē akerise, mo e tau mena kua kakano fakalataha mo ia; mo e hē solome, mo e tau mena kua kakano fakalataha mo ia; mo e hē akoli, mo e tau mena kua kakano fakalataha mo ia; mo e hē akava, mo e tau mena kua kakano fakalataha mo ia.
23 Ka ko e tau mena lele oti kua huifa kua totolo, kia eke ia mo mena fakalialia kia mutolu
24 Ko e tau mena ia foki ke kelea ai a mutolu, ko e tagata kua pipiki atu ke he tau tino mamate he tau mena ia, to kelea ai a ia ato hoko ke he afiafi.
25 Ko ia foki kua uta ha mena mai he tau tino mamate he tau mena ia, kia unu e ia hana tau tapulu, ti kelea ai a ia ato hoko ke he afiafi.
26 Ko e tau manu huifa oti kua magaua e tau mahina hui, ka e nakai ihiua ai hana tau mahina hui, to nakai liuaki kai foki e ia hana mama, kua kelea ia kia mutolu; ko ia foki ke pipiki atu ke he tau tino mamate he tau manu ia to kelea ai a ia.
27 Ko e tau manu oti foki kua totolo ke he tau aloalohui ha lautolu he tau manu huifa kua totolo, kua kelea ia kia mutolu, ko ia kua pipiki atu ke he tau tino mamate ha lautolu to kelea ai a ia ato hoko ke he afiafi.
28 Ko ia foki kua uta e tau tino mamate he tau manu ia, kia unu e ia hana tau tapulu, ti kelea ai a ia ato hoko ke he afiafi; kua kelea e tau mena ia kia mutolu.
29 Ko e tau mena nai kua kelea kia mutolu he tau mena totolo, kua totolo ke he kelekele, ko e kalati, mo e kuma, mo e moko taliga mo e tau mena kua kakano fakalataha mo ia.
30 Ko e anaki, mo e moko koaka, mo e moko leta, mo e moko kometa, mo e moko nasama.
31 Kua kelea e tau mena ia kia mutolu he tau mena oti kua totolo; ko ia kua pipiki atu ke he tau tino mamate he tau mena ia, to kelea ni a ia ato hoko ke he afiafi.
32 Ko e tau mena oti ka to ki ai e tau tino ha lautolu ka mamate, to kelea ia kia mutolu, po ke taha kumete akau, po ke tapulu, po ke kili manu, po ke kato, ko e tau mena oti ke eke aki e gahua, kia tuku ai ke he vai, to kelea ia ato hoko ke he afiafi, ati mea ai a ia.
33 Ko e tau kapiniu kelekele oti foki, ka to ki ai ha mena he tau mena ia, kua kelea tuai kia mutolu e mena ne tokai i loto he kapiniu; ti lipilipi ai e mutolu a ia.
34 Ko e tau mena kai oti kua lata ke kai ai, kaeke ke hoko ki ai e maga vai ti kelea ia kia mutolu; ko e tau mena inu oti foki kua lata ke inu ai ha he tau kapiniu oti ka to ki ai ha mena pihia ka mate, kua kelea ia kia mutolu.
35 Ko e mena foki ka to ki ai e tino mate he tau mena ia, po ke gutuumu po ke tau mena ne lago aki e umu kia moumou e mena ia; kua kelea tuai e mena ia, kia eke ia mo mena kelea kia mutolu.
36 Ka ko e vaipuna, mo e vaikeli, ne lahi ai e vai, kua mea ia; ka ko ia kua pipiki atu ke he tau tino mamate ha lautolu, kua kelea ai a ia.
37 Kaeke foki ke to ai e tau tino mamate ha lautolu ke he tau saito ke gana, ko e tau saito ke gana ai, kua mea ai a ia.
38 Kaeke foki kua liligi e maga vai ke he tau saito ke gana, to to ki ai e tau tino he tau mena kua mamate; kua kelea ia kia mutolu.
39 Kaeke foki ke mate taha he tau manu huifa kua lata ke kai ai e mutolu; ko ia kua pipiki atu ke he hana tino kua mate, kua kelea ai a ia ato hoko ke he afiafi.
40 Ko ia foki ka kai e tino hana kua mate, kia unu e ia hana tau tapulu, ti kelea ai a ia ato hoko ke he afiafi; ko ia foki ka uta e tino hana kua mate kia unu e ia hana tau tapulu ti kelea ai a ia ato hoko ke he afiafi.
41 Ko e tau mena totolo oti kua totolo ke he kelekele, ko e tau mena fakalialia ia, aua neke kai ai.
42 Ko e tau mena oti kua totolo ke he manava, mo e tau mena huifa oti kua totolo, mo e tau mena oti kua loga ai e tau hui ha lautolu, he tau mena oti kua totolo ke he kelekele, aua neke kai ai e mutolu, ha ko e tau mena fakalialia haia.
43 Aua neke fakalialia a mutolu kia mutolu ke he tau mena totolo oti kua totolo, ti aua neke fakakelea e mutolu a mutolu ke he tau mena ia, ke kelea ai a mutolu;
44 Ha ko au ko Iehova ko e ha mutolu a Atua; kia fakatapu e mutolu a mutolu, ti tapu a mutolu; ha ko au nai kua tapu ni au; aua neke kelea ai a mutolu ke he tau mena totolo oti kua totolo ke he kelekele.
45 Ha ko au ko Iehova, ne ta hake a mutolu mai he motu ko Aikupito, ke eke mo Atua ha mutolu; kia tapu a mutolu, ha ko au nai kua tapu ni au.
46 Ko e fakatufono hanā he tau manu huifa, mo e tau manu lele, mo e tau mena momoui oti kua totolo ke he vai, katoa mo e tau mena momoui oti kua totolo ke he kelekele;
47 Ke fakamailoga ai e mena kelea, mo e mena mea, ko e manu foki kua lata ke kai, mo e manu kua nakai lata ke kai.